Ndai sumla ni hpe yu dat mu. Sumla shagu hta Egutu mung ntsa e Yehowa du shangun ai ari zinli langai hpra hpe madun tawn ai. Langai ngu na sumla hta Arun gaw shi a dawhkrawng hte Nila hka hpe gayat nga ai. Gayat dat ai hte hka nu na hka ni gaw asai tai mat wa ai. Hka na nga ni si mat ma ai majaw hka nu gaw yat manam nga sai.

Dai hpang e Nila hka nu kaw na ashu ni law wa hkra, Yehowa shabyin dat ai. Shara shagu hkan e shu ni hkrai rai sai. Muk kabaw ai wan htung ni hta mung, muk rin ai n-gawt kaw mung, yup ku hta e mung, shara shagu hta e, ashu ni hkrai hpring nga sai. Ashu chyasi ni hpe, Egutu masha ni sumpum tawn ma ai. Mung ting gaw shu chyayat hte manam hkying nga sai.

ai hpang e, Arun gaw shi a dawhkrawng hte aga hpe bai gayat dat yang, ga nhpu ni gaw, machyi mayam ni byin tai wa ai. Ndai ni gaw kawa chye ai pyen nga ai mahyi mayam kaji ni re. Machyi ari zinli ni gaw, Egutu mung hta du ai masum lang ngu na, ari zinli re.

Dai hpang e byin wa ai ari zinli ni gaw Egutu masha ni hta hkrai hkrum ai. Israela masha ni hta ndu ai. Mali ngu na ari zinli gaw, jinghkam kaba re. Jinghkam ni gaw Egutu masha ni a nta hta ahpung nawng rai kahpoi shang wa ma ai. Manga ngu na ari zinli gaw dusat ni hta byin ai wurum ana re. Egutu masha ni a dumsu, sagu, bainam ni law law si mat sai.

De hpang e Mawshe yan Arun gaw dap nkau mi la nna nbung hta kabai shamawng dat ma ai. Masha ni hte dusat ni hta shakrwi ana byin tai wa ai. Ndai gaw kru lang ngu na ari zinli re.

Dai hpang e Mawshe gaw lamu de lata ladawn dat yang mu achye ai hte sin htu jahkrat dat ai. Egutu mung hta e, ndai daram kaba ai sin laru kaba kalang mi mung garai nhkrum yu ai.

Masat ngu na ari zinli gaw, dinggam-yaw wunawng hpung re. Shawng de dinggam-yaw ndai daram grai nlaw yu ai. Sin kaba na majaw nhten mat ai arai baw shagu hpe sha kau ma ai.

Jahku lang ngu na ari zinli gaw sin mak ai nsin re. Mung ting hta sin mak ai nsin masum ya sin kaup tawn ai. Raitimung Israela masha ni nga ai shara hta gaw, n htoi hpe mu lu ma ai.

Hpang jahtum e Karai Kasang gaw shi a amyu masha ni hpe, chyinghka hkinbawng hta bainam sai, sagu sai chya na matu, htet da ai. Dai hpang e Karai Kasang a lamu kasa Egutu mung ntsa hku nna lai wa na ra ai. Lamu kasa gaw asai hpe mu jang dai nta na masha kadai hpe mung n sat kau ai. Raitimung chyinghka hta asai nkap ai nta e, masha hte dusat kasha alat hpe, Karai Kasang a Lamu kasa gaw sat kau ai. Ndai gaw 10 lang ngu na ari zinli re.

Hpang jahtum na ndai ari zinli du ai hpang Hpara-u gaw Israela masha ni hpe pru wa shangun ai. Karai Kasang a masha ni mung pru wa na matu, jin jin rai nga ma ai. Dai shana jang Egutu mung na pru wa ma ai.