SHANING law law lai mat wa sai. Noa shadang sha ni mung kasha law law lu ma ai. Shanhte a kasha ni mung bai kaba wa nna, kashu kasha law law lu jat ma ai. Kade nna yang ginding aga ntsa hta masha law htam wa ai.

Shanhte kaw na langai mi Noa a kashu Nimrod ngu mying ai wa nga ai. Shi gaw n hkru ai masha langai mi re. Dusat ni hte masha ni hpe hkan sat ai. Kaga masha ni hpe mung up hkang na matu, tinang hkum hpe hkawhkam hku nna, shagrau la ai. Karai Kasang gaw Nimrod hpe n ra sharawng ai.

Dai aten e nga ai shinggyim masha ni yawng gaw aga amyu mi sha shaga ma ai. Nimrod gaw masha ni yawng hpe shara langai mi kaw sha shinggyin tawn mayu ai. Dai shaloi she shi shanhte hpe uphkang lu na re. Dai majaw shi hpa galaw ai hpe chye a ni? Masha ni hpe mare langai mi hte wahpang langai mi hpe gaw shangun ai. Shanhte wut tawng galaw nga ma ai hpe ndai sum la hta yu yu mu.

Ndai zawn wahpang gaw ai hpe Yehowa Karai Kasang n ra sharawng ai. Karai Kasang gaw shinggyim masha ni hpe, ginding aga shara shagu hkan e, pru sa wa nna nga na hpe ra sharawng ai. Raitimung masha ni gaw: ‘sa wa marit! Lamu du hkra tsaw ai wahpang langai mi hte mare kaba langai mi hpe, gaw ga. Shing rai yang anhte gum hkawng na re! nga nna tsun ma ai. Masha ni gaw Karai Kasang hpe shagrau shatsaw na malai, shanhte a amying gum hkawg na hpe ra ma ai.

Dai majaw Karai Kasang gaw, Wahpang shachyaw ai amu hpe jahkring dat ai. Gara hku jahkring dat ai hpe chye a ni? Masha ni aga amyu mi sha shaga nga ai kaw na, akajawng sha aga amyu baw shagu tsun shaga wa hkra shabyin dat ai. Wahpang gaw ai masha ni langai hte langai aga nhkrum hkat masai. Dai majaw shanhte a mare hpe Babela shing nrai Babelon nga nna shamying ai. De a ga lachyum gaw “shanut mat ai” ngu ai re.

Dai rai nna masha ni gaw Babela mare kaw na pru hkawm sa wa ma sai. Aga hkrum ai shada da ahpung mi hte ahpung mi rai nna, ginding aga daw shara shagu hkan e nga sa wa ma ai.