YOSEP gaw shi a myit hkam sha ai lam hpe, na na wa nlu sharang da nu ai. Dai rai nna shi a mayam ni yawng hpe, gawk kaw na pru wa mu, nga ai. Shi a kahpu ni hte shi hkrai sha rai jang, Yosep gaw jahtau hkrap ai. Yosep a kahpu ni kade daram mau mat na hpe, myit yu ga. Shi hpa majaw hkrap ai lam shanhte n chye ma ai majaw re. Dai hpang e shi tsun ai: ‘Ngai gaw Yosep rai nngai; Nye wa gaw asak naw hkrung nga ani?’ ngu wu ai.

Kahpu ni gaw nau mau nna, aga mung n chye shaga mat ma ai. Hkrit ai majaw rai na sai. Raitimung Yosep tsun ai gaw: ‘ngai hpang de sit sa wa marit;’ nga nna tsun yang kahpu ni mung, sit sa wa ma ai. Dai shaloi Yosep tsun ai gaw: ‘Ngai gaw nanhte Egutu mung de dut dat ai, nanhte a kanau Yoaep re;’ ngu wu ai.

Yosep gaw matsan dum ai hte, matut nna tsun ai: ‘Ngai hpe ndai shara de dut dat ai majaw, nanhte a hkum hpe mara hkum shagun mu. Masha a asak hpe hkye la na matu, Karai Kasang gaw ngai hpe Egutu mung de shangun dat sai. Hpara-u gaw ngai hpe ndai mung ting a up hkang madu shatai tawn ai. Ya lawan wa hpang de wa mu. Ndai lam wa tsun dan mu. Ndai yang e sa nna, nga na matu wa tsun dan mu’ nga ai.

Dai hpang e Yosep gaw shi a kahpu ni yawng hpe ahpum nna apup ai. Yosep a kahpu ni sa wa ai hpe Hpara-u na jang, Yosep hpe tsun ai: ‘Gumra leng ni la wa shangun u; shanhte a kawa hte dum nta masha ni hpe woi nna, ndai yang e sa nga u; Egutu mung hta ga sau kaja htum ai shara, ngai shanhte hpe jaw na nngai’, nga nna tsun ai. Hpara-u tsun ai hte maren shanhte shaga sa wa ma ai. Nta dinghku masha mahkra hte Egutu mung de sa wa ai, shi a kawa hte Yosep hkrum nga ai hpe ndai sumla hta mu lu ai.

Yaku a dinghku grai kaba wa ai. Egutu mung de htawt sa wa ai shaloi, Yaku a kashu kasha ni yawng 70 rai ma ai. Shanhte a madu jan ni hte myam mung law law lawm sa wa ma ai. Dai masha ni mahkra gaw Egutu mung hta nga mat masai. Shanhte hpe Israela masha ni nga ma ai. Karai Kasang gaw Yaku a amying hpe Israela nga nna, galai kau ra ai majaw re. Israela masha ni gaw Karai Kasang a matu, ahkyak kaba ai amyu masha ni tai wa ma ai. Dai lam hpang na daw hta mu lu na re.