EGUTU mung kaw na Mawshe rawt hprawng nga ai hpe yu yu mu. Shi hpe hkan shachyut nga ai masha ni hpe mu a ni? Shanhte gaw Mawshe hpe hpa majaw sat mayu ma ni? Anhte yu yu ga .

Egutu hkawhkam Hpara-u a htingnu kaw e, Mawshe kaba wa ai. Mawshe gaw atsam marai kaba ai hte, hpaji rawng ai. Mawshe gaw Egutu masha nre ai lam hpe shi chye nga ai. Shi a kanu kawa majing ni gaw Israela mayam ni rai ma ai hpe shi chye ai.

Mawshe a asak 40 ning du ai lani mi hta, shi a amyu ni hpang de sa yu na nga nna myit ai. Shanhte grai zingri hkrum nga ma ai. Israela masha langai mi hpe Egutu masha wa adup nga ai hpe Mawshe mu ai. Mawshe gaw grup yin e mada yu yang, kadai hpe mung nmu jang, Egutu masha wa hpe adup sat kau ai. Dai si mang hpe mung zaibru hta lup kau ai.

Hpang shani e Mawshe gaw shi a amyu ni hpe bai sa yu ai. Shanhte hpe mayam tai ai kaw nna hkye la lu na zawn nawn ai. Raitimung Israela masha lahkawng gaw kamu chyi hkat nga ma ai hpe shi sa mu ai. Shut ai wa hpe Mawshe tsun ai: ‘Na a hpu nau wa hpe hpa rai adup nga a ta?’ nga nna tsun ai.

Dai wa gaw: ‘Anhte hpe du hte tara agyi galaw na matu, nang hpe gadai wa san tawn da ani? Egutu masha wa hpe sat kau ai zawn ngai hpe mung sat kau na kun?’ nga nna tsun ai.

Ya Mawshe gaw hkrit wa ai. Egutu masha wa hpe sat kau ai lam masha ni mu ma sai nga nna Mawshe chye sai. Dai lam hpe Hpara-u mung na sai. Dai majaw Mawshe hpe sat kau na matu, masha ni hpe shangun dat ai. Dai majaw Mawshe gaw Egutu mung kaw na rawt hprawng mat wa ai re.

Mawshe gaw Egutu mung kaw nna, grai tsan ai, Midian mung de sa wa ai. Dai mung kaw e, Yehtru a kun dinghku masha ni hte, sa hkrum ai. Shi a shayi sha Tsihpura ngu ai wa hte hkrungran la ai. Mawshe gaw sagu rem ai wa tai nna, Yehtru a sagu ni hpe rem ai. Midiam mung hta, Mawshe 40 ning nga ai. Ya shi a asak 80 ning rai wa sai. Dai hpang lani mi hta e, Mawshe gaw, Yehtru a sagu ni hpe rem nga yang, shi a apart mahkra hpe galai kau na mau hpa lam langai mi byin wa ai hpe mu ai. Hpa mau hpa lam hpe mu ai kun? Yu yu ga.