DINA gaw gadai ni kaw sa hkawm nga ai hpe, mu ani? Hkanan mung kaw e, nga ai numsha ni hpang de sa chyai ai. Ndai zawn sa chyai ai hpe, shi a kawa Yaku myit pyaw na zawn nawn ani? Ndai ga san ni a ga mahtai hpe, chye lu hkra Hknan mung na num sha ni hpe, Abraham hte Isak gara hku nna, myit la ai hpe bai myit dum yu ga.

Abraham gaw shi a kasha Isak hpe, Hknan mung na numsha ni hte, hkungran la na matu ra ani? Isak hte Rebeka shan a kasha Yaku hpe, Hkanan mung na numsha ni hte, hkungran la shangun mayu ani? Nkam la shangun mayu ai. Hpa majaw rai kun?

Hkanan mung na masha ni gaw, shut ai karai ni hpe nawku ma ai majaw re. Madu jan madu wa hku na mung, kanawn mai ai masha ni n rai ma ai. Dai majaw Yaku gaw shi a shayi sha hpe, Hkanan mung na numsha ni hte, kanawn manang galaw na n ra ai.

Myit tawn da ai hte, teng tup sha Dina jam jau hkrum sai. Ndai sum la hta Dina hpe, azi yu nga ai, Hkanan la kasha hpe mu ani? Shi a amying gaw Shehkem re. Lani mi hta Dina sa hkawm chyai ai shaloi, Shehkem gaw dun la nna, adip arip rai nna, woi yup kau ai. Ndai zawn galaw ai gaw shut ai. Hkungran la hte num chyu sha, rau mai yup ai. Dina hpe Shehkem gaw ndai zawn galaw ai majaw, ruyak ai lam kahtap nna, law law bai byin wa sai.

Ndai zawn byin wa ai hpe, Dina a kahpu ni na jang, grai sin dawng kahtet ma ai. Shanhte kaw na Simun hte Lewi yan gaw, grai masin pawt nna, nhtu langai hpra lang nna, mare hpe akajawng sha shang kasat ma ai.Shanhte hte shanhte a kanau ni gaw, Shehkam hte, ngam nga ai la kasha yawng hpe sat kau ma ai. Kasha ni gaw ning re ai nhkru n kaja ai, amu hpe galaw ma ai majaw, Yaku gaw grai masin pawt ai.

Ndai ruyak ai lam yawng gaw gara hku nna, hpang wa ani? Karai Kasang a tara hpe n hkan ai masha ni hte, Dina gaw jinghku hku ai hpang kaw nna, hpang wa ai re. Ndai zawn re ai masha ni hte, anhte jinghku n kam hku ga ai. Teng ai n rai ni?