NDAI la kasha hpe yu yu mu. Shi gaw grai myit yawn ai hte, myit kaji nga ai. Ndai wa gaw Yosep re. Shi a kahpu ni gaw, Egutu mung de sa ai masha ni hpe, ya sha dut dat ma ai. Egutu mung kaw e, Yosep gaw mayam wa tai na sai. Shi a kahpu ni gaw, ning re n hkru ai amu hpe, hpa majaw galaw ma ai kun? Shanhte Yosep hpe manawn ma ai majaw re.

Shanhte a kawa Yaku gaw shi hpe grai tsaw ra ai. Shi hpe myi man shapa ai hku nna, tsawm la ai palawng galu langai mi chywi ya ai. Yaku gaw Yosep a ntsa e tsaw ra myit madun ai hpe, kahpu 10 ni mu ai shaloi, Yosep a ntsa e, manawn ai myit, nju ndawng ai myit rawng wa ma ai. Shi hpe nju ai lam kaga naw nga ai.

Yosep gaw yup mang lahkawng hpe mu ai. Yup mang lahkawng yan hta e, shi a kahpu ni gaw, shi hpe, nawku ma ai lam lawm ai. Yosep gaw shi a kahpu ni hpe, ndai yup mang a lam hkai dan ai shaloi, shi hpe grau nna, nju wa ma ai.

Lani mi hta e, Yosep kahpu ni gaw, shanhte a kawa Yaku a sagu ni hpe rem nga ma ai shaloi, shanhte kaning rai nna, nga nga ma ai lam, chye na matu Yosep hpe sa yu shangun ai. Yosep a kahpu ni gaw, Yosep sa wa ai hpe mu jang, n kau mi gaw: ‘shi hpe sat kau ga! nga nna , tsun ma ai. Raitimung kahpu ba Rubin gaw: ‘Nanhte ndai zawn hkum galaw mu!’ nga ai. Shanhte gaw Yosep hpe nsat kau ai sha, hkun hkraw ai hka htung hta jahkrat bang tawn ma ai. Dai hpang shi hpe ganing di yang mai na lam, shanhte dung nna, bawng hkat ma ai.

Dai aten e Ishmaela amyu masha ni, sa wa nga ma ai. Yuda gaw shi hte kawa bung nna, kanu nbung ai kanau ni hpe tsun ai gaw; ‘Yosep hpe Ishmaela masha ni hpe dut ya ga nga ai’. Shi tsun ai hte maren Yosep hpe, gumhpraw lap 20 hte dut dat ma ai. Matsan dum chye ai myit a rawng ma ai.

Kahpu ni gaw shanhte a kawa hpe gara hku wa tsun ma ai kun? Shanhte gaw bainam langai mi hpe sat nna, Yosep a palawng tsawm hpe bainam sai hta, kahtap kahtap di nna, dip tsing ma ai. Dai hpang palawng hpe shanhte a kawa Yaku hpang de la wa nna: ‘Anhte ndai palawng hpe mu ga ai; Yosep a hpung palawng re ai kun? Yu yu u;’ nga nna, tsun ma ai.

Yosep a palawng re ai lam Yaku chye yu nu ai. ‘Yosep hpe dusat matse langai mi e, kawa sat kau nu ai;’nga nna, hkrap ai. Yosep a kahpu ni gaw, kawa dai zawn myit la na hku, galaw tawn ma ai. Yaku gaw grai yawn kau ai. Nhtoi law law hkrap kau ai. Raitimung Yosep n si ai. Shi du sa ai shara hta, shi gara hku byin ai hpe, anhte yu yu ga.