NDAI masha wa gaw shi a ginsum hta hpa makoi lup ai kun yu dat mu! Tsawm la ai palawng langai, ja hkaw yan mi, gumhpraw nkau mi re. Ndai ni hpe Yerihko mare kaw na la tawn ai. Yerihko mare kaw na arung arai ni hpe gara hku galaw na rai kun? Nang naw matsing a ni?

Dai arai ni hpe jahten kau ra ai. Aja, gumhpraw hpe chyawm gaw, Yehowa a nawku sum na sutdek hta bang ra ai. Dai majaw ndai masha ni gaw Karai Kasang a ga hpe n madat ma ai. Karai Kasang hte seng ai arai hpe lagu la nga ma ai. Ndai masha a amying gaw Ahkan re. Shi a makau na masha ni gaw shi a dum nta masha ni rai ma ai. Hpa byin ai hpe yu yu ga.

Ndai arai ni hpe ahkan lagu la ai hpang, Yawshu gaw masha nkau mi shangun dat nna, Ai mare hpe sa gasat shangun ai. Raitimung shanhte majan sum ma ai. Nkau mi sa si ma ai. Ngam ai ni mung rawt hprawng ma ai. Yawshu gaw grai yawn nna myi mam hpe ga de dagup nna Yehowa kaw akyu hpyi wu ai: ‘Madu gaw anhte hpe ndai zawn hpa majaw shabyin shangun a ta?’ nga ai.

Yehowa mung: ‘Rawt mu! Israela masha ni shut hpyit masai. Jahten kau na arai, Yehowa a sutdek hta bang na arai nkau mi hpe shanhte lagu la ma ai. Tsawm la ai palawng galu langai mi hpe lagu la nna makoi tawn ai. Dai arai hpe lagu la ai ni hte dai arai hpe nang njahten kau ding sa gaw ngai nanhte hpe shaman chyeju njaw lu ai,’ nga nna tsun ai. Nshawp ai masha wa gaw kadai re ai hpe Yehowa gaw Yawshu hpe madun dan na nga ai.

Dai majaw Yawshu gaw masha yawng hpe jahpawng tawn da ai. Yehowa mung dai nshawp ai Ahkan hpe madun dan ai. Ahkan gaw: ‘Ngai shut hpyit kau ni ai; Grai tsawm la ai palawng galu langai mi, ja hkaw yan mi, gumhpraw pa nkau mi mu nna ngai dai hpe grai ra ai majaw la kau ni ai. Dai arai ni hpe nye a ginsum kaw e lup tawn ai hpe mu lu na re,’ nga nna tsun ai.

Dai arai ni hpe mu tam jang Yawshu hpang de la wa ma ai, shaloi shi gaw Ahkan hpe tsun ai. ‘Anhte a ntsa e ndai ruyak tsim yam ni byin wa hkra nang hpa majaw galaw dat a ni? Ya Yehowa gaw na a ntsa e, ruyak tsim yam du shangun na re,’ nga ai. Dai rai nna masha yawng gaw Ahkan hte shi a dum nta masha yawng hpe nlung hte kabai sat kau ma ai. Anhte hte nseng ai arai ni hpe galoi mung nmai la ai lam madum dan nga ai n re a ni?

Dai hpang e Israela masha ni Ai mare hpe kalang bai sa gasat ma ai shaloi, Yehowa gaw shi a amyu masha ni hpe karum ya ai. Dai majaw shanhte majan awng dang lu ma ai.