YAWSHU hpe yu dat mu. ‘Ajan e hkring u!’ nga nna tsun nga ai. Kaja wa ajan mung hkring mat ai. Lamu kaang e lani mi tup hkring nga ai. Ndai zawn byin hkra Yehowa galaw dat ai. Yawshu gaw, nhtoi htoi nga na hpe, hpa majaw ra ai kun? Yu yu ga.

Hkanan mung na hkawhkam manga gaw Gibeon mare masha ni hpe sa gasat ma ai. Dai shaloi Gibeon masha ni gaw masha langai mi shangun nna, Yawshu hpang de, karum sa hpyi ma ai. ‘Anhte hpe alawan sa karum la marit; anhte hpe sa hkye la rit; bum ga e nga ai hkawhkam ni yawng anhte hpe sa gasat nga masai,’ nga nna tsun ai.

Alawan sha Yawshu hte shi a hpyen masha ni rawt sa wa ma ai. Lana mi tup lam hkawm sa ma ai. Gibeon mare kaw du jang, hkawhkam manga a hpyen ma ni hkrit nna hprawng mat ma ai. Dai shaloi Yehowa gaw sumsing lamu de na, sin kaba htu jahkrat dat ai. Dai rai nna Yawshu hte shi a hpyen ma ni sat kau ai hta, sin kaba adup hkra nna si ai ni grau law ma ai.

Kade nna yang jan shang mat wa sana re ai hpe Yawshu mu ai. Nsin sin mat jang hkawhkam manga a hpyen ni hprawng lawt mat wa na tsang ai. Dai majaw Yawshu gaw Yehowa kaw akyu hpyi nna: ajan e hkring u! nga nna tsun ai. Ajan htoi nga ai majaw Israela masha ni majan hpe awng dang hkra gasat lu ma ai.

Karai Kasang a masha ni hpe nju ndawng ai nhkru ai hkawhkam ni Hkanan mung hta law law naw ngam ai. Yawshu hte shi a hpyen ni gaw, hkawhkam 31 hpe gasat dang kau lu na matu, kru ning na mat ai. Dai hpang e Yawshu gaw lamu ga garai nlu ai amyu lakung ni hpe karan ya ai.

Shaning law law lai mat wa sai. Yawshu mung asak 110 ning hta si mat wa sai. Yawshu hte shi a manang ni naw hkrung nga ai aten hta, masha ni Yehowa a ga hpe madat ma ai. Raitimung ndai myit su ai masha ni si mat wa ai hpang masha ni gaw nshawp nkap ai amu hpe galaw wa ma ai. Ruyak jam jau ni mung hkrum ma ai. Dai aten e Karai Kasang a karum shingtau ai hpe ra nga masai.