HKANAN mung e nga ai mare law law ni Israela masha ni hpe hkap gasat na matu, jin jin lajang nga ma ai. Shanhte awng dang lu na zawn myit nawn nga ma ai. Raitimung makau e nga ai Gibeon mare masha ni gaw dai zawn n myit la ma ai. Israela masha ni hpe Karai Kasang karum nga ai hpe kam ma ai. Karai Kasang hte hpyen nkam kasat ma ai. Dai majaw Gibeon mare masha ni gaw, kaning di na ma ai hpe chye a ni?

Grai tsan ai mungdan hta e nga ai masha ni zawn galaw ma ai. Masha nkau mi gaw hpun palawng shaje chyamya hte hkyepdin dingsa din nna sa wa ma ai. Lawze daw ni hta nhpye dingsa ni hte, muk chyatsu chyahkraw ni htaw nna, sa wa ma ai. Yawshu kaw du jang; Anhte gaw nanhte a kaba htum ai Yehowa a lam na lu ga ai majaw, sumtsan mung na du sa wa ga ai. Egutu mung e nanhte a matu galaw ai lam yawng mayawng hpe na lu saga ai. Dai majaw anhte a ningbaw ni gaw, lusha jarit hte nanhte kaw sa wa nna: “Anhte gaw nanhte a mayam ni rai ga ai; anhte hpe hpyen n-gasat na nga ai ga shaka hpe tawn mu;” nga nna tsun shangun dat ma ai; anhte a lusha hte hpun palawng hpe she yu yu mu; sumtsan mung na sa wa ga ai majaw, shaje chyamya she rai mat saga ai; muk tawng hpe mung yu yu mu; tsu ai hte hkraw mat sai, nga nna sa tsun ma ai.

Yawshu hte kaga ningbaw ni gaw, Gibeon masha ni tsun ai ga hpe kam mat ma ai. Dai majaw shanhte hpe hpyen n-gasat na ga ai nga ai ga sadi hpe jaw dat ai. Raitimung masum ya na hpang e, Gibeon masha ni gaw makau mayang e nga ai masha ni rai ma ai lam hpe chye kau ma ai.

‘Sumtsan mung dan kaw na sa wa ga ai, nga nna nanhte hpa rai tsun ma ni?’ nga nna Yawshu gaw shanhte hpe san ai.

Gibeon mare masha ni gaw: ‘Nanhte a Karai Kasang Yehowa gaw nanhte hpe Hkanan mung mahkra jaw na nga ai ga sadi a majaw, tsun ga ai re; anhte hpe nanhte sat kau na hpe hkrit ai majaw tsun ga ai,’ nga nna bai htan ma ai. Raitimung Israela masha ni gaw ga sadi hte maren, Gibeon masha ni hpe n sat kau ma ai. Shanhte hpe sat kau na malai mayam shatai la ma ai.

Israela masha ni hte Gibeon masha ni, jinghku hku mat ma ai hpe Yerusalem hkawhkam wa gaw masin pawt ai. Dai majaw kaga hkawhkam mali hpe tsun ai: ‘Gebion mare masha ni hpe gasat na matu, ngai hpe hpyen n-gun karum la mi,’ nga ai. Dai rai nna hkawhkam manga gaw sa gasat ma ai. Gibeon mare masha ni gaw, Israela masha ni hte, jinghku hku ai lam gaw, hpaji rawng ai lam re, ngu nna tsun lu na kun? Ya dai hkawhkam ni gaw, Gebion mare masha ni hpe sa gasat masai. Anhte yu yu ga.