HPA byin mat ai hpe mu a ni? Ndai lasha gaw shi a sagu kasha hpe tsap a n-gup kaw na hkye la ai. Atsap kaba gaw sagu kasha hpe, dun sha kau na matu hkyen nga ai. Raitimung ndai lasha hkan shachyut nna, sagu hpe tsap a n-gup na hkye la ai. Atsap nhtang htim wa ai shaloi, hkap magra la nna gayat sat kau ai. Kalang mi hta mung sagu kasha hpe hkanghkyi a n-gup na hkye la ai. Kaja magrau grang ai shabrang ma nre a ni? Shi gaw kadai wa re ai hpe chye a ni?

Ndai brang ram kasha gaw Dawi re. Shi gaw Betlehem mare kaw e nga ai. Shi a kaji dwi gaw Obed re. Obed gaw Boza hte Ruhta a shadang sha re. Shanhte hpe matsing ma ni? Dawi a kawa gaw Yese re. Dawi gaw shi kawa a sagu hpe rem ya ai. Yehowa gaw Shawlu hpe hkawhkam shatai ai hpang 10 ning na jang Dawi shangai wa ai.

Aten du jang Yehowa gaw Samuela hpe: ‘Manu dan ai asau nkau mi hpe la nna Betleham mare kaw e nga ai, Yese a dinghku hta e sa u; shi a, shadang sha langai mi hpe ngai hkawhkam shatai na matu, lata da se ai,’ nga nna tsun ai. Samuela mung Yese a shadang sha Eliaba hpe mu jang: ‘Yehowa lata da ai masha gaw ndai wa rai na re,’ nga nna myit la ai. Raitimung Yehowa gaw: ‘Shi kade daram galu kaba ai, hpraw nsam tsawm ai hpe hkum yu u; ngai shi hpe hkawhkam tai na matu lata da ai nrai,’ nga nna Samuela hpe tsun ai.

Dai majaw Yese gaw shi a shadang sha Abinadab hpe shaga wa nhtawm, Samuela hpe madun dan ai. Raitimung Samuela gaw ‘Shi hpe mung hkawhkam galaw na matu Yehowa san da ai nrai,’ nga nna bai tsun ai. Dai hpang e Yese gaw shi a shadang sha Shama hpe shaga wa ai. ‘Rai n re ai, shi hpe mung Yehowa nla ai,’ nga nna bai tsun ai. Yese gaw shi a shadang sha sanit hpe shaga sa wa timung, shanhte kaw na langai mi hpe mung Yehowa n lata ai. Bai Samuela gaw ‘na a shadang sha yawng ndai hte sha rai a ni?’ nga nna san ai.

‘Hpungdim shadoi langai mi naw nga ai,’ nga nna Yese htang ai. ‘Raitimung shi gaw shinggan e sagu rem nga ai,’ nga nna tsun ai. Shingrai dawi hpe shaga wa ma yang tsawm la ai wa re ai hpe Samuela mu dat ai. ‘Ndai wa re, shi a ntsa e asau jaw bun u,’ nga nna Yehowa tsun ai. Samuela mung tsun ai hte maren galaw ai. Israela masha ni a ntsa e Dawi gaw hkawhkam galaw na aten hpang e du wa na re.