NDAI gaw myihtoi Esaia hpe, Karai Kasang madun dan ai Hparadisu langai mi a sumla re. Esaia gaw Yona a hpang e asak hkrung nga ai masha langai mi re.

Hparadisu a lachyum gaw, “sun” shing nrai “nampan sun” ngu ai re. Ndai laika buk kaw e mu lai wa sai, sumla langai mi hpe n myit dum dat a ni? Adam hte Ewa a matu Yehowa galaw ya ai, tsawm la ai sun langai mi hte nbung a ni? Raitimung mungkan ga ting hta e, Hparadisu zawn bai tai wa na kun?

Karai Kasang a amyu masha ni a matu du na ra ai, Hparadisu ningnan a lam hpe Yehowa gaw myihtoi Esaia hpe ka shangun ai. Shi tsun ai gaw: ‘chyahkyawn hte sagu kasha ni ngwi pyaw simsa ai hte rau sha shanu nga lu na re. Dumsu kasha hte hkanghkyi hkalung ni rau ushat sha na ma ai. Ma kaji ni gaw shanhte hpe dun woi na mara ai. Atuk rawng ai lapu ni a makau e, ma kasha ni ginsup yang pyi hpa nbyin ai,’ nga nna ka da ai.

‘Ndai zawn galoi mung nmai byin ai’ nga nna masha law law tsun na ma ai. ‘Ginding aga ntsa e, ruyak tsin yam galoi mung nga nga ga ai. Ndai zwn jam jau ai lam galoi mung a nga nga na re,’ nga nna tsun na ma ai.Raitimung myit yu u: Adam hte Ewa nga na matu Karai Kasang gaw kaning re dum nta galaw ya ai kun?

Adam hte Ewa hpe Karai Kasang gaw Edin sun kaw e, nga shangun ai. Karai Kasang a ga hpe shan n madat ma ai majaw sha shan a tsawm la ai dum nta hpe sum mat ma ai. Gumgai dingla wa ai hte si hkrung si htan lam nga wa ai. Adam hte Ewa sum kau ai hpe, Karai Kasang gaw, shi hpe tsaw ra ai masha ni hpe jaw na nga nna ga sadi jaw tawn da ai.

Du na ra ai Hparadisu ningnan hta, zingri zingrat ai, jahten sharun ai, hpa mung nnga sai. Hkum sup ai ngwi pyaw simsa lam nga na ra ai. Masha yawng hkam kaja ai hte ngwi ngwi pyaw pyaw nga lu na re. Shawng ningnan e, Karai Kasang ra sharawng ai hte maren, byin tai wa na re. Dai zawn byin tai wa hkra Karai Kasang gara hku galaw na, ngu ai hpe hpang e anhte mu lu na re.