HKAWHKAM Nebuhkadneza gaw, hpaji chye htum ai Israela masha ni hpe Babelon de rim woi mat wa ai. Bai nna hpraw nsam tsawm htum ai hte chye chyang ai nyan rawng dik ai lasha ni hpe lata la ai. Shanhte kaw na lasha mali hpe ndai sumla hta mu lu ai. Langai mi gaw Daniela re. Kaga masum hpe, Shadrak, Meshak, Abed-nego nga nna Babelon ni shamying ma ai.

Nebuhkadneza gaw ndai ram ma ni hpe hkawhkam htingnu kaw e, amu gun na matu hpaji sharin shakat na matu, yaw shada tawn ai. Masum ning hpaji sharin shakat ngut ai hpang, dai ram ma ni hta na nyan kaja dik htum ai masha hpe lata la nna, shi a hkawhkam magam amu, hparan karum lawm na matu re. Hpaji sharin shakat nga ai aten laman hta, ndai ram ma ni hkam kaja na hte n-gun ja ai hpe hkawhkam wa mu mayu ai. Dai majaw shi hte hkawhkam htingnu kaw e nga ai masha ni, sha ai tsabyi hte lusha kaja jaw sha na matu shi a mayam ni hpe hkang da ai.

Ram ma Daniela hpe yu dat mu. Nebuhkadneza a mayam ningbaw Ashpena hpe shi hpa tsun nga ai hpe chye a ni? Hkawhkam wa a sha ku na mu sau ai lusha hpe nsha mayu ai lam tsun nga ai. Raitimung Ashpena gaw myit tsang ai. ‘Nanhte kaning re ai lu sha hpe sha na matu hkawhkam wa myit daw dan da sai. Nanhte gaw kaga ram ma ni daram n hkam ja yang hkawhkam wa gaw ngai hpe sat kau na re,’ nga nna tsun ai.

Dai rai nna Daniela gaw shi hte shi a manang masum hpe yu lajang na matu Ashpena san tawn da ai agyi wa kaw sa ai. ‘Anhte hpe nhtoi 10 ya daram chyam ya u; sha na matu namlaw namlap hte lu na matu ntsin sha jaw rit; Bai nna hkawhkam wa a lu sha sha ai kaga ram ma ni hte, anhte hpe shadawn yu nna, kadai ni mahtang grau nna hkam ja ai hpe yu u,’ nga nna tsun dat ai.

Up hkang agyi wa gaw myit hkrum ai. Dai rai nna nhtoi 10 ya hpang e, Daniela hte shi a manang masum gaw kaga ram ma ni hta grau nna hkam kaja ai. Dai majaw up hkang agyi wa gaw hkawhkam wa a lusha malai namlaw namlap hpe matut nna sha na matu ahkang jaw dat ai.

Masum ning na ai hpang ram ma yawng hpe Nebuhkadneza a man e jashawn ai. Shanhte yawng hte aga shaga chyam ngut ai hpang, Daniela hte shi a manang masum gaw chye chyang ai nyan rawng dik htum rai ma ai hpe hkawhkam wa chye kau ai. Dai majaw hkawhkam htingnu hta amu gun hpai na matu lata la ai. Hkawhkam wa gaw, Daniela, Shadrak, Meshak, Abed-nego ni hpe yak ai mang hkang ni hta, ga san ni hpe san yu shagu shi a hkinjawng ni hte hpaji rawng ai ni hta htam 10 grau chye ma ai hpe mu ai.