SAMUELA gaw masha langai mi a baw ntsa hta e sau jaw bun nga ai hpe yu dat mu. Masha langai mi hpe hkawhkam aya dang sai nga jang ndai zawn galaw ai htung nga ai. Yehowa gaw Shawlu a baw hta sau jaw bun na matu Samuela hpe tsun ai. Ndai sau gaw manam pyaw ai hte lak lai ai sau re.

Shawlu gaw shi hkawhkam ntai ging ai nga nna myit la ai. ‘Ngai gaw Ben-yamin lakung na Israela amyu hta kaji htum ai amyu re, ngai hkawhkam tai wa na nga nna nang hpa majaw tsun ata?’ nga nna Samuela hpe tsun ai. Shi gumrawng gumra myit nrawng ai majaw, Yehowa gaw Shawlu hpe ra sharawng ai. Dai majaw shi hpe hkawhkam aya dang ai.

Kaja wa nga yang Shawlu gaw matsan ai masha nre ai. Lu su ai dinghku kaw na re. Bai nna hkum hkrang kalu kaba ai hte hpraw nsam mung tsawm la ai. Israela mung dan kaw na masha shagu hta, pe langai mi grau tsaw ai. Kagat yang grai chyang ai hte n-gun lapyin mung rawng ai. Shawlu hpe hkawhkam sharawt ai hpe mung masha ni kabu ma ai. ‘Hkawhkam wa asak kalu u ga,’ nga nna jahtau ma ai.

Israela masha ni a hpyen ni mung shawng na hte maren n-gun ja ma ai. Israela masha ni hpe naw zing ri shatsang ma ai. Shawlu hkawhkam tai ai kade nna yang, Amon masha ni gaw Israela masha ni hpe sa gasat ma ai. Raitimung Shawlu gaw hpyen hpung kaba lahkawn la nna gasat ai majaw Amon masha ni a ntsa e, awng dang ma ai. Dai majaw Shawlu hkawhkam tai ai hpe masha ni grai kabu ma ai.

Shaning na na Shawlu mung Israela masha ni hpe woi awn nna, hpyen ni a ntsa e, law law awng dang lu ai. Shawlu gaw Yonahtan ngu ai magrau grang ai shadang sha langai mi mung lu ai. Yonahtan mung Israela masha ni majan awng na matu, karum ai. Hpilisti masha ni gaw Israela masha ni a nhkru dik ai gumlau hpyen naw re. Lani mi hta e Israela masha ni hpe gasat na matu, Hpilisti hpyen ni ahkying amun sa wa ma ai.

Samuela gaw Shawlu hpe htet dat ai. Ngai sa wa nna Yehowa hpe shagu hkungga nawng jaw ai aten du hkra la u, nga ai. Raitimung Samuela gaw hpang hkrat nna sa wa ai. Shawlu gaw Hpilisti masha ni majan gasat hpang wa na hpe hkrit tsang ai majaw shi nan sa nna, shagu hkungga nawng ya ai. Samuela du wa ai shaloi, nang aga n madat ai, nga nna Shawlu hpe tsun ai. ‘Israela masha ni hpe up-hkang na matu, kaga masha wa hpe Yehowa gaw hkawhkam aya dang ya sai’ nga nna Samuela tsun ai.

Dai hpang e kalang mi Shawlu gaw aga bai n madat ai. Dai majaw Samuela gaw: ‘Yehowa hpe kaja htum ai shagu hkungga nawng jaw na hta, aga hpe madat mara na gaw grau nna kaja nga ai. Yehowa a ga nang n madat ai majaw, Yehowa mung nang hpe Israela hkawhkam n shatai sai,’ nga nna tsun ai.

Ndai lam hta na anhte ni kasi kaja langai mi yu lu ai. Yehowa a ga hpe galoi mung madat mara ai gaw, kade daram ahkyak nga ai hpe madun nga ai. Bai nna Shawlu zawn kaja ai masha langai mi nhkru ai masha bai mai tai wa ai, ngu ai lam hpe mung madun nga ai. Anhte galoi mung nhkru ai masha nkam galaw ga ai n re a ni?