NANHTE si mat wa ai hpang, asak bai hkrung wa yang, nanhte a kanu a myit hta gara hku hkam sha na kun? Grai kabu na re. Raitimung si mat wa ai masha langai mi asak bai hkrung wa lu na kun? Moi shawng de byin yu a ni?

Ndai sumla kaw na masha kaba hte la kasha hpe yu dat u. Ndai masha kaba gaw myihtoi Elia re. Anum gaw Zarephta mare na gaida jan rai nna, la sha gaw shi a shadang sha re. Lani mi hta ndai la kasha gaw machyi wa ai. Grau machyi kaba sawng wa nna hpang jahtum e la sha si mat wa ai. Dai shaloi Elia gaw anum wa hpe tsun ai: ‘Na a n sha hpe jaw rit,’ nga ai.

Elia gaw ama hpe ntsa htap de pawn wa nna yup ku ntsa e, kaleng tawn dat ai. Dai hpang: ‘O Yehowa ama bai hkrung wa hkra galaw ya rit,’nga nna akyu hpyi ai. Dai shaloi ama gaw asak bai hkrung wa ai. Dai hpang e Elia gaw ama hpe lawu htap de woi yu wa ai. Bai nna dai anum hpe tsun ai: ‘Na a n sha asak bai hkrung wa sai,’ nga ai. Dai shaloi shi a kanu grai kabu kau ai.

Yehowa a ahkyak ai kaga myihtoi langai mi gaw Elisha re. Shi gaw Elia a karum shingtau wa re. Raitimung aten du jang shi hpe mung lamik kumla amyu myu madun dan lu na matu Yehowa asung jashawn ai. Lani mi hta Elisha gaw Shunem mare de sa wa yang shi hpe atsawm sha hkap galaw daw ai, num langai mi hte hkrum ai. Hpang e ndai anum hta shadang sha langai mi shaprat wa ai.

Ama kasha ram ram kaba wa ai hpang, lahpawt mi hta e, hkauna galaw nga ai shi a kawa kaw sa wa ai. Akajawng sha ama gaw: ‘Baw machyi ai’ nga nna jahtau dat ai. Ama hpe nta de woi wa ai hpang shi si mat ai. Shi a kanu gaw grai yawn ai. Elisha hpe alawan sha sa shaga ai.

Elisha du wa ai shaloi ama kasha si taw nga ai gawk kata de shang sa wa ai. Yehowa hpe akyu hpyi nna ama kasha a ntsa e, shi a hkum hpe dagup dat ai. Kade nna yang ama a hkum lum wa nna, ama gaw sanit lang kahti dat ai. Ama a kanu gawk kata de shang wa ai shaloi ama asak bai hkrung wa sai hpe mu dat yang kade daram kabu na ahka.

Masha law law si mat wa masai. Shanhte a nta masha ni, jinghku ni mung grai yawn hkyen hkrum masai. Anhte kaw e si ai ni hpe asak bai jahkrung ya lu ai atsam nlu ga ai. Raitimung Yehowa galaw ya lu ai. Hpang na daw ni hta e, Masha sen wan ni hpe asak bai hkrung wa hkra gara hku nna galaw na ngu ai hpe anhte sharin la lu na re.