YEHOWA a nawku htingnu gaw gap na matu, Dawi rai n si yang Karai Kasang a yaw shatawng shada da ai lam Shawlumon hpe jaw tawn ai. Shawlumon uphkang ai mali ning hta nawku htingnu hpe gaw hpang ma ai. Sanit ning chyen hta ngut ma ai. Nawku htingnu gaw gap ai shaloi, masha ni ahkying law law amu galaw ma ai. Nawku htingnu gaw gap yang gumhpraw law law hkrat ai. Dai hta e aja hte gumhpraw law law asung jashawn ai majaw re.

Nawku htingnu hta gawk madung lahkawng nga ai. Nawku sum zawn re. Raitimung ndai gawk ni gaw nawku sum na gawk ni hta, htam lahkawng grau kaba ai. Shawlumon gaw nawku htingnu na kata gawk kaw e, gashaka sumpu hpe bang da ai. Nawku sum hta na ngam ai arung arai ni hpe mung nawku htingnu na kaga gawk hta bang da ai.

Nawku htingnu gaw ngut ai shaloi, htingnu ap nawng poi kaba galaw ma ai. Sumla kaw e mu ai hte maren Shalumon gaw, nawku htingnu a shawng e, hput di nna akyu hpyi nga ai. ‘Sumsing lamu mahkra ni pyi nang hpe rawng da lu ai nrai. Dai rai yang ndai nawku htingnu hta madu kaning rai rawng lu na ahka. Raitimung o, madu e ndai nawku htingnu na, na a amyu masha ni akyu hpyi ai ga hpe chyeju hte madat ya e law,’ nga nna hpyi ai.

Shawlumon akyu hpyi ngut ai hte, sumsing lamu de na wan hkrat wa ai. Nawng tawn da ai dusat shagu hkungga ni hpe hkru mat ai. Yehowa kaw na du ai nhtoi gaw nawku htingnu hta e hpring mat ai. Ndai gaw Yehowa madat ya nga ai lam kumla madun nga ai. Nawku htingnu hte Shawlumon akyu hpyi ai ga hpe ra sharawng ya nga ai lam hpe madun nga ai. Ya gaw nawku sum a malai, nawku htingnu hta masha ni a nawku ai shara tai wa sai.

Shawlumon mung shaning na na hpaji rawng ai hte uphkang ai. Masha ni mung grai pyaw ma ai. Raitimung Shawlumon gaw Yehowa hpe n nawku ai maigan num law law hpe la ai. Shanhte kaw na langai mi gawngngu sumla nawku ma ai hpe mu a ni? Hpang jahtum e Shawlumon mung kaga karai ni hpe nawku wa hkra, shi a madu jan ni e galaw ma ai. Shawlumon ndai zawn galaw yang hpa byin wa ai hpe chye a ni? Mung masha ni a ntsa e matsan dum ai myit hte n-up hkang sai. Gum shen wa ai. Masha ni mung n pyaw ma ai.

Dai majaw Yehowa gaw Shawlumon hpe masin pawt ai: ‘Nang kaw na mungdan hpe shaw la kau nna, kaga wa hpe jaw sana,’ nga ai. Na a prat hta gaw ngai n galaw ai. Raitimung na a kasha up hkang ai aten hta galaw na nngai. Raitimung na kasha kaw na mung masha yawng hpe ngai nla ai,’ nga nna tsun ai. Dai hpang e gara hku byin mat wa na hpe yu yu ga.