HPAJI chye htum ai Israela masha ni hpe Nebuhkadneza hkawhkam gaw Babelon de rim woi mat wa ai 10 ning na sai. Ya yu dat u. Kaning rai byin nga a ni? Yerusalem mare wan hkru grawp mat sai. Sat kau n hkrum ai Israela masha ni Babelon mare de, bawng masha ni hku nna rim woi mat wa hkrum ma ai.

Masha ni nhkru nkaja ai lam hta na myit malai nlu yang ndai zawn byin na, nga nna Yehowa a myihtoi ni sadi jaw ai hpe naw matsing a ni? Raitimung Israela masha ni gaw myihtoi ni a ga hpe n madat ma ai. Yehowa a malai shut ai karai ni hpe matut nna nawku ma ai. Dai majaw masha ni hpe ari jaw na ging dan ai. Karai Kasang a myihtoi Ezekela gaw Israela masha ni nshawp ai amu hpe galaw ma ai lam anhte hpe tsun dan ai, majaw anhte chye ga ai.

Ezekela gaw kadai wa re ai hpe chye a ni? Shi gaw Yerusalem mare hten za kaba rai n hkrum ai 10 ning hte hkawhkam Nebuhkadneza Babelon de rim woi mat wa ai masha ni hta lawm ai, ram ma langai mi re. Daniela hte shi a manang masum Shadrak, Meshak, Abed-nego ni hpe Babelon de rim woi mat wa hkrum ai, aten hta re ai.

Ezekela gaw Babelon mare kaw naw nga yang Yerusalem nawku thingnu kata e, nhkru ai amu hpe galaw nga ma ai lam Yehowa gaw shi hpe madun dan ai. Yehowa gaw shi hpe mauhpa kumla hku nna madun dan ai. Ezekela gaw teng sha Babelon kaw naw nga nga ai. Raitimung nawku htingnu kata e byin nga ai lam shagu hpe mu na hku Yehowa gaw galaw ya ai. Ezekela mu ai lam ni kajawng na zawn re ai.

‘Nawku thingnu kata e masha ni galaw nga ai matsat shabat amu hpe mada yu dat u. Shakum hta e, lapu sumla hte dusat ni a sumla hte hpring nga ai hpe yu dat u. Israela masha ni dai sumla ni hpe nawku nga ma ai hpe yu u,’ nga nna Yehowa gaw Ezekela hpe tsun ai. Ezekela mung dai lam ni hpe mu lu nna byin ai lam ni hpe ka matsing tawn ai.

‘Israela masha ni a ningbaw ni makoi magap rai nna hpa galaw nga ai hpe mu a ni?’ nga nna Yehowa gaw Ezekela hpe san ai. Teng ai. Dai ni hpe mung Ezekela mu ai. Masha marai 70 nga nga ma ai. Shanhte yawng shut ai karai hpe nawku nga ma ai. Bai nna: ‘Yehowa anhte hpe nmu ai. Anhte a mungdan hpe kau da nu ai’ nga nna tsun nga ma ai.

Bai nna Yehowa gaw nawku htingnu dingdung chyinghka e, nga ai anum nkau mi hpe bai madun ai. Dai anum ni gaw dung nga nna shut ai karai tamuza hpe nawku nga ma ai. Yehowa a nawku htingnu wang chyinghka kaw nga ai, dai ala ni hpe mung yu dat u. Marai 25 rai nga ma ai. Ezekela gaw dai masha ni hpe mu ai. Shanhte gaw sinpraw maga de myi man yawng nna ajan hpe nawku nga ma ai.

‘Ndai masha ni gaw ngai hpe n hkungga ma ai. Nkaja ai amu hpe galaw nga ma ai n-ga, nye a nawku htingnu kata de du hkra sa nna nshawp nkap ai amu hpe sa galaw nga ma ai,’ nga nna Yehowa tsun ai. Dai majaw Yehowa gaw: ‘shanhte nye a pawt sindawng kahtet ai hpe hkrum na mara ai. Shanhte jahten kau hkrun ai shaloi, ngai shanhte hpe matsan dum na n rai,’ nga nna tsun ai.

Ezekela hpe Yehowa dai lam madun ai hpang, masum ning rai jang Israela masha ni gaw Nebuhkadneza hpe gumlau ma ai. Dai majaw shi gaw shanhte hpe sa gasat ai. Laning mi e shata kru rai jang, Babelon masha ni gaw Yerusalem mare bunghku hpe run jahten kau nna, mare hpe wan nat agrawp kau ma ai. Masha law malawng sat kau hkrum ma ai. Nkau mi bawng masha hku nna Babelon mare de, rim woi wa hkrum ma ai.

Israela masha ni a ntsa e, ndai daram hkrit hpa hte, hten za na ahkang hpa majaw Yehowa jaw a ni? Teng ai. Yehowa a ga hpe n madat ma ai. Shi a hkang da ai tara hpe mung nhkan nang ma ai majaw rai sai. Karai Kasang tsun ai hpe galoi mung hkan sa na matu kade daram ahkyak rai nga ai hpe ndai lam madun nga ai.

Shawng nnan e, Israela mungdan hta masha kaji kachyaw sha nga na ahkang jaw ai. Dai masha ni hpe up hkang na matu, Nebuhkadneza gaw Gedalia ngu ai Yuda masha langai mi hpe san tawn da ai. Raitimung hpang e, Israela masha nkau mi Gedalia hpe sat kau ma ai. Ya shanhte nhkru ai amu hpe galaw ma ai majaw Babelon masha ni sa wa nna, shanhte sat kau hkrum na masai hpe hkrit tsang nga ma ai. Dai majaw Yeramia hpe aja awa shaga la nna Egutu mung de rawt hprawng ma ai.

Dai majaw Israela mungdan hta masha kadai mung nnga sai. Shaning 70 ning ting masha katsi katsang rai mat sai.Raitiming Yehowa gaw shaning 70 ning lai ai hpang shi a amyu masha ni hpe mungdan de bai nhtang wa shangun na, nga nna ga sadi jaw tawn ai. Dai aten rai ndu ai laman e, Karai Kasang a amyu masha ni gaw shanhte hpe rim woi mat wa ai Babelon mung kaw e, kaning rai nga nga ma ai kun? Yu yu ga.