Israela masha ni Babelon hta bawng dung nga ai shaloi, makam masham lam hta amyu myu dinglik hkrum ma ai. Shadrak, Meshak, Abed-nego ni grung ai wan htung hta jahkrat bang kau ai hkrum ma ai. Raitimung Karai Kasang shanhte hpe, jahkrung bai shapraw la ai. Dai hpang Medi hte Presi masha ni a lata hta Babelon mungdan hkrat sum mat ai. Daniela mung hkanghkyi nhkun hte jahkrat bang kau ai hkrum ai. Raitimung hkanghkyi ni a n-gup hpe pat kau ya nna, shi hpe Karai Kasang makawp maga ai.

Hpang jahtum Presi hkawhkam Kuru gaw, Israela masha ni hpe shalawt dat ai. Dai majaw Israela masha ni gaw shanhte a bu ga de bai nhtang wa lu ma ai. Babelon de bawng masha hku nna rim woi mat wa hkrum ai aten kaw nna, shaning 70 ning tup na sai. Yerusalem mare de bai du wa ai shaloi, shanhte yawng shawng nnan galaw na amu gaw Yehowa a nawku htingnu hpe bai wa gaw na matu re. Raitimung hpyen ni gaw nawku thingnu gaw ai hpe jahkring ma ai. Dai majaw Yerusalem mare de bai nhtang wa ai hpang 22 ning na jang she nawku htingnu hpe gaw ngut lu ma ai.

Dai hpang e Ezra gaw Yerusalem mare kaw sa nna, nawku htingnu hpe mawn shatsawm ai. Dai gaw nawku htingnu gram ngut ai hpang 47 ning na ai shaloi re. Ezra sa hkawm ai 13 ning na ai hpang Nehamia gaw hten nga ai Yerusalem mare bunghku hpe gram lajang na matu, karum shingtau lawm ai. Dai aten du hkra shaning 152 ning galu ai labau hpe daw MANGA kaw e madun tawn ai.