MASHA 50,000 daram Babelon kaw nna, Yerusalem mare de sum tsan lam hkawm wa ma ai. Raitimung shanhte hkawm wa ma ai shaloi, Yerusalem mare gaw, wut sumpum, nam sumwum hkrai rai nga la ai. Masha langai mi mung nnga ai. Israela masha ni lam shagu hpe nnan kaw nna bai wa gaw hpang ra sai.

Shanhte shawng nnan e, tawn hkungri shachyaw ma ai. Tawn hkungri ngu ai gaw Yehowa hpe dusat shagu hkungga shing nrai kumhpa nawng jaw ai shara re. Shata tsawm ra na ai hpang, Israela masha ni nawku htingnu hpe gaw gap hpang ma ai. Raitimung makau grup yin na hpyen ni gaw Israela masha ni nawku htingnu gaw ai hpe nra ma ai. Dai rai nna nawku htingnu gaw ai kaw na hkring mat na matu jahkrit jatsang ma ai. Hpang jahtum e ndai hpyen ni gaw Persi hkawhkam ningnan hpe tara shapraw shangun nna Israela masha ni gaw gap ai hpe jahkring shangun ai.

Shaning aten law law na wa sai. Israela masha ni Babelon kaw na du wa ai17 ning pyi na sai. Yehowa gaw myihtoi Hagai hte Zahkri hpe shangun dat nna nawku htingnu matut gaw na matu masha ni hpe bai tsun shadut shangun ai. Masha ni mung Karai Kasang a karum ai hpe kamhpa nna, myihtoi ni tsun ai ga hpe madat ma ai. Nawku htingnu n-galaw lu na nga nna tara hkum pat tawn timung shanhte bai galaw ma ai.

Dai majaw Tateni ngu ai Persi munggyi langai mi sa wa nna, kade ahkang hte nawku htingnu gaw ma ni? nga nna Israela masha ni hpe sa san ai. Israela masha ni bai tsun ai gaw: ‘Anhte Babelon kaw naw nga nga yang Kuru hkawhkam wa gaw ‘Yerusalem de wa nna, nanhte Karai Kasang a nawku htingnu wa gaw mu, nga nna ahkang jaw ai,’ ngu tsun ma ai.

Dai rai nna Tateni gaw Babelon de laika ka dat ai. Ya si mat wa sai Kuru hkawhkam gaw shanhte tsun ai hte maren teng teng ahkang jaw a ni? nga nna san dat ai. Kade nna yang Persi hkawhkam nnan kaw na laika bai nhtang wa ai. Kuru hkawhkam teng teng ahkang jaw da ai. Dai sha n-ga hkawhkam wa gaw, ‘Israela masha ni shanhte Karai Kasang a nawku htingnu hpe gaw mu ga; shanhte hpe nang karum u; ngai hkawhkam wa hkang dat ai,’ nga nna shana dat ai. Dai rai nna mali ning na jang nawku htingnu hpe gaw ngut ma ai. Dai shaloi e, Israela masha ni grai pyaw ma ai.

Shaning law law grau nna bai lai wa sai. Nawku htingnu gaw ngut ai hpang 48 ning pyi bai na mat sai. Yerusalem kaw nga ai ni matsan mayan hkrum ma ai. Dai majaw mare hte Karai Kasang a nawku htingnu nau ntsawm htap ai. Dai rai nna Karai Kasang a nawku htingnu hpe gram lajang na matu ra nga ai lam hpe Babelon kaw nga ai Israela masha Ezara gaw chye ai. Dai rai nna shi hpa galaw ai hpe chye a ni?

Ezara gaw Persi hkawhkam Artahkere kaw shang nna karum shing tau hpyi ai. Ndai myit su ai hkawhkam wa gaw Yerusalem mare de la wa na matu, kumhpa law law Ezara hpe jaw dat ai. Ezara gaw ndai kumhpa hpe Yerusalem mare de gun wa na matu, Babelon mare kaw nga ai Israela masha ni kaw karum hpyi ai. Masha 6,000 gaw hkan nang na ga ai nga nna tsun ma ai. Shanhte gun wa na matu aja gumhpraw manu dan ai arung arai law law re.

Lam kaw e, nhkru ai masha ni nga ma ai majaw Ezara gaw myit tsang ai. Shanhte a ja gumhpraw ni hpe damya ni kashun la kau nna shanhte hpe sat kau na re. Dai majaw ndai sumla hta mu ai hte maren masha ni hpe jahpawng tawn ai. Yerusalem mare de sa wa ai lam hta shanhte hpe makawp maga na matu Yehowa kaw akyu hpyi ai.

Yehowa gaw shanhte hpe makawp maga ya ai. Shanhte shata mali hkawm wa ai hpang e, angwi apyaw hte Yerusalem de du wa ma ai. Yehowa hpe kamhpa ai masha ni hpe karum ya lu ai lam madun nga ai nrai ni?