BABELON hpe Medi hte Persi masha ni, dang la kau ai lahkawng ning na sai. Ya hpa byin ai hpe yu yu mu. Teng ai. Israela masha ni Babelon kaw na pru wa ma ai. Shanhte gara hku nna lawt wa lu ma ni? Shanhte hpe kadai shangun dat a ni?

Persi hkawhkam Kuru wa shangun dat ai. Kuru rai n shangai wa ai shaning law law kaw nna shi hte seng nna Yehowa gaw Esaia hpe ka shangun ai: ‘Nang gaw ngai sharawng awng ai hte maren galaw lu na. Mare hpe dang la lu na matu na a man e, mare chyinghka ni hpaw ya na ra ai,’ nga nna ka shangun ai. Tsun da ai hte maren Kuru gaw Babelon hpe gasat la ai hta woi awn ai. Medi hte Persi masha ni gaw, hpaw nga ai chyinghka hku nna shana e shang ma ai.

Dai sha n-ga ai. Kuru gaw Yerusalem mare hte nawku htingnu hpe bai gaw da na matu, ahkang shapraw na re, nga nna mungYehowa a myihtoi Esaia naw tsun ai. Kuru gaw dai ahkang hpe teng teng shapraw a ni? Teng teng sha shapraw ai. Kuru gaw Israela masha ni hpe ning nga nna tsun ai: ‘Yerusalem mare de sa mu. Nanhte a Karai Kasang Yehowa a nawku htingnu hpe sa gaw mu,’ nga nna tsun ai. Israela masha ni de a matu sa wa nga ma ai.

Raitimung Babelon kaw nga ai Israela masha yawng sumtsan bu hkawm let Yerusalea mare de nlu wa ma ai. Lam nau galu ai majaw re. Deng 500 (800kilo meter) galu ai. Gumgai Dingla ni hte, machyi makaw hkrum ai masha ni gaw nau tsan ai majaw nwa lu ma ai. Kaga lam ni a majaw nlu wa ai ni mung nga ma ai. Raitimung Kuru gaw nwa ai ni hpe ning nga nna tsun ai: ‘Yerusalem mare hte nawku htingnu bai wa gaw na matu, nhtang wa ai ni hpe nanhte a ja gumhpraw hte kaga arung arai ni jaw dat mu,’ nga ai.

Dai rai nna Yerusalem mare de nhtang wa ai masha ni hpe arung arai ni hte kumhpaw kumhpa law law jaw dat ma ai. Bai nna Nebuhkadneza Yerusalem mare hpe jahten kau ai aten hta, Yehowa a nawku htingnu na la wa ai, gawm ni, di bu ni hte, kaga arung arai ni hpe mung Kuru bai jaw dat ai. Bai nhtang wa ai masha ni gaw arung arai law law hpai wa ra sai.

Israela masha ni shata mali daram hkawm ai hpang aten tup hta Yerusalem mare de du ma ai. Mare hten run nna masha katsi katsang re ai aten kaw nna shaning 70 ning tup hpring sai. Raitimung Israela masha ni shanhte a bu ga de bai du nga timung yak hkak lam nkau mi hkrum na sai. Ndai lam hpe hpang na daw hta mu lu na re.