AMU galaw nga ma ai hpe yu yu mu. Israela masha ni Yerusalem mare bunghku gaw ai hta amu law nga ma ai. Lai wa sai shaning 152 ning hta e, Nebuhkadneza hkawhkam Yerusalem mare hpe sa jahten kau ai shaloi, mare bunghku hpe run kau nna mare chyinghka ni hpe wan nat kau ai. Israela masha ni Babelon kaw na shawng nnan du wa ai shaloi, mare bunghku hpe n-gaw ma ai.

Mare bunghku nnga ai sha nga yang, masha ni a myit hta gara hku nga na zawn nawn a ni? Angwi apyaw hte nnga lu na ma ai. Hpyen ni sa wa nna aloi sha sa gasat lu na re. Raitimung ya gaw Nehamia ngu ai ndai wa mare bunghku gaw na matu masha ni hpe karum nga sai. Nehamia gaw kadai wa re ai hpe chye a ni?

Nehamia gaw Mordehkai hte Ashta ni nga ai Shushan mung kaw na sa wa ai Israela masha langai mi re. Nehamia gaw hkawhkam htingnu hta amu galaw ai masha langai mi re. Dai rai nna hkawhkam jan Eshta yan Mordehkai hte grai hku hkau na ma ai. Raitimung Nehamia gaw Eshta a madu wa Ahasuru hkawhkam kaw amu galaw ai nga nna Chyum Laika hta ntsun ai. Shi a hpang na hkawhkam Artahkera a matu amu gun ai wa re.

Myit dum a ni? Artahkera gaw Yerusalem mare na Yehowa a nawku htingnu hpe gram lajang na matu Ezara hpe gumhpraw jaw dat ai kaja ai hkawhkam langai mi re. Raitimung Ezara gaw hten run nga ai mare bunghku hpe n-gaw ai. Ndai mare bunghku gaw ai amu hpe Nehamia gara hku galaw ai hpe yu yu ga.

Nawku htingnu hpe gram lajang na matu, Ezara hpe Artahkera gaw ja gumhpraw jaw dat ai 13 ning na mat sai. Ya Nehamia gaw hkawhkam Artahkera a tsabyi jau kaba tai wa sai. Tsabyi jau ai wa ngu ai gaw hkawhkam wa hpe tsabyi jaw ra ai. Hkawhkam wa hpe kadai mung agung n lu jaw na matu, makawp maga ya ai wa re. Grai ahkyak kaba ai amu langai mi rai nga ai.

Lani mi hta Israela mung na Nehamia kanau Hanan hte masha nkau mi Nehamia kaw sa hkawm ma ai. Dai masha ni gaw Israela masha ni tsim yam tsim dam hkrum nga ma ai lam hte Yerusalem mare bunghku ya du hkra hten run nga ai lam hpe tsun dan ma ai. Ndai lam hpe na jang shi grai yawn ai. Dai lam hte seng nna Yehowa kaw akyu hpyi wu ai.

Lani mi hta Nehamia yawn nga ai lam hkawhkam wa chye jang san ai: ‘Hpa majaw myi man sum nga a ta?’ nga ai. Dai shaloi Nehamia gaw Yerusalem mare kaw byin nga ai masa nkaja ai lam hte, mare bunghku ya du hkra hten run nga ai lam a majaw re ai,’ nga nna tsun ai. ‘Nang kaning rai galaw mayu a ni?’ nga nna hkawhkam wa san ai.

‘Mare bunghku bai gaw da lu na matu, ngai hpe Yerusalem mare de wa na ahkang jaw rit,’ nga nna Nehamia tsun ai. Artahkera gaw kaja ai hkawhkam langai mi re ai majaw wa na ahkang jaw ai. Bai nna dum nta nkau mi shachyaw yang ra ai hpunpyen ni jaw dat ai. Nehamia Yerusalem du ai grai nna yang shi a yaw shada ai lam masha ni hpe tsun dan ai. Masha ni mung shi a myit mang ai lam hpe ra sharawng nna: ‘gaw gap hpang wa saga,’ nga nna tsun ma ai.

Israela masha ni a hpyen ni gaw, bunghku gaw nga ma ai hpe mu jang: ‘Anhte sa nna gaw gap ai hpe hkring mat na hku shanhte hpe sat kau ga,’ nga nna tsun ma ai. Raitimung ndai lam hpe Nehamia na jang, bungli galaw ai masha ni hpe nri, nhtu ni hpe jaw ai. Bai nna hpyen ni hpe ‘hkum hkrit mu. Tinang a kahpu kanau ni, kasha ni, madu jan ni hte dum nta masha ni a matu gasat mu’ nga nna tsun ai.

Masha ni gaw grai magrau grang ma ai. Lak nak ni hpe shani shana jin jin lang da nhtawm, matut nna gaw gap nga ma ai. Dai rai nna nhtoi 52 ya na ai hte bunghku hpe gaw ngut ma ai. Ya mare kata kaw angwi apyaw sha nga lu ma ai. Nehamia hte Ezara yan gaw masha ni hpe Karai Kasang a tara sharin ya ma ai. Masha ni gabu gara ai hte nga nga ma ai.

Raitimung Israela masha ni Babelon de bawng masha hku nna grai nrim la hkum ai shawng na aten hte nbung mat sai. Masha ni gaw Persi hkawhkam up hkang ai npu e, nga nna shi a matu amu galaw ya ra ai. Raitimung Yehowa gaw hkawhkam nnan langai mi paw pru shangun na re. Dai hkawhkam wa gaw masha ni hpe ngwi pyaw sim sa hkra galaw ya na ra ai nga nna ga sadi jaw tawn ai. Dai hkawhkam wa gaw kadai rai ta? Ginding aga ntsa hta ngwi pyaw sim sa hkra shi gara hku galaw ya na kun? Ndai lam ni hte seng nna hpa mung nchye kau dat ai shaning 450 ning lai mat wa sai. Dai hpang e ahkyak kaba htum ai ma kasha langai mi shangai wa ai. Raitimung ndai lam ni hpang na maumwi hta lawm ai.