Lamu kasa Gabriela gaw Mari ngu ai tsawm ai numsha langai mi hpang de shangun dat hkrum ai. Mari hpe shi ning nga ai. Nang shadang sha langai mi shangai wa na ra ai. Shi gaw htani htana up hkang ai hkawhkam tai na ra ai nga nna tsun ai. Ama kaji Yesu gaw dumsu ulawng hta shangai wa ai. Sagu rem ai ni mung sa yu ma ai. Dai hpang e shagan langai mi, sinpraw mung na masha ni hpe, ma kaji nga ai shara de madun ai. Dai shagan hpe shanhte mu lu hkra kadai wa shabyin dat ai lam hte, hpyen ni a lata kaw na Yesu gara hku nna asak hkye la hkrum ai lam ni hpe anhte chye lu na re.

Dai hpang Yesu a asak 12 ning du ai aten hta nawku htingnu kata kaw e, Sara ni hte aga shaga hkat ai lam ni mu lu na re. Shi matsat ning hpang hta Yesu hka lup hkam la ai. Dai hpang e ginding aga ntsa hta galaw na matu Karai Kasng shi hpe shangun dat ai amu bungli rai nga ai mungdan a kabu kara shi ga hkaw tsun na hte, sharin shaga ai amu hpe hpang wa ai. Dai amu hta shi hpe karum shingtau la na matu, masha 12 hpe lata la nna shi a kasa ni shatai la ai.

Yesu gaw mauhpa lamik kumla amyu myu madun dan ai. Muk tawng kaji mi hte anga kaji mi hpe sha masha hking lam hpe lusha daw jaw ai. Machyi makaw hkrum ai masha ni hpe shamai shatsai ya ai sha n-ga, si ai ni hpe asak jahkrung ya ai. Jahtum daw hta Yesu a hpang jahtum asak aprat hta shi hkrum kadup ai lam amyu shagu hte shi hpe kaning rai sat kau ma ai lam ni mu lu na re.Yesu gaw masum ning chyen tara hkaw tsun dan ai. Dai majaw DAW 6 hta 34 ning galu ai aten hta byin ai lam hpe madun tawn ai.