YESU gaw ndai kaw e, dung nga ai hpe yu yu mu. Galile mung na bum langai mi ntsa e, ndai masha ni yawng hpe sharin shaga nga ai. Shi a makau e dung nga ai masha ni gaw shi a sape ni rai ma ai. Shanhte kaw na masha 12 hpe kasa ni hku nna lata la ai. Kasa ni ngu ai gaw, Yesu a grau ahkyak ai sape ni rai ma ai. Shanhte a amying hpe chye ai ni?

Simun Petru hte shi a kanau Andre. Yaku hte Yawhan mung lawm ai. Shan nau ni rai ma ai. Kaga kasa langai mi hpe mung Yaku nga ma ai. Simun ngu ai kaga kasa langai mung naw lawm ai. Yuda ngu ai kasa lahkawng mung nga ai. Langai wa a mying gaw Yuda -iskarut rai nna, kasa Yuda langai mi hpe gaw Htade mung nga ma ai. Bai nna Hpilip hte, (Barhtolume ngu mying ai) Nahtanela mung lawm ai. Mahte, bai nna Htawma mung lawm ai.

Samari mung na bai nhtang wa ai hpang Yesu gaw: ‘Sumsing lamu mungdan du na ni sai,’ nga nna hkaw tsun hpang wa ai. Mungdan ngu ai gaw kaning re ai hpe nga ma ni? Teng teng nga ai Karai Kasang a up hkang hpung langai mi re. Yesu gaw dai mungdan a hkawhkam re. Shi gaw sumsing lamu kaw na up hkang nna ginding aga ntsa e, ngwi pyaw sim sa wa hkra galaw ya na ra ai. Karai Kasang a mungdan gaw ginding aga mahkra hta tsawm la ai Hparadisu byin tai wa hkra galaw ya na ra ai.

Yesu gaw masha ni hpe mungdan lam hte seng nna sharin ya ai. ‘Nanhte ning ngu nna akyu hpyi mu. Sumsing lamu hta na anhte a wa e, na a amying nsang chyoi pra nga u ga;Na a mungdan du wa u ga; Lamu tang hta na a myit dik nga ai hte maren, ga ntsa e mung dik wa u ga law,’ nga nna masha ni hpe sharin ya ai. Ndai hpe masha law law gaw, ‘madu a kyu hpyi ga,’ nga nna tsun ma ai. Nkau mi rai jang, ‘Anhte a wa’ nga ma ai. Ndai akyu hpyi ga mahkra hpe chye hpyi tsun lu, a ni?

Langai hte langai kaning rai kanawn mazum na lam hte seng nna mung, Yesu sharin ya ai. ‘Masha ni hpe tinang a ntsa e galaw shangun mayu ai hte maren, manang wa a ntsa hta mung galaw mu,’ nga ai. Masha ni nanhte a ntsa e, matsan dum ai myit hte kanawn mazum ai hpe nanhte nra myit ni? Masha ni hpe matsan dum ai myit hte kanawn mazum ra ai, nga nna Yesu sharin ya ai. Masha yawng gaw ga ntsa na Hparadisu kaw e, shing rai galaw na ma ai rai nna grai pyaw na re.