YESU gaw mungting hpe kawan hkawm sa ai shaloi, machyi ai masha ni hpe shamai ya ai. Yesu galaw dan ai lamik kumla ni a shi ga gaw, kahtawng ni, mare ni shara shagu de chyam mat wa ai. Dai majaw masha ni gaw lagaw lata hten ai ni hte myi kyaw ai masha ni, na nna ai masha ni hpe woi sa wa ma ai. Kaga machyi makaw hkrum ai masha law law hpe mung shaga sa wa ai. Yesu mung dai ni yawng hpe shamai shatsai ya ai.

Yawhan a lata hta Yesu hka lup hkam la ai masum ning na sai. Yesu gaw kade nna yang Yerusalem mare de lung wa na nga nna, shi a kasa ni hpe tsun dan ai. Dai kaw du jang shi sat kau hkrum na re. Dai hpang si ai kaw na bai hkrung rawt wa na re, nga nna tsun dan ai. Dai aten laman e Yesu gaw machyi makaw hkrum ai masha ni hpe shamai shatsai ya nna nga nga ai.

Lani mi hta laban shani e, Yesu sharin shaga nga ai. Laban shani gaw Yuda masha ni a matu ban sa nhtoi re. Ndai sumla kaw lawm ai num gaw machyi ai grai na sai. Marung hting kung nna nlu malan ai, 18 ning na sai. Dai majaw Yesu gaw shi a ntsa e lata mara ya jang ading sha tsap lu sai. Shi gaw mai tsai wa lu nu ai.

Ndai lam a majaw makam masham ningbaw ni gaw masin pawt ma ai. ‘Amu bungli galaw ai nhtoi kru ya nga ai. Dai nhtoi ni hta shamai hkam la na matu sa mu. Laban nhtoi hta gaw hkum sa mu,’ nga nna shanhte kaw na marai langai mi shawa hpung ni hpe marawn tsun dat ai.

Raitimung Yesu gaw: ‘Myit magaw rawng ai masha ni e, nanhte hta kadai wa raitimung laban nhtoi e nanhte a lawze hpe ntsin shayaw na matu ulawng na raw dat ga myit dai, 18 ning tup machyi makaw hkrum ai ndai matsan ai num gaw laban nhtoi e mai tsai la lu ai nrai ni?’ nga nna san dat ai. Shing nga nna Yesu san dat ai majaw nshawp ai dai masha ni kaya mat ma ai.

Dai hpang e Yesu hte shi a sape ni gaw, Yerusalem mare de sa wa ma ai. Yerihko mare shingan kaw sha naw du sa wa ma ai. Yesu sa wa nga ai hpe myi kyaw ai masha lahkawng na lu yang: ‘Yesu anhte hpe matsan dum la mi law,’ nga nna jahtau dat ma ai.

Yesu gaw myi kyaw ai masha lahkawng hpe shaga la nna: ‘Nan hpe hpa galaw shangun mayu myit ni?’ nga nna san ai. Shan gaw, ‘ madu e an myi bai mu lu hkra galaw ya rit,’ nga nna tsun ma ai. Yesu gaw shan a myi hpe ahtawk ai hte, shan gaw myi bai mu wa ma ai. Yesu gaw hpa majaw ndai lamik kumla ni hpe madun ai hpe chye a ni? Masha ni hpe tsawn ra ai majaw re. Bai nna shi hpe kam sham wa shangun mayu ai majaw mung re. Yesu hkawhkam tai wa ai shaloi, mungkan ga ntsa e kadai mung machyi ai nhkrum na sai hpe madun nga ai.