NDAI hta masha langai mi lata layung hte madun nga ai htoi kabrim ai shagan hpe mu a ni? Yerusalem mare kaw na dai masha ni pru wa ai shaloi ndai shagan paw pru wa ai. Ndai masha ni gaw sinpraw mung de na sa wa ma ai. Shanhte gaw shagan ni a lam sawk sagawn ai masha ni rai ma ai. Ndai shagan ningnan gaw grai ahkyak kaba ai masha langai mi hpang de shanhte hpe lam madun nga ai, nga nna kam ma ai.

Shanhte gaw Yerusalem mare kaw e, du sa wa ai shaloi ‘yuda masha ni a hkawhkam tai na ra ai masha gaw kanang e rai nga a ta? nga nna sa san ma ai. “Yuda” ngu ai gaw Israela amyu masha ni a amying kaga langai mi re. ‘Anhte gaw sinpraw mung kaw nna ndai ma kasha a shagan hpe shawng mu ga ai. Shi hpe nawku na matu anhte du sa wa ga ai,’ nga nna tsun ma ai.

Yerusalem mare kaw e hkawhkam galaw nga ai Herod gaw dai ga hpe na jang myit tsang wa ai. Kaga hkawhkam langai mi gaw shi a shara hpe kashun la na ra ai hpe shi n ra ai. Dai majaw Herod gaw hkinjawng agyi kaba ni hpe shaga la nna; ‘Ga sadi nga ai hkawhkam wa kanang e, shangai wa na ra ai kun?’ nga nna san ai. Hkinjawng agyi kaba ni gaw, ‘Betlehem mare kaw e shangai wa na re,’ nga nna Chyum Laika hta ka da ai, nga nna bai htan ai.

Dai rai nna Herod gaw sinpraw mung na du sa ai, masha ni hpe shaga la nna htet dat ai: ‘Dai ma kaji hpe mu hkra hkan tam mu. Mu tam jang ngai hpe mung wa tsun dan mu. Ngai mung shi hpe sa nawku mayu ai,’ da. Kaja wa nga yang Herod gaw ma kaji hpe mu tam jang sat kau mayu ai.

Dai shagan gaw, dai masha ni a shawng e, Betlehem mare de madun sa wa ai. Ma kaji nga ai shara kaw du jang de a ntsa e, wa hkring nga ai. Dai masha ni gaw nta kaw shang sa wa ma yang Mari hte ma kaji Yesu hpe sa mu ma ai. Shanhte a kumhpa ni hpe shaw nna Yesu hpe jaw ma ai. Raitimung hpang e Yehowa gaw Herod hpang de bai n nhtang wa na matu, dai ni hpe yup mang hku nna sadi jaw ai. Dai rai nna kaga lam hku shanhte a mungdan de nhtang wa mat ma ai.

Sinpraw mung de na masha ni, nta de bai nhtang wa sai shi ga hpe Herod na jang grai masin pawt bu ai. Dai rai nna Herod gaw Betlehem mare kaw e, nga ai asak lahkawng ning a lawu na ma kaji yawng hpe sat kau na matu ahkang shapraw dat ai. Raitimung Yehowa gaw Yosep hpe yup mang hku jaw kau nna sadi jaw ai. Dai re ai majaw Yosep gaw shi a kun dinghku masha ni hte Egutu mung de pru mat wa ai. Dai hpang Herod hkawhkam si mat sai nga ai shi ga hpe Yosep na jang Mari hte Yesu hpe Nazaret dum nta de bai woi wa ai. Dai shara hta e Yesu kaba wa ai.

Dai shagan ningnan htoi kabrim nga hkra kadai wa galaw ai zawn nawn a ni? Naw matsing a ni? Shagan hpe mu ai hpang dai masha ni Yerusalem mare de sa ai. Satan gaw Karai Kasang a kasha hpe sat kau mayu ai. Yerusalem mare na hkawhkam Herod gaw Yesu hpe sat kau na re, ngu ai hpe Satan chye ai. Dai majaw shagan kaba htoi tu nga hkra galaw ai wa gaw Satan nat re.