DAW 04
Karai Kasang Gaw Kadai Rai Kun?
Shinggyim masha ni nga wa ai aten kaw nna, hpara ni, hpara num ni hpe nawku wa ma ai. “Hpara ni mahkra hta grau” ai Karai langai nga ai ngu Chyum Laika hta tsun da ai. (2 Hkawhkam Labau 2:5) Kadai rai na kun? Kaga hpara yawng hta na gara lam gaw shi hpe grau htum ai wa byin shangun ai kun? Ndai daw hta, Karai Kasang gaw shi hkum shi gara hku shachyen da ai hpe hkaja yu ga.
1. Karai Kasang a mying gaw hpa rai kun? Dai mying hpe chye shangun mayu ai lam gara hku chye lu ai kun?
Chyum Laika hta, Karai Kasang gaw shi hkum shi ndai hku shachyen da ai: “Ngai gaw Yehowa rai nga nngai; dai nye a amying shingteng rai nga ai.” (Esaia 42:5, 8 hpe hti u.) Hebre amyu ga re ai “Yehowa” ngu ai mying gaw, “Shi Byin Wa Shangun Ai” ngu ai lachyum nga ai. Yehowa gaw shi a mying hpe chye shangun mayu ai. (Pru Mat 3:15) Dai hpe anhte gara hku chye lu ai? Chyum Laika hta shi a mying 7,000 jan lawm ai. a Yehowa ngu ai mying nga ai tengman ai Karai Kasang gaw “sumsing lamu lahta tang hte ginding dinghta ga ntsa e Karai Kasang rai nga ai.”—Tara Jahprang 4:39.
2. Yehowa hte seng nna Chyum Laika hta hpa tsun da ai kun?
Shinggyim masha ni nawku ai karai ni yawng hta na, Yehowa chyu sha tengman ai Karai re ai ngu, Chyum Laika hta tsun da ai. Hpa majaw kun? Madi madun lam law law nga ai. Yehowa hta grau htum ai ahkang aya nga ai. Shi chyu sha “ga ting hta e Tsaw Htum nga ai.” (Shakawn 83:17 hpe hti u.) Shi gaw “Chyahtum chyalai n-gun rawng ai Madu” rai nna, shi galaw mayu ai hpa hpe raitim galaw lu ai atsam nga ai. Shi gaw ninggawn tawa hte ginding aga hta nga ai ‘nga yawng nga pra hte hpe hpan tawn da’ ai. (Shingran 4:8, 11) Yehowa gaw kadai hte mung n bung ai sha, moi chyaloi nhkoi kaw na nga nga ai. Htani htana mung grin mat na re.—Shakawn 90:2.
Kahtap Hkaja
Karai a arawng sadang hte shi a laklai ai mying a lapran shai ai lam hpe sawk sagawn yu ga. Shi a mying hte seng nna nang hpe gara hku tsun dan ai kun? Hpa majaw tsun dan ai kun? ngu ai hpe hkaja yu ga.
3. Karai Kasang hta arawng sadang law law nga tim, mying gaw langai sha nga
Masha langai a mying hte shi a arawng sadang a shai ai lam hpe yu yu ga. VIDEO hpe hpaw, dai hpang ndai ga san hpe bawngban u.
-
“Madu” zawn re ai arawng sadang hte mying a lapran shai ai lam gaw hpa rai kun?
Shinggyim masha ni gaw hpara ni, madu ni hpe nawku ai ngu Chyum Laika hta tsun da ai. Shakawn 136:1-3 hpe hti nna, ndai ga san hpe bawngban u:
-
“Hpara ni a Karai Kasang” hte “madu ni a Madu” gaw kadai rai kun?
4. Yehowa gaw shi a mying hpe chye shangun mayu nna akyu jashawn shangun mayu
Yehowa gaw shi a mying hpe chye shangun mayu ai lam gara hku chye lu ai kun? VIDEO hpe hpaw, dai hpang ndai ga san ni hpe bawngban u.
-
Yehowa gaw shi a mying hpe chye shangun mayu ai ngu nang shadu ai kun? Hpa majaw kun?
Yehowa gaw masha ni hpe shi a mying hpe akyu jashawn shangun mayu ai. Roma 10:13 (NWT) hta ndai hku tsun da ai: “Yehowa a amying hpe shaga nna, akyu hpyi ai kadai raitim, hkye hkrang la hkrum na.” Matut nna ndai ga san ni hpe bawngban u:
-
Yehowa ngu ai Karai a mying hpe akyu jashawn na matu kade daram ahkyak ai kun?
-
Marai langai ngai gaw na a mying hpe matsing ai, shaga ai nga yang nang gara hku hkamsha ai kun?
-
Nang gaw Yehowa a mying hpe shaga ai nga yang, shi gara hku hkamsha na ngu shadu ai kun?
5. Yehowa gaw shi hte nihtep shangun mayu
Kambawdiya hta nga lai wa ai, Soten ngu ai num gaw Karai a mying hpe chye lu ai majaw, “mungkan ntsa kaja dik htum hkamsha lam lu la ai” ngu tsun wa ai. VIDEO hpe hpaw, ngut yang ndai ga san hpe bawngban u.
-
Ndai video hta, Karai a mying hpe chye lu ai gaw Soten hpe gara hku akyu lu shangun ai kun?
Marai langai hte manang garai n byin shi yang, shi a mying hpe shawng chye ra ai. Yaku 4:8a hpe hti nna, ndai ga san ni hpe bawngban u:
-
Yehowa gaw nang hpe hpa galaw na matu saw shaga ai kun?
-
Karai a mying hpe chye nna, akyu jashawn ai gaw shi hte nihtep na matu nang hpe gara hku karum ya lu ai kun?
Nkau Mi Tsun Ai: “Karai Kasang langai sha nga ai majaw, shi hpe gara hku mi shaga tim hpa n ra ai.”
-
Karai Kasang a mying gaw Yehowa re ai hpe nang kam ai kun?
-
Karai Kasang gaw shi a mying hpe shaga shangun mayu ai lam nang gara hku sanglang dan na kun?
Kadun Dawk
Yehowa ngu ai mying gaw tengman ai Karai Kasang a mying re. Shi a mying hpe chye shangun mayu nna, shaga shangun mayu ai. Rai yang, shi hte nihtep lu na re.
Bai Maram
-
Yehowa gaw kaga hpara ni yawng hta na gara hku shai ai kun?
-
Karai a mying hpe anhte hpa majaw shaga ging ai kun?
-
Yehowa gaw, shi hte nihtep shangun mayu ai lam hpa gaw madun dan ai kun?
Sawk Sagawn
Karai Kasang nga ai hpe kam mai ai madi madun lam 5 hpe hkaja yu u.
Karai Kasang gaw, galoi mung grin nga ai hpe kam ai gaw, hpa majaw lachyum nga ai hpe sawn maram yu u.
“Karai Kasang Hpe Kadai Hpan Da Ai Kun?” (Sin Langchyi, August 1, 2014)
Karai Kasang a mying hpe moi aten hta, gara hku nsen shapraw wa ai hpe tup hkrak n chye tim, hpa majaw shaga ging ai lam hkaja yu u.
Karai Kasang hpe gara hku mi shaga tim mai ai kun? Shi hta mying langai sha nga ai ngu hpa majaw lu tsun ai hpe hkaja yu u.
“Karai Kasang Hta Amying Kade Daram Nga Ai Kun?” (Web sumhpa)
a Karai a mying a lachyum hte seng ai lam, ga gale Chyum nkau hta dai mying hpe hpa majaw shaw kau ai lam hpe grau nna chye mayu yang, Mungkan Nnan Ga Gale Chyum Laika-BU Bungjat daw A4 hta yu u.
You May Also Like
SAN CHYE AI GA SAN NI
Yehowa Sakse Ni Saw Shaga Ai Chyum Laika Hkaja Lamang Ngu Ai Gaw Hpa Rai Kun?
Manu jahpu n jaw ra ai Chyum Laika hkaja ai lamang hpe Yehowa Sakse ni saw shaga ai shaloi, gara Chyum Laika hpe raitim, nang mai lang ai. Na nta masha ni, manang ni, kadai hpe raitim, saw shaga mai ai.
