DAW 07
Yehowa Gaw Gara Zawn Karai Rai Kun?
Yehowa Karai Kasang a lam hpe myit ai shaloi, na myit hta hpa pru wa ai kun? Shi gaw hpung atsam grai kaba ai majaw, shata shagan ni zawn tsan gang nga ai ngu hkamsha ai kun? Shi hpe gaja wa nga ai wa n re ai sha, atsam grai kaba ai lama ma hku nna sha mu ai kun? Yehowa gaw gara zawn re ai wa rai kun? Yehowa gaw Chyum Laika hku nna shi a atsam ningja nkau hpe tsun dan ai. Nang hpe lanu lahku ai lam hpe mung tsun dan ai.
1. Karai Kasang hpe hpa majaw n mu lu ai kun?
“Karai Kasang gaw Wenyi rai nga ai.” (Yawhan 4:24) Yehowa hta myi hte mu lu ai hkum hkrang n nga ai. Shi gaw anhte n mu lu ai shara sumsing lamu kaw nga ai Wenyi Hkum re.
2. Yehowa a atsam ningja nkau gaw hpa rai kun?
Yehowa hpe n mu lu tim, kaja ai atsam ningja ni nga ai wa re ai majaw, shi hpe chye lu nna, tsawra lu ai. Chyum Laika hta ndai hku tsun da ai: “Yehowa gaw tara ding ai hku tsawra nga nna, shi a chyoi pra ai ni hpe kau da mu ai n rai.” (Shakawn 37:28) “Tsaw ra matsan dum nna n gaw n wai myit hte hpring tsup” ai Karai Kasang gaw, yakhkak hkrum ai ni hpang de laksan hku nna sit sa ai. (Yaku 5:11, JCLB) “Yehowa gaw myit daw myit hten ai ni hte ani sha rai nga ai rai nna, myit masin hkra machyi ai ni hpe hkye la mu ai.” (Shakawn 34:18, NWT) Na a galaw hkawm sa ai lam gaw, Yehowa hpe myit pyaw shangun lu ai zawn, yawn hkyen shangun lu ai hpe nang chye ai kun? Marai langai ngai n kaja ai lam ni hpe galaw ai shaloi, shi hpe myit daw shangun ai, yawn hkyen shangun ai. (Shakawn 78:40, 41) Raitim, marai langai ngai kaja ai lam hpe galaw ai shaloi shi myit pyaw ai.—Ga Shagawp 27:11 hpe hti u.
3. Yehowa gaw anhte hpe tsawra ai lam gara hku madun ai kun?
Yehowa a kaja htum atsam ningja gaw tsawra myit re. “Karai Kasang gaw tsaw ra ai myit rai nga ai.” (1 Yawhan 4:8) Yehowa gaw shi a tsawra myit hpe Chyum Laika hku nna sha n-ga, hpan tawn da ai lam ni hku nna mung madun dan ai. (Kasa 14:17 hpe hti u.) Ga shadawn, anhte hpe shi gara hku hpan da ai hpe yu yu ga. Grai tsawm ai nsam ni hpe mu lu ai atsam, yungwi nsen ni hpe na lu ai atsam, grai mu ai malu masha ni hpe chyim lu ai atsam hte hpan tawn da ai. Anhte a prat hpe ngwi pyaw shangun mayu ai.
Kahtap Hkaja
Yehowa gaw mauhpa lam ni hpe gara hku galaw wa ai hpe hkaja yu ga. Yehowa gaw shi a mauhpa atsam ningja ni hpe gara hku madun dan ai hpe mung yu yu ga.
4. Chyoi pra ai wenyi—Karai Kasang akyu jashawn ai n-gun atsam
Bungli galaw na matu anhte gaw lata hpe akyu jashawn ai zawn, Yehowa mung chyoi pra ai wenyi hpe akyu jashawn ai. Chyum Laika hta tsun da ai chyoi pra ai wenyi ngu ai gaw, hkum hkrang langai n re. Bungli ngut kre lu na matu Karai Kasang akyu jashawn ai n-gun atsam re. Luka 11:13 hte Kasa 2:17 hpe hti nna, ndai ga san ni hpe bawngban u:
-
Chyoi pra ai wenyi lu na matu hpyi shawn ai ni hpe Karai Kasang gaw shi a chyoi pra ai wenyi “ru jaw” ya na re. Rai yang, chyoi pra ai wenyi ngu ai hpe hkum hkrang langai (sh) Karai Kasang akyu jashawn ai n-gun atsam ngu nang shadu ai kun? Rai yang, hpa majaw dai hku shadu ai?
Yehowa gaw mauhpa lam ni hpe galaw ngut kre lu hkra chyoi pra ai wenyi hpe akyu jashawn ai. Shakawn 33:6 hte 2 Petru 1:20, 21 hpe hti nna, ndai ga san hpe bawngban u:
-
Chyoi pra ai wenyi hpe Yehowa akyu jashawn wa ai lam nkau gaw hpa rai kun?
5. Yehowa hta kaja ai atsam ningja ni nga
Mawshe gaw Karai Kasang hpe sadi dung let nawku ai wa re. Raitim, Hpan Madu a lam hpe grau nna chye mayu ai. Dai majaw, shi ndai hku hpyi shawn ai: “Nang hpe mung ngai chye lu hkra, na a lam ngai hpe madun ya e.” (Pru Mat 33:13) Yehowa gaw shi a atsam ningja nkau hpe tsun dan ai hku nna, Mawshe hpe mahtai jaw wa ai. Pru Mat 34:4-6 hpe hti nna, ndai ga san ni hpe bawngban u:
-
Mawshe hpe tsun dan wa ai Yehowa a atsam ningja nkau gaw hpa rai kun?
-
Yehowa a atsam ningja ni kaw na nang hpa hpe ra sharawng ai kun?
6. Yehowa gaw shinggyim masha ni hpe lanu lahku
Karai a masha ni re ai Hebre masha ni gaw, Egutu mung hta mayam byin nga ai. Shanhte jam jau hkrum ai shaloi Yehowa gara hku hkamsha ai kun? AUDIO hpe hpaw nna hkan madat u, (sh) Pru Mat 3:1-10 hpe hti u. Dai hpang ndai ga san ni hpe bawngban u.
-
Shinggyim masha ni yakhkak jam jau hkrum ai shaloi, Yehowa a hkamsha lam hte seng nna ndai labau gaw hpa tsun dan ai kun?—Daw kaji 7 hte 8 hpe yu u.
-
Yehowa gaw shinggyim masha ni hpe gaja wa karum ya mayu nna, karum mung karum ya lu na ngu nang shadu ai kun? Rai yang, nang hpa majaw dai hku htai ai?
7. Mungkan a shingra tara ni gaw Yehowa a atsam ningja ni hpe madun
Yehowa gaw hpan da ai lam ni hku nna shi a atsam ningja ni hpe madun dan ai. VIDEO hpe hpaw. Dai hpang, Roma 1:20 hpe hti nna, ndai ga san hpe bawngban u.
-
Hpan da ai lam ni hta Yehowa a gara atsam ningja ni hpe nang mu ai kun?
Nkau Mi Tsun Ai: “Karai Kasang gaw shara shagu hta nga ai atsam langai daram sha re.”
-
Nang gara hku shadu ai kun?
-
Hpa majaw dai hku hkamsha ai kun?
Kadun Dawk
Yehowa gaw n mu lu ai Wenyi Hkum rai nna, shi hta kaja ai atsam ningja law law nga ai. Laksan hku nna tsawra myit re.
Bai Maram
-
Yehowa hpe anhte hpa majaw n mu lu ai kun?
-
Chyoi pra ai wenyi ngu ai gaw hpa rai kun?
-
Yehowa a atsam ningja nkau gaw hpa rai kun?
Sawk Sagawn
Yehowa a madung atsam ningja mali hpe hkaja ai hku nna, shi a lam grau chye hkra galaw u.
“Karai Kasang Gaw Gara Zawn Karai Rai Kun?” (Sin Langchyi No. 1 2019)
Yehowa gaw shara shagu hta n nga ai hpe madi madun da ai lam hpe sawk sagawn yu u.
Chyum Laika hta chyoi pra ai wenyi hpe Karai a lata ngu nna hpa majaw tsun da ai hpe hti yu u.
Myi n mu ai wa gaw, shi hpe Karai Kasang lanu lahku ai hpe kam na matu grai yak wa ai. Hpang de shi a hkamsha lam gara hku galai shai mat ai hpe hti yu u.
“Kaga Ni Hpe Karum Ya Lu Sai” (Sin Langchyi, October 1, 2015)
You May Also Like
SAN CHYE AI GA SAN NI
Yehowa Sakse Ni Saw Shaga Ai Chyum Laika Hkaja Lamang Ngu Ai Gaw Hpa Rai Kun?
Manu jahpu n jaw ra ai Chyum Laika hkaja ai lamang hpe Yehowa Sakse ni saw shaga ai shaloi, gara Chyum Laika hpe raitim, nang mai lang ai. Na nta masha ni, manang ni, kadai hpe raitim, saw shaga mai ai.
