Hparadisu gaw ya anhtē nga nga ai mungkan ga hte bung na n rè ai. Kărai Kăsang gaw ginding aga hpe ruyak tsin yam hte yawn hkyen lam, măchyi măkaw hte jam jau jam hkau ni hte hpring nga na mătu, kălang mi mung ra shărawng ga ai n rai. Kărai Kăsang gaw htawm hpang prat ē, ginding aga hpe Hparadisu shăbyin ya na ra ai. Hparadisu gaw hpa hte bung na a ta? Chyum laika tsun da ai hpe anhtē yu yu ga.

Măsha kăja. Hparadisu gaw Kărai Kăsang a jinghku ni a nta rai na rè ai. Shanhtē gaw lăngai hte lăngai kăja ai amu gălaw na ma ai. Shanhtē gaw Kărai Kăsang a ding hpring ai lai lam hte măren, asak hkung nga na ma ai.​—⁠Ga shăgawp 2:21.

Mălu măsha law htam ai lam. Hparadisu ē kawsi hpang găra ai n nga na sai. “Ginding aga ningtsa ē nsi naisi [shing n rai, mălu măsha] law htam wa na,” nga nna Chyum laika tsun da ai.—Shăkawn Kungdawn 72:16, NW.

Mai kăja ai dum nta hte pyaw hpa bungli. Hparadisu ga ningtsa ē kun dinghku shăgu gaw, tinang mădu ai nta nga na rè. Măsha hkum shăgu teng man ai ngwi pyaw lam byin shăngun ai măgam bungli hpe gălaw na ma ai.—Esaia 65:21-23.

 Mungkan chyam hkra simsa lam. Măsha ni măjan găsat nna si na n rai sai. “Hpyen măjan [ni hpe Kărai Kăsang] jăsim kau wu ai” nga nna Kărai Kăsang a Mungga tsun ai.​—⁠Shakawn Kungdawn 46:​8, 9.

Hkam kăja ai lam. Chyum laika ga sădi jaw da ai gaw: “[Hparadisu] hta shănu ai wa gaw, Ngai măchyi nga nngai, nga nna n tsun na ra ai.” (Esaia 33:24) Dai sha n-ga, kădai mung lăgaw hten ai, shing n rai, myi kyaw ai, na lăhpang ai, ga n chyē shăga ai, byin să na n rai.​—⁠Esaia 35:​5, 6.

Măchyi măkaw lam, yawn hkyen lam hte si hkrung si htan lam ni htum mat na. Kărai Kăsang a Mungga ning nga tsun ai: “Htawm hpang ē si hkrung si htan n nga lu na sai; shărung shăyawt ai, hkrap ngu hkrap ngoi ai, hki si ba si ai mung, n nga lu na sai: shawng na lan nga nănga htē gaw lai mat wa sai.”​—⁠Shingran 21:⁠4.

N kăja ai măsha ni nga să na n rai. Yehowa ga sădi jaw da ai gaw: “Tăra n lang [n hkru] ai ni chyawm gaw, dai mungdan [ginding aga] na shămyit kau ai hkrum nna, hkălem sha ai ni gaw baw kau ai hkrum na mă ra ai.”​—⁠Ga shăgawp 2:⁠22.

Măsha ni gaw, langai hte lăngai tsaw ra ai hte hkungga lara hkat na mă ra ai. N tăra lam, dip rip lam, law hpa lam hte n dawng n yawt ai lam nga să na n rai. Măsha ni gaw myit hkrum rap ra nna Kărai Kăsang a ding hpring ai lai lam hku hte măren, nga sa na ma ai.​—⁠Esaia 26:⁠9.