Nang shăkawn shăgrau hkungga ai jinghku wa lu yang, shi zawn byin hkra nang shăkut na ndai. “Yehowa gaw mai kăja ai hte ding man ai wa rai nga ai” nga, Chyum laika tsun ai. (Shăkawn Kungdawn 25:8) Kărai Kăsang a jinghku byin măyu yang, anhtē gaw mai kăja ai hte ding man ra ai. Chyum laika ning nga ai: “Tsaw ra nga ai kăshu kăsha hte măren, Kărai Kăsang a samnang ai ni tai nga mu. . . . Tsaw ra ai hta a hkawm nga mu.” (Ehpesu 5:​1, 2) Dai zawn gălaw lu ai lam nkau mi gaw:

Kăga ni hpe kărum u. “Anhtē măsha nlang htē hpe mai kăja ai amu gălaw nga ga.”​—Galati 6:​10.

Gălaw shăkut u. “Lăgu ga ai wa gaw, bai hkum lăgu u ga; ... tinang a lăta hte mai kăja ai shă­chyen let, măgam bungli gălaw nga u ga.”​—Ehpesu 4:​28.

Hkum hkrang hte lai kyang hta san seng u. “Hkum hkrang hte wenyi hpe awu asin di kau ai mătsat shăpat hta na tinang hkum hpe jă­san jăseng kau nhtawm, Kărai Kăsang hpe hkrit hkungga let shăchyoi shăpra ai lam shătup nga ga.”​—2 Korinhtu 7:1.

 Kun dinghku măsha ni hpe tsaw ra ai hte hkungga let kănawn măzum u. “Nanhtē lăngai hte lăngai tinang hkum hpe tsaw ra ai hte măren tinang a mădu jan hpe tsaw ra nga u ga; mădu jan mung tinang a mădu wa hpe hkrit hkungga nga u ga. Ma ni ē, nanhtē a kănu yan kăwa hpe ... mădat măra nga mu.”​—Ehpesu 5:⁠33–​6:1.

Kăga ni hpe tsaw ra myit mădun u. “Anhtē shăda da tsaw ra nga ga: tsaw ra ai myit gaw Kărai Kăsang kaw na rai nga ai.”​—1 Yawhan 4:7.

Mungdan a tăra upăde ni hpe mădat u. “Shinggyim măsha nlang hte gaw, [atsuya] a npu ē a taw nga mu ga: . . . lăngai hte lăngai htē hpe mai ang ai hte măren jaw ya mu: hkansi mai hta ai wa hpe hkansi . . . bang mu.”​—Roma 13:​1, 7.