Jinghku hku na mătu shăkut shăja ra ai; jinghku grin na mătu mung shăkut shăja ra ai. Kărai Kăsang a jinghku tai na hte grin nga na mătu, nang shăkut shăja ai gaw shăman chyēju grai lu na rè. “Dai teng man ai gaw, nanhtē hpe shălawt dat na ra ai” ngu, shi hpe kam sham ai ni hpe Yēsu tsun ai. (Yawhan 8:​32) Dai gaw hpa lăchyum rai ta?

Shălawt lam hpe ya nang hkam sha lu ai. Satan shăbra tawn ai, shut ai shărin shăga ni hte măsu măgaw ni kaw na nang lawt lu ai. Yehowa hpe n chyē ai măsha wan law law ni a myit măda lam kăta ai kaw na mung nang lawt lu ai. (Roma 8:​22) Kărai Kăsang a jinghku ni gaw, “Si lam hpe hkrit” ai kaw na pyi lawt ai.​—Hebre 2:​14, 15.

Kărai Kăsang a mungkan ga ningnan ē shă­lawt lam hpe nang hkam sha lu ai. Htawm hpang prat ē kădē mau hpa rē ai shălawt lam hpe nang hkam sha lu na a hka! Hparadisu aga ningtsa ē hpyen măjan, măchyi măkaw hte ruhka lam kaw na lawt na rè ai. Mătsan măyan hte kawsi hpang găra ai kaw na lawt lu na rè. Gawng kung ai hte si lam kaw na lawt lu na rè. Hkrit kang ai, dip rip ai hte n tăra ai ni kaw na mung lawt lu na rè ai. Kărai Kăsang hte seng nna Chyum laika ning nga ai: “Na a lăta hpe nang hpaw nga nna, hkrung măhkrung ni hpe kăja ai hte shăkat da mu ai.”​—Shăkawn Kungdawn 145:16.

 Kărai Kăsang a jinghku ni gaw prat dingsa asak hkrung na ma ai. Htani htana asak ngu ai gaw, Kărai Kăsang hte jinghku hku na mătu, shăkut ai ni yawng hpe Mădu jaw na mănu dan ai chyēju kumhpa rè. (Roma 6:​23) N htum n wai ai asak gaw, na a mătu hpa lăchyum nga na hpe sumru yu u!

Hkum sumhpa ni hpe gălaw na mătu, aten nga na ra ai. Nang gaw mădum sumpyi amyu mi hpe chyē dum na mătu, shă­rin la yang shărin la na rè. Shing n rai, sumla soi chyē na mătu, laksăma lăngai tai na mătu, shărin la yang shărin la na rè ai. Dusat dumyeng ni a lam, shing n rai hpun ni a lam shărin la măyu na rè. Shing n rai kăga mungdan hte kăga măsha amyu ni hpe nang sawk săgawn hkawm măyu na ndai. Htani htana asak lu tawn sai măjaw, ndai lam ni yawng hpe nang gălaw lu na rai ndai!

Jinghku law law hku lu na mătu, aten lu na rè. Prat dingsa asak hkrung lu ai măjaw, Kărai Kăsang a jinghku tai wa ai kăga măsha law law hpe nang chyē wa lu na rè ai. Shanhtē a ning htawng ni hte kăja ai mărai nsam ni hpe nang chyē wa lu nna, shanhtē mung na a jinghku ni tai wa na mă ra ai. Shanhtē hpe nang tsaw ra nna, shanhtē mung nang hpe tsaw ra na ma ai. (1 Korinhtu 13:8) N htum n wai ai asak lu tawn sai măjaw, aga ningtsa ting hta nga ai hkum shăgu hte jinghku hku na aten lu na rè! Kăja htum ai gaw, jaw prat shăning law law lai wa măgang, Yehowa hte jinghku hku ai lam gaw grau nna ngang kang wa na rè. Nang gaw Kărai Kăsang a jinghku prat dingsa tai wa wu ga!