Satan hte shi a nat mătsē ni gaw, Kărai Kăsang hpe nang daw jau na hpe n ra ma ai. Shanhtē gaw byin mai yang, măsha hkum shăgu hpe, Kărai Kăsang kaw na kăyin mat wa shăngun măyu ma ai. Dai hpe shanhtē kăning rai shăkut gălaw ma ni? Lam lăngai gaw shut ai naw ku htung hku rè ai. (2 Korinhtu 11:13-​15) Naw ku htung lăngai mi gaw Chyum laika kaw na teng man ai tăra hpe n shărin ya yang, shut ai. Shut ai naw ku htung gaw gumhpraw akya hte bung ai— ajet hte bung ti mung mănu n dan ai. Jam jau law law byin tai shăngun lu ai.

Shut ai naw ku htung gaw, teng man ai tăra hte seng ai Kărai Kăsang Yehowa a myit hte găloi mung hkrum lu na n rai. Yēsu aga ningtsa nga ai shăloi, shi hpe sat kau măyu ai naw ku hpung lăngai nga ai. Shanhtē a naw ku ai lam gaw, jaw ai lam rè ngu, shanhtē myit la ma ai. “Kărai Kăsang ngu ai, anhtē a Wa lăngai sha rai mă li ai,” ngu shanhtē tsun ma ai. Yēsu myit hkrum a ni? N hkrum ai. “Nanhtē gaw nanhtē a kăwa ngu ai, gumlau Nat hta na prat wa ai ni rai nga myit dai,” ngu shanhtē hpe shi tsun mu ai. (Yawhan 8:​41, 44) Kărai Kăsang hpe tinang dai naw ku nga ai ngu, dai ni, măsha law mălawng myit la ma ti mung, kăja nga yang shanhtē gaw Satan hte shi a nat mătsē ni hpe daw jau nga ma ai!​—1 Korinhtu 10:20.

 N kăja ai hpun gaw n kăja ai asi ni hpe si chyē ai zawn, shut ai naw ku htung gaw n kăja ai lam ni gălaw ai măsha ni hpe byin pru shăngun nga ai. Măsha ni gălaw ai n kăja ai amu ni a măjaw, mungkan ga gaw ruyak jam jau hte hpring nga sai. Lai kyang hten ai, găsat găla ai, lăgu lăgut ai, dip rip ai, măsha sat ai hte roi rip kau ai lam ni nga nga ai. Ndai n kăja ai lam ni hpe gălaw ai ni law mălawng gaw naw ku htung nga ti mung, shanhtē a naw ku htung gaw kăja ai lam hpe ta tut hkan sa na mătu shanhtē hpe n shădut ya mă lu ai. N kăja ai lam ni gălaw ai hpe shanhte n jăhkring kau yang, Kărai Kăsang a jinghku n mai byin ai.​—Mahte 7:​17, 18.

Shut ai naw ku htung gaw gawngngu sumla ni kaw akyu hpyi na shărin ya ai. Gawngngu sumla ni kaw akyu hkum hpyi mu nga, Kărai Kăsang tsun ai. Dai gaw sumru myit hte măren rè ai. Mărai lăngai ngai nang hpe găloi mung ga n shăga ai sha, na a sumla hte sha ga shăga nga yang, nang ra na n ni? Dai wa gaw na jinghku măjing byin mai na a ni? Byin mai na n rè. Yehowa gaw măsha ni hpe shi hte ga shăga shăngun măyu ai, asak n rawng ai gawngngu, shing n rai sumla hte n rè ai.​—Pru mat wa ai 20:​4, 5.

Shut ai naw ku htung gaw măjan byin ai aten ē, kăga măsha ni hpe sat lu ai ngu shărin ya ai. Kărai Kăsang a jinghku ni gaw shăda da tsaw ra ra ai nga, Yēsu tsun ai. Anhtē tsaw ra ai ni hpe anhtē n sat ai. (Yawhan 13:35) N kăja ai măsha ni hpe sat ai pyi shut ai. Yēsu a hpyen ni, shi hpe sa rim ai shăloi, shi a săpe ni shi hpe măkawp măga na mătu, găsat na ahkang shi n jaw ai.​—Mahte 26:51, 52.

Shut ai naw ku htung gaw n hkru ai măsha ni ngărai wan ē nni nkri chyum sha ai nga, shărin ya ma ai. Rai ti mung yubak gaw si ai lam de sa ai nga, Chyum laika shărin ya ai. (Roma 6:​23) Yehowa gaw tsaw ra myit rawng ai Kărai Kăsang rai nga ai. Tsaw ra myit rawng ai Kărai Kăsang gaw măsha ni hpe prat jănat zingri nga na a ni? Zingri na n rè. Hparadisu ē Yehowa ra shărawng ai naw ku htung lăngai sha nga să na rè. (Shingran 15:4) Satan a măsu măgaw ningtsa, dē da ai naw ku htung ni yawng mat mat na ra ai.