Nang gaw Kărai Kăsang a jinghku lăngai tai măyu yang, Kărai Kăsang ra shărawng ai naw ku htung hpe hkan ra ai. “Teng man ai hku naw ku ai ni” gaw, Kărai Kăsang hpe ‘Teng man ai tăra’ hte măren naw ku ra ai nga, Yēsu tsun ai. (Yawhan 4:​23, 24,) Kărai Kăsang hpe naw ku ai hta, teng man ai lam lăngai sha nga ai. (Ehpesu 4:​4-6) Teng man ai naw ku htung gaw htani htana asak hkrung ai de sa ai, n teng man ai naw ku htung gaw hten bya ai de sa ai rè.​—Mahte 7:​13, 14.

Teng man ai naw ku htung hpe hkan sa ai ni hpe yu nna, dai naw ku htung hpe chyē lu ai. Yehowa gaw mai kăja nga ai măjaw, shi hpe teng man ai hku naw ku ai ni mung, măsha kăja ni rai ra ai. Kăja ai lwi dwi hpun lăngai gaw kăja ai lwi dwi si ni hpe si ai zawn, teng man ai naw ku htung mung, kăja ai măsha ni hpe byin shăngun nga ai.​—Mahte 7:​15-​20.

Yehowa a jinghku ni gaw Chyum laika hpe hkungga lara ma ai. Chyum laika gaw Kărai Kăsang kaw na rè ai lam shanhtē chyē ma ai. Dai kaw tsun tawn ai gaw, shanhtē a asak aprat hpe mătsun ya na, mang hkang ni hpe hpăran ya na hte Kărai Kăsang a lam hpe shărin la na mătu, kărum ya ai. (2 Timohti 3:​16) Shanhtē gaw hkaw tsun ai hte măren, ta tut hkan gălaw ma ai.

 Yehowa a jinghku ni gaw shăda da tsaw ra hkat ma ai. Yēsu gaw Kărai Kăsang a lam shărin ya ai, măchyi măkaw ai ni hpe shămai ya ai hku, măsha ni hpe tsaw ra lam mădun ai. Teng man ai naw ku htung hpe ta tut hkan sa ai ni mung, kăga măsha ni hpe tsaw ra ai myit mădun ma ai. Yēsu zawn shanhtē gaw mătsan măyan ai ni, shing n rai amyu bawsang n bung ai ni hpe myit n yu kăji ma ai. Shanhtē shăda da tsaw ra myit mădun hkat yang gaw, shi a săpe ni rè ai hpe măsha ni chyē lu na ma ai ngu, Yēsu tsun wu ai.​—Yawhan 13:35.

Kărai Kăsang a jinghku ni gaw, Yehowa Kărai Kăsang a amying hpe hkungga la ra ma ai. Mărai lăngai ngai na amying hpe gang na nyet kau a yang, dai wa gaw na a hku hkau ai jinghku rai na kun? N rè ai. Anhtē hta ē jinghku lu yang, shi a amying hpe anhtē gang nhtawm, dai jinghku a mai kăja lam hpe kăga măsha ni hpe tsun dan ga ai. Dai măjaw Kărai Kăsang a jinghku tai măyu ai ni gaw shi a amying nsang hpe gang nna, Mădu a lam hpe kăga măsha ni hpe tsun dan ra ai. Anhtē dai zawn gălaw na hpe, Yehowa ra shărawng ai.​—Mahte 6:9; Roma 10:13, 14.

Kărai Kăsang a jinghku ni gaw, Yēsu zawn Kărai Kăsang a Mungdan a lam măsha ni hpe shărin ya ai. Kărai Kăsang a Mungdan gaw, ginding aga hpe Hparadisu shăbyin shătai ya na sumsing lamu atsuya rè ai. Kărai Kăsang a jinghku ni gaw, Kărai Kăsang a Mungdan kăbu găra shi ga hpe kăga măsha ni hpe kăran jaw ya ai.​—Mahte 24:14.

Yehowa saksē ni gaw, Kărai Kăsang a jinghku ni tai na mătu shăkut ma ai. Shanhtē gaw Chyum laika hpe hkungga ai hte, shăda da tsaw ra myit mădum ma ai. Shanhtē gaw Kărai Kăsang a amying nsang hpe gang nhtawm, hkungga la ra let, Kărai Kăsang a Mungdan a lam kăga măsha ni hpe shărin ya ma ai. Dai ni, ginding aga ningtsa ē Yehowa saksē ni gaw, teng man ai naw ku htung hpe ta tut hkan sa ma ai.