Nawku daw jau lam hte seng wa yang, Hkristan num langai gaw gara aten hta baw magap ra ai kun? Hpa majaw kun? Ndai lam hte seng nna, Pawlu tsun dan wa ai hpe yu yu ga. Karai Kasang hpe shagrau ai dawdan lam ni hpe galaw na matu, lam matsun ni shi ka wa ai. (1 Korinhtu 11:3-16) Ahkyak ai lam masum hpe shi tsun dan wa ai: (1) num langai baw magap nna galaw ra ai ni (2) baw magap ging ai masa ni (3) ndai tara hpe hkan sa ra na lam ni re.

Galaw ra ai ni. Akyu hpyi ai hte myihtoi htoi ai ngu ai lam lahkawng hpe Pawlu tsun wa ai. (Daw kaji 4, 5) Akyu hpyi ai ngu ai gaw, Yehowa hpe hkungga let ga shaga ai lam re. Ya aten, myihtoi htoi ai ngu ai gaw, Karai magam gun ai wa a Chyum Laika lam sharin achyin ya ai hpe tsun ai re. Akyu hpyi shagu, Chyum Laika sharin ya shagu, num langai gaw baw magap ra ai ngu Pawlu tsun nga ai rai kun? N re ai. Akyu hpyi ai masa, sharin ya ai masa ni hta hkan ai.

Masa ni. Dinghku hte nawku hpung a lam lahkawng hpe Pawlu tsun nga ai re. “Numsha a baw gaw lasha rai nga ai, . . . kadai numsha mung, akyu hpyi yang, shing n rai myihtoi ga tsun nga ai shaloi e, baw n magap a yang gaw, tinang baw a arawng jahpoi nga ai” ngu shi tsun ai. (Daw kaji 3, 5) Dinghku lamang hta madu wa hpe madu jan a baw hku nna Yehowa  masat da ai. Madu jan gaw, madu wa a ahkaw ahkang hpe n hkap la ai sha, madu wa hpe Yehowa ap da ai lit ni hpe galaw ai rai yang, madu wa hpe kaya jahkrum ai hte bung na re. Ga shadawn, madu wa nga ai aten hta Chyum ga sharin galaw ai rai yang, baw magap ai gaw madu wa a ahkaw ahkang hpe hkap la ai lam re. Madu wa gaw, hkalup hkam da ai raitim n raitim, dinghku a baw re ai majaw, madu jan gaw baw magap ra ai. * Hkalup hkam da sai asak kaji ai shadang sha nga ai rai yang, akyu hpyi na matu (sh) sharin achyin na matu ra wa yang baw magap ra ai. Kasha gaw dinghku a baw n raitim, hkalup hkam da sai Hkristan la ni a ahkaw ahkang hpe hkungga ai majaw re.

Nawku hpung hte seng nna, Pawlu ndai hku tsun ai: “marai langai ngai ndang kalang hkat mayu dam a yang gaw, anhte mung, Karai Kasang a Hpung ni mung, dai zawn re ai htung n nga ga ga ai.” (Daw kaji 16) Hkristan nawku hpung hta hkalup hkam da ai la ni sha, woi awn na ahkang lu da ai. (1 Timohti 2:11-14; Hebre 13:17) Myitsu salang hte magam tau hku nna aya tang hkrum ai la ni sha, sagu hpung hpe woi awn na matu, Karai Kasang jaw ai lit lu da ai. (Kasa 20:28) Raitim, atsam hpring nna hkalup hkam da ai la ni galaw ai lit langai hpe, Hkristan num langai galaw ra ai masa ni nga wa chye ai. Ga shadawn, atsam hpring nna hkalup hkam da ai hpunau n nga ai majaw, magam hkrumzup hpawng hpe nauna langai woi awn ra wa na re. Shing nrai, nta hta galoi mung galaw nga ai, Chyum sharin lamang hpe hkalup hkam da ai hpunau langai nga nga ai aten hta, galaw ai mung byin mai ai. * Ndai hku galaw ai lam yawng gaw, nawku hpung a lamang sha re. Dai majaw, la ni sha lu ai lit hpe shi galaw nga ai lam, hkap la ai hku nna baw magap na re.

Nawku daw jau lam nkau mi hta gaw, nauna langai baw magap n ra ai. Ga shadawn, zuphpawng ni hta mahtai jaw ai aten,  madu wa (sh) hkalup hkam da ai hpunau langai hte nta langai hpang langai hkaw tsun ai aten, hkalup n hkam shi ai ma ni hte Chyum Laika hkaja ai aten, akyu hpyi ai aten ni hta baw magap n ra ai. Kaga masa ni mung pru wa chye ai. Nauna langai gaw, hpa galaw ra na hpe atsawm n chye yang, kahtap nna sawk sagawn ging ai. * Tup hkrak n chye shi nna, baw magap ra ai ngu hkam sha wa yang, sumla hta lawm ai hte maren baw magap ai gaw n shut ai.

Hkan sa ra na lam ni. Daw kaji 10 hta Hkristan num langai, baw magap ra na lam lahkawng hpe mu lu ai: “lamu kasa ni hpe tau yu nna, numsha gaw baw ntsa e ahkang kumla nga ai gaw, sut nga ai.” Langai, “ahkang kumla” ngu tsun da ai hpe sadi yu u. Num langai baw magap ai gaw, nawku hpung hta hkalup hkam da ai la ni hpe, Yehowa ap da ai ahkang aya hpe hkap la ai lam madun ai re. Lahkawng, “lamu kasa ni hpe tau yu nna” ngu tsun ai ga hta mu lu ai. Num langai baw magap ai gaw, atsam kaba ai wenyi hkum ni hpe gara hku akyu jaw lu ai kun?

Sumsing lamu, ginding aga hta nga ai Yehowa a uhpung kata hta, Karai a awm dawm ahkang hpe hkap la nga ai hpe, lamu kasa ni mu mayu ma ai. N hkum tsup ai masha ni a kasi gaw, lamu kasa ni hpe akyu jaw lu ai. Teng sha nga yang, shanhte mung Yehowa a lamang hpe shagrit shanem let lata npu taw ra ai. Moi aten hta, lamu kasa law malawng gaw, chyam dinglik hkrum ai shaloi hkrat sum wa ma ai. (Yuda 6) Nawku hpung hta Hkristan num langai gaw, hkalup hkam da ai hpunau langai hta grau nna mahkrum madup, machye machyang hte hpaji byeng-ya grau nga ai raitim, ahkang aya hpe shagrit  shanem let, npu taw nga ai hpe lamu kasa ni mu na re. Masa nkau mi hta, nauna langai gaw hpang de Hkristu hte rau, uphkang lu na nammam chya hkrum ai Hkristan rai na re. Dai nauna gaw, lani mi hta lamu kasa ni hta grau ai ahkang aya lu nna, Hkristu hte rau sumsing lamu hta uphkang na re. Ya na zawn, shagrit shanem let npu taw ai gaw, lamu kasa ni a matu grai kaja ai kasi ningli re. Sadi dung let npu taw ai hku nna, sadi dung ai lamu kasa wan law law a man e, myit shagrit shanem ai lam madun lu ai gaw, nauna ni yawng a matu ahkaw ahkang kaba rai nga ai.