1, 2. Hkalup hkam ai aten ladaw gaw kadai ni a matu kabu hpa re ai kun?

NANG GAW, Yehowa a magam hpe shaning law law gun hpai wa sai nga yang, zuphpawng kaba ni hta hkalup mungga hpe lang hte lang, madat ga na re. Raitim, hkalup hkam na matu shawng na dung hkum hta dung nga ai masha ni rawt tsap dat ai hpe mu dat shagu myit kahpra nga na re. Dai aten hta shawa masha ni gaw, lahpawk hpe aja awa dum dat ai. Yehowa maga de tsap ai, ndai masha hpawng hpe yu nga ai aten hta, nang grai kabu nna myi prwi si ni ing wa na re. Kaja wa kabu gara ai aten ladaw nan rai nga ai.

² Anhte a buga ginra ni hta, hkalup hkam ai aten ladaw hpe laning mi hta, lahkawng masum lang hkrum na re. Lamu kasa ni gaw, grau nna pyi hkrum ga ai. Mungkan ting hta, bat shagu hkying hku law ai masha ni gaw, Yehowa a uhpung uhpawng de shang wa ai hpe mu ai shaloi, “sumsing lamu kata e grau nna kabu gara” nga na hpe shingran yu u. (Luka 15:7, 10) Lamu kasa ni gaw, ndai zawn rawt jat wa ai lam hpe mu ai shaloi, nachying kabu gara na re.​—Hagi 2:7.

3. Satan gaw “shabam ai hkanghkyi zawn” hpa majaw ningwan kahkrang hkawm nga ai kun? Shi hpa galaw mayu ai kun?

³ Raitim, hkalup hkam ai aten ladaw hpe pawt sin dawng let, yu nga ai wenyi hkrang ni mung nga ai. Hkying hku law ai masha ni gaw, nhkru ai ndai mungkan hpe kau da ai majaw,  Satan hte shi a nhkru ai nat ni gaw, nchyi nmu hkam sha nga ma ai. Hpa majaw nga yang, laja lana chyam dinglik hkrum yang, kadai mung Yehowa hpe jet ai tsawra myit hte nawku na, sadi dung na n re ngu Satan tsun wa ai majaw re. (Yoba 2:4, 5 hpe hti u.) Marai langai ngai Yehowa kaw apnawng shagu, Satan gaw masu ai wa re ai hpe madun nga ai. Dai gaw, Satan a shabyi hpe bat shagu lang hkying hku bye nga ai hte bung ai. Dai majaw, “shabam ai hkanghkyi zawn, ningwan kahkrang hkawm nga ai” gaw mauhpa n re. (1 Petru 5:8) Ndai “hkanghkyi” gaw, wenyi lam hku nna anhte hpe mayu na matu shakut nga ai. Karai Kasang hte anhte a hku hkau ai lam hpe, hten za shangun mayu ai (sh) mat mat shangun mayu ai.​—Shakawn 7:1, 2; 2 Timohti 3:12.

4, 5. (a) Yehowa gaw Satan hpe gara lam lahkawng hku nna hkang da ai kun? (b) Teng man ai Hkristan langai gara hpe kam mai ai kun?

 ⁴ Anhte gaw, grai nhkru ai hpyen hte hkrum nga ai raitim n hkrit ra ai. Hpa majaw kun? Yehowa gaw, dai “shabam ai hkanghkyi” hpe lam lahkawng hku nna hkang da sai majaw re. Dai lam lahkawng gaw hpa rai kun? Langai, Yehowa gaw du wa na “ru tsang kaba” kaw nna, teng man ai Hkristan “wunawng wuwa kaba” lawt wa na lam, tau hkrau tsun da ai. (Shingran 7:9, 14) Karai Kasang a myihtoi ga ni gaw galoi mung hpring tsup ai. Dai majaw, Karai Kasang a amyu masha yawng hpe mahkam n lu hkam ai lam Satan chye da ai.

⁵ Lahkawng ngu na hpe, moi na Karai Kasang a sadi dung ai mayam langai tsun wa ai, teng man ai tara kaw nna chye lu ai. Hkawhkam Asa hpe myihtoi Azaria gaw: “nanhte gaw Yehowa hpang maga nga ai hte yang, shi gaw nanhte hte rau nga na ra ai” ngu tsun ai. (2 Hk.La 15:2; 1 Korinhtu 10:13 hpe hti u.) Karai Kasang hte ani sha nga ai mayam ni hpe, Satan mayu na matu shakut ai hta, galoi n awng dang ai lam, labau ni gaw madun nga ai. (Hebre 11:4-40) Ya aten hta mung, Karai Kasang hte ani sha nga ai Hkristan langai gaw, Satan hpe ninghkap ai hta awng dang lu na re. Chyum Laika hta mung, “Nat Gumlau hpe Ban Hkum kau mu; shaloi shi nanhte kaw nna hprawng mat na ra ai” nga nna tsun da ai.​—Yaku 4:7.

6. Hkristan langai hpra hpe Satan gara hku gasat ai kun?

⁶ Wenyi majan hta Satan awng dang na n re. Raitim, anhte langai hpra n sadi yang, shi awng dang mat na re. Yehowa hte tawn da ai makyit sumri run mat hkra galaw lu ai nga yang, anhte hpe mayu kau lu ai lam Satan chye da ai. Dai hku byin hkra, Satan gara hku galaw ai kun? Shi gaw anhte hpe laja lana, langai hpra, maw lanyet ni hte gasat ai. Satan a madung ladat ni hpe hkaja yu ga.

7. Yehowa a masha ni hpe Satan hpa majaw laja lana gasat ai kun?

⁷ Laja lana gasat ai lam ni. Kasa Yawhan gaw, “mungkan ting gaw dai n hkru ai wa hta e lup mat wa ai” nga nna tsun da ai. (1 Yawhan 5:19) Dai ga hta, teng man ai Hkristan ni a matu sadi  jaw ga lawm ai. Satan gaw nhkru ai ndai mungkan ting hpe mayu ngut sai rai nna, Yehowa hpe sadi dung ai ni hpe myit maju jung let laja lana gasat nga ai. (Mihka 4:1; Yawhan 15:19; Shingran12:12, 17) Shi a aten kachyi sha ngam sai hpe chye ai majaw grai pawt nga ai. Dai ni aten hta shi a ladu lai nhkru ai lam hte jahten sharun ai lam ni hpe anhte ni hkrum nga ai.

8. Anhte ni gaw nhkru ai nat ni hte “gasat gala” nga ai lam kasa Pawlu tsun ai shaloi hpa hpe tsun mayu ai kun?

⁸ Langai hpra hpe gasat ai lam. “Anhte a gasat gala ai gaw, . . . sumsing lamu lahta tang e nga ai, n hkru n hkra ai nat a luksuk ni hpe mung, gasat gala nga ga ai” nga nna, Hkristan ni hpe kasa Pawlu sadi jaw wa ai. (Ehpesu 6:12) “Gasat gala” ngu ai ga si hpe Pawlu hpa majaw tsun wa ai kun? Masha lahkawng grai kamu hkat nga ai masa hpe tsun mayu ai majaw re. Dai ga si hpe Pawlu lang ai gaw, anhte langai hpra gaw nhkru ai nat ni hte gasat nga ai lam, ahkyak shatai tsun mayu ai re. Anhte gaw nat kamsham ai mungdan hta nga tim n nga tim, Yehowa kaw tinang hkum hpe apnawng dat ai aten kaw nna, Satan hte kamu hkat na matu, pinra ntsa de du nga sai lam galoi n mai malap ai. Hkristan langai hpra gaw, apnawng ai aten kaw nna dai zawn kamu hkat nga ai. Dai majaw, Pawlu gaw Ehpesu mare na Hkristan ni hpe ngang ngang tsap nga na matu, n-gun jaw wa ai gaw mauhpa n re.​—Ehpesu 6:11, 13, 14.

9. (a) Satan hte shi a nat ni gaw “hkalem hkalau” ai lam amyu myu hpe hpa majaw lang ai kun? (b) Anhte a sawn sumru ai lam hpe Satan hpa majaw hten za shangun mayu ai kun? Shi shakut ai lam ni hpe gara hku nna ninghkap kau lu na kun? (“ Satan A Maw Lanyet Ni Hpe Sadi U!” ngu ai lawk hpe yu u.) (c) Gara maw lanyet hpe ya bai bawngban na kun?

⁹ Maw lanyet ni. Satan a “hkalem hkalau ai lam hte” hpe dang manga kau lu na matu, Hkristan ni hpe Pawlu n-gun jaw wa ai. (Ehpesu 6:11) Pawlu gaw hkalem hkalau ai lam law law nga ai hpe tsun ai lam sadi u. Nhkru ai nat ni, maw lanyet amyu myu hpe jailang ai gaw, yaw shada lam nga ai. Hkristan nkau mi gaw, hkalem ai lam langai hkrum ai shaloi dang manga lu tim, loi mi na ai hpang kaga langai hta, bai hkrat sum mat ai. Dai majaw, Satan hte nhkru ai nat ni gaw, anhte langai hpra a akyang lailen hpe azi yu nna, gawngkya lam hpe tam nga ai.  Anhte a gawngkya lam hpe ahkaw ahkang la nna gasat ai. Raitim, Chyum Laika hta Satan a maw lanyet ni hpe tsun da ai majaw, anhte shi a yaw shada lam ni hpe chye lu ai gaw, grai chyeju dum hpa re. (2 Korinhtu 2:11) Ndai laika buk a shawng daw hta, arung arai hpe madung tawn ai lam, akyang hten za hkra hkalem ai lam hte shoihpa nga ai manaw manang ni zawn, maw lanyet ni a lam hpe bawngban wa sai. Ya Satan a maw lanyet ni kaw na nat hpaji hkan ai lam, ngu ai hpe bawngban ga.

10. (a) Nat hpaji hkan ai ngu ai gaw hpa rai kun? (b) Nat hpaji hkan ai hpe Yehowa gara hku mu mada ai kun? Nang mung dai hpe gara hku mu ai kun?

¹⁰ Masha langai nat hpaji hkan ai ngu ai gaw, nhkru ai nat ni hte dingtawk matut mahkai ai re. Nat hpaji hkan ai ni hta shaba wawt ai, hpyi bau ai, shung sha chye ai, tsu hte shaga ai lam ni lawm ai. Yehowa gaw nat hpaji hkan ai hpe “matsat shabat” hku nna, mu mada ai hpe anhte chye da ai. (Tara Ja. 18:10-12; Shingran 21:8) Anhte mung “n hkru n hkra ai hpe matsat nga” ra nna, nhkru ai nat ni hte kanawn mazum na matu, tsep kawp myit na n re. (Roma 12:9) Dai matsat shabat akyang gaw, anhte a sumsing lamu na Wa, Yehowa hpe sadi n dung ai lam re ai.

11. Anhte ni nat hpaji hkan ai gaw, hpa majaw Satan a matu awng padang re ai kun? Ga shadawn tsun u.

¹¹ Nat hpaji hkan ai gaw, Yehowa hpe sadi n dung ai lam re ai majaw, anhte kaw na nkau mi hpe dai hta shang lawm na matu Satan grai shakut nga ai. Hkristan langai nat hpaji hkan wa hkra lu galaw shagu, Satan awng padang lu ai. Hpa majaw kun? Ga shadawn, hpyen la langai gaw, kaga hpyen dap de shang mat ai nga yang, shi shang mat ai dai hpyen dap kaw na du kaba gaw grai kabu na re. Dai hpyen la a shawng na du kaba hpe kaya jahkrum ai hku nna, dai hpyen la hpe shi lu zing ai arung arai langai hku nna hkan madun na re. Dai zawn sha, Hkristan langai nat hpaji hkan na nga yang, Yehowa hpe ding sang sadi n dung ai rai nna, tinang hkum tinang mung Satan a shangun ma byin shangun ai. Dai wa hpe zing lu ai arung arai langai zawn hkan madun lu ai hpe, Satan grai myit dik na re. Anhte kadai mung  Satan hpe awng dang shangun mayu na n re. Yehowa hpe anhte sadi dung mayu ai.

12. Nat hpaji hkan ai hte seng nna anhte a ningmu hpe shingkang ka-up na matu Satan gara ladat hpe jailang ai kun?

¹² Nat hpaji hkan ai hpe anhte ni matsat nga dingsa, Satan gaw dai nat hpaji hte anhte hpe dang lu na n re. Dai majaw, anhte a sawn sumru ai lam hpe galai shai kau ya ra ai hpe shi chye ai. Gara hku galaw ai kun? “N kaja ai hpe kaja ai, kaja ai hpe n kaja ai” ngu Hkristan nkau mi myit la hkra shi galaw ai. (Esaia 5:20) Shaning law law, shi awng dang wa ai ladat ni hta na langai re ai, ga san ni hte ntsen ai myit nga hkra galaw ai lam hpe Satan bai jailang nga ai.

13. Ga san ni hte ntsen ai myit nga hkra galaw ai lam hpe Satan gara hku jailang wa ai kun?

¹³ Lai wa sai aten hta, dai ladat hpe Satan gara hku jailang wa ai hpe sadi u. Satan gaw, Edin sun hta Ewa hpe “Ndai sun hta tu ai hpun mahkra hta na, nan n sha lu na rai myit dai, nga nna Karai Kasang kaja wa tsun a ni?” nga nna san ai. Yoba a prat hta mung, sumsing lamu hta lamu kasa ni zuphpawng langai galaw nga ai shaloi, “Yoba gaw Karai Kasang hpe kaman sha hkrit kamyin nga a ni?” nga nna Satan san wa ai. Yesu mungkan ntsa magam gun hpang ai shaloi, Satan gaw “Nang Karai Kasang a Kasha rai n yang gaw ndai nlung ni hpe muk tai mu ga, tsun u!” nga nna Hkristu hpe jahpoi asawng wa ai. Myit yu u, Satan dai hku n tsun shi yang, lai wa sai bat kru daram hta, Yesu hte seng nna Yehowa nan “Ndai wa gaw ngai sharawng awng nga ai, ngai tsawra ai Kasha rai nga li ai” ngu tsun ai ga hpe Satan jahpoi asawng tsun gwi ai.​—Ningpawt 3:1; Yoba 1:9; Mahte 3:17; 4:3.

14. (a) Satan gaw nat hpaji hkan ai hte seng nna, ntsen ai myit nga hkra maw lanyet ni hpe gara hku jailang nga ai kun? (b) Ya gara lam hpe hkaja na kun?

¹⁴ Nat hpaji hkan ai a shoihpa hte seng nna, ntsen ai myit nga wa hkra, dai ladat hpe sha dai ni aten du hkra, Satan jailang nga  ai. Hkristan nkau mi a myit hta ntsen ai myit shang wa hkra, shi galaw lu wa ai gaw yawn hpa rai nga ai. Nat hpaji hkan ai gaw, teng sha dai daram sawng ai kun, ngu ntsen ai myit ni shang wa ai. (2 Korinhtu 11:3) Shanhte a dai ningmu hpe gara hku shading sharai ya lu na kun? Satan a maw lanyet ni hta, anhte n hkrat sum na matu gara hku galaw ra na kun? Mahtai lu na matu, anhte a prat hta ndum shami nat hpaji lawm hkra, Satan galaw da ai ladat lahkawng hpe yu yu ga. Dai ni gaw ban sa ai lam hte hkamja lam re ai.

15. (a) Sinna mungdan na masha law law gaw, nat hpaji hkan ai hpe gara hku mu ai kun? (b) Nat hpaji hkan ai hte seng nna ndai mungkan a ningmu ni gaw, Hkristan nkau mi hta gara hku shang wa sai kun?

¹⁵ Sinna mungdan ni hta mandan hpaji, hpyi hpaji, nat hpaji hte matut manoi nga ai lam ni hpe grau grau nna, ahpa atang myit la wa nga sai. Sumla hkrung ni, laili laika ni, TV lamang ni hte computer game ni hta nat hpaji hkan ai hpe pyaw hpa, prat dep nna shoihpa n nga ai zawn, grau nna madun nga ai. Mandan hpaji hpe madung hkrang shapraw da ai, sumla hkrung hte laili laika nkau mi hpe masha law law grai ra sharawng ai majaw, myit lawm ai ni shada da uhpung uhpawng ni hku nna pyi hpawng de da ma ai. Mandan lakle hpaji a shoihpa hpe ahpa atang sawn la hkra galaw ai hta, nhkru ai nat ni awng dang nga ai gaw teng sha re. Nat hpaji hkan ai hpe ahpa atang sawn la ai myit gaw, Hkristan ni hta shang nga sai kun? Hkristan nkau mi a sawn sumru ai lam hta shang nga sai. Gara hku nna kun? Mandan hpaji hpe madung da ai sumla hkrung hpe Hkristan langai yu ngut ai hpang, “ndai sumla hkrung hpe yu ai sha re, nat hpaji hkan ai n re” ngu, lawt ga tsun ai. Dai hku myit sawn sumru ai gaw, hpa majaw shoihpa nga ai kun?

16. Nat hpaji hpe madung da ai ni hpe lata yu ai gaw hpa majaw shoihpa nga ai kun?

¹⁶ Nat hpaji hkan ai hte yu ai gaw n bung timung, mandan hpaji hte seng ai hkrang shala ni hpe yu ai gaw, shoihpa n nga  ai ngu tsep kawp n lu tsun ai. Hpa majaw kun? Ndai lam hpe myit yu ga; Satan hte nhkru ai nat ni gaw, anhte hpa sumru nga ai hpe n chye lu ai ngu, Chyum Laika hta tsun da ai. * Dai majaw, nhkru ai nat ni gaw anhte sumru ai lam, gawngkya lam ni hpe chye na matu, ban sa lam lata ai hte arawn alai ni hpe azi yu nga na re. Nat sara, mandan lakle, nat shung ai lam ni (sh) nhkru ai nat ni hte seng ai sumla hkrung ni, laili laika ni hpe sharawng ai myit madun ai Hkristan langai a akyang gaw, nat ni hpe shiga sa ai hte bung ai. Dai gaw, shi a gawngkya lam madun nga ai re. Dai shaloi dai nhkru ai nat ni gaw, dai wa a gawngkya lam ni hpe amyat shaw nna, shi hpe dang lu hkra laja lana gasat na ra ai. Dai hku nna, nkau mi gaw mandan hpaji hpe madung da ai ban sa lam ni hpe chyam yu ai kaw nna, nat hpaji hpe myit lawm mat ai. Jahtum hta shanhte nan nat hpaji hkan mat ai.​—Galati 6:7 hpe hti u.

17. Satan gaw machyi ai ni hpe gara maw lanyet ni hte amyat shaw chye ai kun?

¹⁷ Anhte a ban sa mayu ai myit hpe sha n-ga, hkam kaja mayu ai myit hpe mung, Satan amyat shaw na matu shakut nga ai. Gara hku nna kun? Hkam kaja lam n nga ai Hkristan langai gaw, lam amyu myu hte tsi n mai ai shaloi myit daw nga na. (Marku 5:25, 26) Dai gaw, Satan hte nhkru ai nat ni a matu ahkaw ahkang rai mat na re. “N hkru n hkra ai” ni a karum shingtau n la na matu, Chyum Laika hta sadi jaw da ai hpe shi chye da ai. (Esaia 31:2) Dai sadi jaw ga hpe n madat na matu nhkru ai nat ni gaw, machyi ai wa gara hku tsi na n chye mat ai shaloi, “laklai ai dagu” (sh) nat hpaji lawm ai tsi ladat hte tsi na matu hkalem na re. Nhkru ai nat ni a maw lanyet ni awng dang wa yang, Karai Kasang hte machyi ai wa a hku hkau lam hten za mat chye ai. Gara hku nna kun?

18. Hkristan langai gaw gara tsi ladat ni hpe nyet kau ra ai kun? Hpa majaw kun?

 ¹⁸ “Laklai ai dagu” jailang ai Israela masha ni hpe Yehowa gaw: “Nanhte lata ladawn yang, ngai myi man makoi mat na nngai; gaja wa, nanhte akroi anoi akyu hpyi timung, ngai n madat na nngai” nga nna sadi jaw wa ai. (Esaia 1:15) Akyu hpyi ai lam hpe shing dang ya ai, Yehowa a karum shingtau n lu shangun ai lam ni hpe anhte galoi mung koi mayu ai. Grau nna gaw, machyi nga ai shaloi re. (Shakawn 41:3) Dai majaw, hpa machyi ai hpe chye na matu (sh) tsi ladat langai hta nat hpaji lawm ai zawn rai yang, teng man ai Hkristan langai gaw dai hpe nyet kau ging ai. * (Mahte 6:13) Dai hku galaw yang, Yehowa a karum shingtau hpe matut lu na gaw teng sha re.​—“ Ndai Gaw Teng Sha Nat Hpaji Hkan Ai Lam Rai Kun?” ngu ai lawk hpe yu u.

19. (a) Satan gaw shi a dagu hte seng nna masha law law kam hkra gara hku galaw wa sai kun? (b) Teng man ai Hkristan ni gaw gara maumwi ni hpe koi ra ai kun?

¹⁹ Sinna mungdan na masha law law gaw, Satan galaw lu ai atsam a shoihpa hpe ahpa atang sawn la timung, mungkan a kaga ginra ni hta gaw dai hku n re ai. Dai ginra ni hta, Satan gaw shi hta teng sha nga ai dagu  hta grau nna, dagu nga ai ngu masha law law hpe kam hkra galaw nga ai. Masha nkau gaw, nhkru ai nat ni a hpyen hpe hkrit kajawng let, galaw lu galaw sha nna asak hkrung nga ma ai. Nhkru ai nat ni dagu kaba ai hte seng nna, maumwi ni law law nga ai. Dai maumwi ni hpe sharawng shara hte tsun ma ai majaw, masha ni grai myit lawm let madat ai. Anhte dai zawn maumwi ni hpe shabra ging ai kun? Teng man ai Karai Kasang a mayam ni gaw, ahkyak ai lam lahkawng a majaw dai hku shabra na n re.

20. Masha langai gaw Satan a myit jasat hpe n myit mada ai sha gara hku nna shabra chye ai kun?

²⁰ Langai, nhkru ai nat ni atsam kaba ai hte seng ai maumwi ni hpe htawn tsun ai gaw, Satan hpe n-gun jaw ai hte bung ai. Gara hku nna kun? Chyum Laika hta Satan gaw, dagu lu madun ai lam tsun da ai. Raitim, shi gaw “masu ai mauhpa amyu myu” hte “hkalem hkalau ai amyu shagu” hpe jailang ai, nga nna mung sadi jaw da ai. (2 Htesaloni 2:9, 10) Satan gaw  hkalem hkalau ai hta grai kung hpan ai majaw, nat hpaji myit lawm ai ni hpe gara hku shingkang ka-up na, n teng n man ai lam ni hpe kam hkra, gara hku galaw ra na lam ni hpe shi chye ai. Shanhte nan mu ai, na ai ni hpe kam nna, shanhte a mahkrum madup ni a lam kaga masha ni hpe mung, teng man ai zawn bai tsun dan na ra ai. Dai hku nna langai hpang langai tsun mat ai gaw, lai lai jan jan tsun ai du hkra byin mat ai. Hkristan langai gaw, dai maumwi mausa ni hpe shabra yang, “masu magaw ai a kawa” Satan shangun ai hpe teng sha galaw nga ai lam re. Dai hku nna, shi gaw Satan a myit jasat hpe shabra ya nga ai.​—Yawhan 8:44; 2 Timohti 2:16.

21. Gara lam hpe sha anhte madung tsun mayu ai kun?

²¹ Lahkawng, nhkru ai nat ni dingbai dingna jaw ai hpe tinang hkrum wa ai raitim, Hkristan langai gaw dai mahkrum madup hpe azin ayang bai tsun tsun n mai galaw ai. Hpa majaw kun? “Makam masham a npawt nhpang hte jahkum shatsup ya ai wa Yesu hpe azi yu” na matu, matsun da ai majaw re. (Hebre 12:1) Anhte gaw Satan hpe n re ai sha, Hkristu hpe sha myit maju jung ra ai. Mungkan ntsa hta Yesu nga ai shaloi, Satan lu galaw ai lam ni, kasa ni hpe grai tsun dan lu tim, nat ni a lam sharawng shara n tsun wa ai. De a malai, Yesu gaw Mungdan kabu gara shiga hpe sha myit maju jung wa ai. Dai majaw, Yesu hte kasa ni hpe kasi la ai hku nna, “Karai Kasang a mauhpa amu magam lam” ni hpe sha anhte tsun mayu ga ai.​—Kasa 2:11; Luka 8:1; Roma 1:11, 12.

22. “Sumsing lamu” hta “kabu gara” hkra anhte gara hku galaw mai ai kun?

²² Yehowa hte anhte a hku hkau lam hten za mat hkra, Satan gaw nat hpaji hkan ai lam hte maw lanyet law law hpe jailang nga ai. Raitim, anhte gaw nhkru ai lam yawng hpe matsat nna, kaja ai lam hpe sha manoi manat nga ra ai. Nat hpaji hte seng ai lam yawng hpe nyet kau na ngu ai, anhte a dawdan lam hpe jahten na matu, Satan hpe ahkang jaw na n re. (Ehpesu 4:27 hpe hti u.) Anhte ni gaw Satan n nga mat ai aten du hkra, shi a “hkalem hkalau ai lam hte hpe manga kau lu” na nga yang “sumsing lamu kata e” kade daram “kabu gara” nga na hpe shingran yu ga.​—Luka 15:7; Ehpesu 6:11.