Jinghku (sh) hku hkau ai manang langai, mara galaw nna myit malai n lu ai majaw, nawku hpung kaw na shapraw hkrum ai shaloi, anhte ni tsun n dang hkra yawn ai. Chyum Laika matsun hpe hkan sa ai gaw, Karai Kasang hpe anhte kade daram tsawra ai, Karai Kasang a yaw shada lam hpe kade daram sadi dung ai lam madun ai. * Ndai lam hte seng nna, ga san nkau mi hpe bawngban yu ga.

Shapraw hkrum ai wa hte gara hku kanawn ging ai kun? Chyum Laika hta “hpunau ngu ai wa gaw, hpye ai hte nammak lawhpa ai, gawngngu sumla nawku ai, shatan nhkan ai, chyaru ya shang ai hte dip lu dip sha ai wa rai nga a yang gaw, n kanawn lu ai hta n-ga, shing re ai wa hte n jawm lu n jawm sha” na matu tsun da ai. (1 Korinhtu 5:11) “Hkristu a sharin shaga ai lam hpe tawt lai ai hte n hkan nang ai” masha hte seng nna mung, “dai wa hpe nta kata de hkum shashawn mu; shi hpe hkum hkap shachyen nga mu: kaning rai nme law, dai wa hpe hkap shachyen ai masha gaw, shi a n kaja ai hpai lau hta e lawm mat wa ai” ngu tsun da ai. (2 Yawhan 9-11) Anhte gaw shapraw da ai wa hpe, Chyum Laika lam tsun dan ai (sh) kanawn mazum ai lam ni n mai galaw ai. 2002 August, Anhte A Mungdan Magam (km-BU), laika man 3 hta ndai hku tsun ai: “Marai langai ngai hpe ‘kaja ai i’ ngu nna shakram ai gaw, shi hte matut nna ga shaga na matu, manang byin wa na matu nambat langai lahkam re. Shapraw da ai wa hte dai zawn galaw mayu na kun?”

Teng sha koi ra na kun? Koi ra na lam law law nga ai. Langai, ndai gaw Karai Kasang hte Karai a Mungga ntsa sadi dung ai hpe madun ai. Yehowa a ga hpe madat loi ai aten hta sha n-ga, yak ai aten ni hta mung, anhte madat mara na re. Karai Kasang hpe tsawra ai majaw, Karai a hkang da ai tara yawng hpe hkan sa ai. Karai Kasang gaw tara rap ra nna, anhte hpe tsawra ai hta n-ga, shi a hkang da ai tara ni gaw anhte hpe grai akyu  jaw ai. (Esaia 48:17; 1 Yawhan 5:3) Lahkawng, myit malai n lu ai mara galaw ai wa hte n kanawn ai gaw, anhte hte nawku hpung hta nga ai kaga masha ni a nawku daw jau lam hte akyang lailen ni hpe makawp maga ya ai. Dai hta n-ga, nawku hpung a kaja ai mying hpe mung makawp maga ya ai. (1 Korinhtu 5:6, 7) Masum, Chyum Laika tara hte maren anhte ja ja tsap nga ai gaw, shapraw da ai wa hpe mung akyu jaw ai. Tara komiti dawdan ai hpe anhte madi shadaw ai gaw, myitsu salang ni karum ya ai hpe n hkap la shi ai, shapraw da ai wa a myit masin hpe shadut ya na re. Tsawra ai ni hte kanawn mazum lam n nga mat yang, “shi myit dum” wa na re. Shi a mara kaba ai hpe mung chye nna, Yehowa hpang bai kayin wa na matu shakut wa na re.​—⁠Luka 15:17.

Jinghku langai shapraw hkrum yang gara hku kun? Ndai masa hta dinghku makyit sumri gaw, anhte a sadi dung ai lam hpe chyam dinglik chye ai. Shapraw da ai wa hpe gara hku kanawn ging ai kun? Byin wa chye ai masa shagu hpe tsun dan lu na gaw n raitim, masa lahkawng hpe myit yu ga.

Masa nkau mi hta, shapraw da hkrum ai nta masha hte nta langai hta sha rau nga ai rai na re. Shi shapraw kau hkrum nna, dinghku makyit sumri di mat na n re ai majaw, dinghku bungli ni matut galaw nga na re. Raitim, shi lata wa ai lam a majaw, shi hte makam masham bung ai nta masha ni a lapran na, nawku daw jau lam makyit sumri gaw di mat wa sai. Dai majaw, sadi dung ai nta masha ni gaw, nawku dawjau lam hte seng ai lam ni hta, shi hpe lawm shangun sana n re. Ga shadawn, dinghku nawku galaw ai hta shi n mai lawm ai. Raitim, shapraw hkrum ai wa gaw, ma kaji naw rai yang shi hpe sharin achyin na matu, Kanu Kawa ni hta lit naw nga ai. Dai majaw, tsawra myit nga ai Kanu Kawa ni gaw, ma hpe Chyum Laika sharin ya na matu lajang mai ai. *​—⁠Ga Shagawp 6:20-22; 29:17.

Masa nkau mi hta, shapraw da hkrum ai jinghku wa gaw, nta masha ni hte rau n nga ai rai na re. Dinghku lam ni hte seng nna, hkyak hkyak bawngban ra wa yang gaw matut mahkai  mai ai. Raitim, shadawn sharam ging ai. Sadi dung ai Hkristan dinghku gaw rau n nga ai shapraw da hkrum ai wa hpe, ahkyak ai lam n nga ai sha, matut mahkai na n re. De a malai, Yehowa hte uhpung a ntsa sadi dung nna, shapraw ai lamang hpe hkan sa na re. Dai hku galaw ai gaw, shi a kaja htum akyu hpe ra sharawng ai majaw re. Dai hku nna shapraw da hkrum ai wa gaw, daru sharin ai lam a akyu hpe chye na wa na re. *​—⁠Hebre 12:11.