Karai Kasang n ra ai akyang re ai, tinang hkrai ngang kayut shamai ai gaw tinang akyu tam ai myit jasat hpe n-gun jaw nna, n kaja ai ni hpe sumru shangun ai. * Tinang hkrai ngang kayut shamai ai wa gaw, kaga masha ni hpe ngang kayut shamai ai rai hku nna sha mu ai. Ngang hpe marai lahkawng a tsawra myit hpe madun ai hku n re ai sha, chyahkring mi na ngwi pyaw lam jaw ai, ngang kayut myit katu ai hpe shayawm ya ai hku nna sha mu mada ai. Dai hku shamai ai gaw, chyahkring mi sha re ai. Tinang hkrai ngang kayut shamai ai gaw, “hpye ai amu, awu asin re ai amu, ngang kayut ai, n hkru n hkra re ai marin marit” chye ai hkum hkrang a daw shan ni hpe sat kau na malai, grau myit rawt shangun ai.​—⁠Kolose 3:5.

Kasa Pawlu gaw: “Tsawra ai ni e, . . . hkum hkrang hte wenyi hpe awu asin di kau ai matsat shabat hta na tinang hkum hpe jasan jaseng kau nhtawm, Karai Kasang hpe hkrit hkungga let shachyoi shapra ai lam shatup nga ga” ngu ka wa ai. (2 Korinhtu 7:1) Dai ga ni hpe hkan sa na matu yak tim matut nna shakut u. Yehowa gaw “mara raw kau ya” na matu hte karum ya na matu galoi mung jin nga ai. (Shakawn 86:5; Luka 11:9-13) Na a myit masin gaw nang hpe mara shagun ai, dai akyang mat na matu shakut ai gaw, nang hta kaja ai myit nga ai hpe madun ai. Dai hku shakut ai hta hkrat sum ai aten ni nga na re. Raitim, “Karai Kasang gaw anhte a myit hta grau kaba nga ai rai nna, yawng mayawng hte chye nga ai” ngu ai hpe dum u. (1 Yawhan 3:20) Karai Kasang gaw anhte a mara ni hpe  sha mu ai n re; yawng hpe chye ai. Dai majaw, anhte hpyi nem ai ga ni hpe atsawm sha madat ya ai. Jam jau ai aten hta Kawa hpang kagat sa ai ma zawn, Karai Kasang hpang myit rawt let, shagrit shanem ai hku akyu hpyi na matu hkum myit tsang. Yehowa gaw nang hpe san seng ai myit nsam jaw na re. (Shakawn 51:1-12, 17; Esaia 1:18) Nang mung akyu hpyi ga hte maren galaw ra ai. Ga shadawn, nse nsa sumla ni, n kaja ai manaw manang ni hpe koi na matu shakut ra ai. *

Nang hta tinang hkrai ngang kayut shamai ai akyang naw nga ai nga yang, Hkristan Kanu Kawa (sh) kung hpan nna chye na ya ai myit nga ai, manang langai hpe tsun dan u. *​—⁠Ga Shagawp 1:8, 9; 1 Htesaloni 5:14; Titu 2:3-5.