“Ngai gaw mungdan a dingdung maga kaw nga kaba wa ai. Ngai naw kaja ai shaloi, nye nta masha ni hte kaga dinghku langai gaw, lamu ga madu ai hte seng nna ningdang hkat wa ai. Manghkang hpe hparan na matu, tsi sara hpe shaga ai. Tsi sara gaw la langai hpe pat lang da shangun nna, sumpan ahpraw hte magap kau dat ai. Kade n na yang, magap hkrum ai wa gaw salat ni pru wa nna, kari kawa byin wa ai. Shi lang da ai pat hpe yu dat yang, ‘dingla langai hpe mu ai. Palawng ahpraw hpun da ai. Galu ai, asak kaba sai, kara hpraw sai, baw gum nna lam hkawm wa ai’ ngu nna grai mau ai hku tsun wa ai.” ngu nna Siera Leyun kaw nga ai Da Uda tsun ai.

“Shi gaw nye kaji a nsam hpe tsun dan nga ai re. Bai nna ‘ngai tsun ai hpe n kam yang, tinang hkrai sa yu u’ ngu nna mung kari kawa tsun ai. Kadai mung n yu gwi ma ai. Tsi sara gaw tauba si jahkraw kaw na mandan hka hpe namlap hte madit nna pat lang da ai wa hpe lapri ya nna simsa hkra galaw ya ai.

“Ndai lamu ga gaw, anhte nta masha ni madu ai re ngu nna pat lang da ai wa kaw nna ‘aji’ tsun ai. Myit tsang lam n nga ai sha, ndai ga kaw bungli galaw u ngu nna adwi hpe tsun ai. Ndai dawdan lam hpe kaga kun dinghku mung hkap la nna manghkang hpe hparan lu wa ai.”

Dai zawn mahkrum madup ni gaw, sinna Ahprika maga de grai byin ai. Si mat sai ni gaw Mungkan ga a maga mi de, wenyi mungkan kaw nna mungkan ga hta asak hkrung nga ai ni hpe yu nga ai, shanhte a prat hpe shingkang ka-up taw nga ai ngu nna wan hku law ai masha ni kam ma ai. Dai hku kam ai gaw jaw ai kun? Si mat sai ni asak naw hkrung nga ai kun? N nga ai nga yang, si mat sai ni a wenyi ngu ai ni gaw kadai ni kun? Dai ga san ni a tengman ai mahtai hpe chye lu na matu grai ahkyak ai. Hpa majaw nga yang, asak hkrung ai, si ai hte seng ai majaw re.