Masha ni hpe hkalem na matu Satan hte nat ni hpa majaw shakut shaja nga ai kun? Shanhte a gumlau ai lam hta, anhte hpe mung lawm shangun mayu na re. Shanhte hpe nawku shangun mayu na re. Shanhte a masu ga ni hpe kam shangun mayu ma ai. Yehowa Karai Kasang n ra ai lam ni hpe galaw shangun mayu ma ai. Dai lam ni hta, si mat ai masha ni hte matut mahkai ai htung mung lawm ai.

Tsawra ai marai langai ngai si mat yang, myit grai yawn nna hkamsha na re. Dai zawn masa hpe masha shagu hkrum ma ai. Lazaru si mat ai shaloi, Yesu mung “myi prwi pru” wa ai.—Yawhan 11:35.

Si hkrung si htan hte seng nna htung lailen amyu myu nga ai. Law malawng gaw, Chyum Laika npawt tara hte n shai ai. Raitim, nkau htung ni gaw, si mat ai ni naw asak hkrung nga ai, asak hkrung nga ai ni hpe mu lu ai ngu nna tsun ma ai. Moi mang sin ai lamang ni, hkrapngu hkrap ngoi nna yawn hkyen ai lam madun ai lamang ni hte makoi mayang lamang yawng gaw, si mat ai wa a wenyi masin pawt na hpe hkrit tsang ai majaw galaw ma ai re. Si mat ai ni gaw “hpa n chye ma ai” re majaw, dai zawn galaw yang Satan a masu magaw lam hpe madi shadaw ai hte bung mat na re.—Hpaji 9:5.

Kaga htung ni hte lamang ni mung, si mat ai masha ni gaw asak hkrung nga ai ni kaw na karum shingtau lam ra ai, shanhte hpe myit dik hkra n galaw ya yang shoihpa nga chye ai ngu ai kamsham lam ni kaw na paw pru wa ai re. Mungdan nkau mi hta, lusha poi ni hte hkungga nawng poi ni hpe masha si mat ai hpang, bat mi, 40 ya (sh) laning mi na ai hpang galaw ma ai. Dai hku galaw ai gaw, si mat ai wa a wenyi hpe ‘lawt mat’ hkra karum ya ai ngu nna tsun ma ai. Anhte mu ga ai hpang na lam langai gaw, lusha hte hka hpe sak jaw ya ai re.

Dai zawn galaw ya ai gaw shut ai. Hpa majaw nga yang, si hkrung si htan hte seng ai Satan a masu ga hpe madi shadaw ya ai majaw re. Nat ni a sharin achyin lam hpe npawt tawn ai htunghking ni hpe galaw yang Yehowa ra sharawng na kun? Ra sharawng na n re.—2 Korinhtu 6:14-18.

Tengman ai Karai Kasang a mayam ni gaw, Satan a masu magaw lam ni hpe madi shadaw ai gara lam hta mung shang lawm na n re. De a malai, asak hkrung ngam nga ai ni hpe tsawra myit hte karum ya nna, shalan shabran ya na re. Si mat ai ni hpe Yehowa langai sha karum shingtau ya lu ai hpe shanhte chye da ai majaw re.—Yoba 14:14, 15.

Masha nkau mi gaw, nat ni hte ding tawk (sh) nat shung ai ni kaw nna matut mahkai galaw ma ai. Dai hpe nat hpaji ngu shaga ai. Hpyi hpaji, hpyi lamum shung sha ai ni, mandan hpaji, htawm hpang hpe hkaw sha ai ni, masha chyasi a lam san shaga ai ni hpe nat hpaji ngu shaga ai.

Dai lam ni hpe Chyum Laika hta jahpoi asawng da ai. “Shaba wawt ai wa, myihtoi htoi ai wa, lawng dat chye ai wa, mandan bau chye ai wa, ahkyu hkyu chye ai wa, atsu hte shaga chye ai wa, shung sha chye ai wa hte gumhpan hpan ai wa langai mi muk nanhte hta nga lu na n rai. Kaning rai nme law, ndai lam galaw ai wa kadai mung Yehowa man e matsat shabat rai nga ai.”—Tara Jahprang 18:10-12.

Nat hpaji hte seng nna Yehowa gaw hpa majaw aja awa sadi jaw ai rai kun?

Nat hpaji yawng hte seng nna Yehowa sadi jaw ai lam gaw anhte a akyu a mayu re. Karai Kasang gaw masha ni hpe tsawra nna lanu lahku ai. Nhkru ai nat ni hte matut mahkai yang, jamjau hkrum na re ai hpe Karai Kasang chye ai.

Brazi mungdan na Nida gaw nat sara langai re. Nat gaw shi a prat hten mat hkra galaw wa ai. “Nye kata hta nga taw ai nat gaw, ngai wora, ndai galaw na matu aming jaw ai. Dai hpe ngai gaw dum dat yu, n dum dat yu byin nna, myit hkamja lam hte seng nna manghkang ni byin wa ai. Nhkru ai nat ni nau zingri ai majaw, lasaw lasa ni pyi hkra machyi wa ai. Machyi shakawp ya lu ai tsi ni, tsa chyaru hte hka yawm ni hpe aten tup lu wa ai. Dai hku byin mat ai shaning grai na sai” ngu nna Nida tsun dan ai.

Hpang jahtum hta Nida gaw, Yehowa Sakse ni a karum shingtau lam hte nat ni jamjau jaw ai lam kaw na lawt lu wa nna, ngwi pyaw ai prat bai lu la wa ai. “Nat ni hte galoi mung, kachyi mi mung matut mahkai lam hkum galaw dat” ngu nna shi tsun ai.