Yehowa gaw Satan galaw wa ai nhkru n kaja lam yawng hpe bai kaja wa hkra galaw ya na re. Mungkan ting hpe uphkang na matu, Yesu hpe Hkawhkam hku nna Yehowa aya tang da sai. Dai uphkang ai npu hta mungkan ga gaw hparadisu byin wa na re.—Daniela 7:​13, 14; Luka 23:43.

Yehowa a ga sadi ni:

• Lusha law htam wa na. “Aga gaw shi a nsi naisi dik hkra shapraw ya sai, Karai Kasang, anhte a Karai Kasang, anhte hpe shaman ya mi ai.” “Mungdan na bum ni a pungding du hkra, nai mam paw wa nna, Lebanon zawn, de a nsi naisi a hkung nga lu ga: mare masha ni mung, lamu ga na nam lap zawn prut wa mu ga.”—Shakawn 67:6; 72:16.

• Majan ni n nga sai. “Sa ma rit, Yehowa a amu hpe mada yu mu; Ga ntsa e shi akrin atsai di kau nu ai. Ga ting hta na hpyen majan shi jasim kau wu ai.”—Shakawn 46:8, 9.

• Nhkru ai masha ni n nga sai. “N shawp ai ni kran kau ai hkrum na ma ra ai . . . Gade n na yang, tara n lang ai wa nga nga lu na n rai, Shi shanu ai shara e tam yu yang, shi n nga ai.”—Shakawn 37:9, 10.

• Machyi makaw lam, yawn hkyen lam, si hkrung si htan ni nga sana n re. “Dai Shaloi e myi hten ai ni, myi mu lu nna, na n na ai ni, na lu na ma ra ai. Lagaw hten ai wa gaw shan nga zawn gumtawng lu nna, maa ai wa a shinglet gaw mahkawn mangoi na ra ai.”—Esaia 35:5, 6.

  “Karai Kasang gaw shi hkum nan shanhte hte rau nga nga nna, shanhte a Karai Kasang tai na ra ai: shi gaw shanhte a myi hta na myi prwi pru mapru katsut kau ya na ra ai: htawm hpang e si hkrung si htan n nga lu na sai; sharung shayawt ai, hkrap ngu hkrap ngoi ai, hki si ba si ai mung, n nga lu na sai: shawng na lam nga manga hte gaw lai mat wa sai.”—Shingran 21:3, 4.

Yehowa gaw Satan hte nat ni hte n bung ai. Galoi mung masu ga n tsun ai. Karai ga sadi jaw da ai lam yawng mayawng byin wa na re. (Luka 1:36, 37) Yehowa gaw nang hpe tsawra nna, shi lajang da ya ai hparadisu hta nga shangun mayu ai. Dai majaw, Karai a Mungga hta lawm ai tengman lam ni hpe atsawm chye wa hkra, Yehowa Sakse Ni hte matut mahkai u. Na a prat hta tengman ai tara hpe tatut hkan sa yang, shut shai ai sharin achyin lam ni, shajan shalai kamsham ai lam ni hte n chye na ai lam ni a gyit hkang ai npu kaw na lawt lu na re. Lani mi hta, yubak mara hte si hkrung si htan kaw na pyi lawt lu na re. Yesu ndai hku tsun wa ai: “Teng man ai lam mung nanhte chye lu na ma rin dai rai nna, dai teng man ai gaw, nanhte hpe shalawt dat na ra ai.”—Yawhan 8:32.