Satan gaw “mungkan ga ting hpe hkalem” nga ai ngu Chyum Laika hta tsun da ai. (Shingran 12:9) Satan hte nhkru ai nat ni gaw, Karai a mungga Chyum Laika hpe n kam shangun mayu ai. Si mat ai ni gaw wenyi mungkan shara langai ngai hta, matut asak naw hkrung nga ai ngu masha ni kam wa hkra shakut ma ai. Gara ladat ni hpe jailang ai kun?

Masha shagu hta si mat ai hpang, n si ai lama ma (sh) wenyi hkum hte wenyi mungkan de lung mat ai ngu nawku htung law law gaw sharin achyin ya ai. Hkum hkrang si mat tim, wenyi gaw n si ai ngu sharin ya ai. Wenyi gaw n si ai sha htani htana agrin ai ngu nna sharin ya ai.

Raitim, Chyum Laika gaw dai hku n sharin ya ai. Wenyi ngu ai gaw masha hkum kata na lama ma hpe tsun ai n re ai sha, masha hkum hpe nan tsun mayu ai re. Ga shadawn, Adam hpe hpan ai lam hte seng nna Chyum Laika hta ndai hku tsun da ai: “Shaloi Yehowa Karai Kasang gaw aga hta na ga yun hte shinggyim hkrang shachyaw wu ai rai nna, shi a ladi hta hkrung ai nsoi nsa kawut bang ya wu ai: dai rai nna shinggyim masha gaw hkrung nga ai myit masin rawng ai masha tai wa ai.” (Ningpawt 2:7) Dai majaw, Adam hpe wenyi jaw ai n re ai sha, shi nan wenyi re.

Dusat ni hpe mung wenyi ngu nna shaga ai.—Ningpawt 1:20, 21, 24, 30.

Masha si mat yang, matut asak hkrung ai lam hpa n nga ai ngu tsun da ai. Si mat sai re ai majaw, asak hkrung nga ai ni hpe hpa akyu mung n jaw lu sai. Chyum Laika hta ndai hku tsun da ai:

• “Shi a nsoi nsa hkyet mat yang, shi ga de bai nhtang mat wa ai rai nna, Dai shani jang, shi maw ai hku yawng hten mat wa ai.”—Shakawn 146:4.

• “Hkrung nga ai ni gaw, tinang si na hpe chye nga ma ai: si mat ai ni chyawm gaw hpa n chye ma ai hte, hpa shabrai mung, n hkam la lu manu ai: kadai mung shanhte hpe n dum ma ai.”—Hpaji 9:5.

• “Nang galaw ang ai amu, hpa rai timung, tsam mari galaw u; kaning rai nme law, nang yu wa na ra ai katsan ga hta e, amu bungli, maw mawn ai, chye chyang ai hte hpaji hparat hpa mung n nga ai.”—Hpaji 9:10.

Kaga chyum daw ni mung dusat hte shinggyim masha si ai a akyu gaw arau sha re ngu tsun da ai. (Hpaji 3:19, 20) Si mat ai ni gaw hpa hpe mung n chye sai. Dai majaw, si mat ai hpang matut naw hkrung nga ai lama ma ngu ai gaw hpa n nga ai.

Si mat ai masha ni shara ra hta matut asak naw hkrung nga ai ngu ai ga hpe Chyum Laika hta n mu hti ai. Si mat ai ni a wenyi du mat ai shara ngu ai mung, Chyum Laika sharin achyin ai lam n re. Satan hte nhkru ai nat ni a sharin achyin ai lam she re. Nawku htung hte seng ai masu magaw lam yawng hpe Yehowa nju ndawng ai.—Ga Shagawp 6:16-19; 1 Timohti 4:1, 2.

Nat shung ai ni hpe akyu jashawn nna, masha ni hpe hkalem ai gaw Satan a ladat langai re. Nat shung ai masha ngu ai gaw, wenyi mungkan de na shiga ni hpe dingtawk lu la ai ni hpe tsun ai re. Dai nat shung ai ni hte hpawn, masha law law gaw dai shiga ni hpe si mat ai ni a wenyi kaw na sa ai shiga ngu nna kam ma ai. Chyum Laika hku tsun na nga yang, dai gaw tsep kawp shut ai.—Hpaji 9:5, 6, 10.

Rai yang, kadai kaw na shiga ni lu la ai kun? Nat ni kaw na re. Asak hkrung ai masha langai a tsun shaga ai lam, galaw hkawm sa ai lam yawng hpe nat ni galaw lu ai atsam nga ai. Dai majaw, si mat ai ni a hkrang hpe galaw la na matu grai loi ai.—1 Samuela 28:3-19.

Si mat ai ni hte seng nna masu ga hpe masha law law chye wa hkra, Satan galaw ai hpang na ladat langai gaw, n teng n man ai maumwi ni hku nna re. Dai lam gaw Chyum Laika teng man ai tara kaw na masha ni hpe lam shai mat shangun ai.—2 Timohti 4:4.

Si mat ai masha hpe asak hkrung let bai mu ai ngu ai Pungtu Patsta ni Ahprika kaw grai nga ai. Law malawng gaw, si mat ai wa nga mat ai shara hte grai tsan ai hta mu ma ai. Myit yu u. Si ai kaw na hkrung wa ai masha langai gaw, tinang a nta masha ni hte jinghku ni nga ai shara hte grai tsan ai shara hta, bai paw pru wa ai ngu ai gaw mai byin na kun?

Dai sha n-ga, si mat ai wa hte tsawm ra nsam bung ai mung mai byin ai. Ga shadawn, hkaw tsun bungli hta shang lawm nga ai Hkristan magam gun lahkawng gaw, shan lahkawng hpang nayi hku hkan nga ai asak kaba sai masha langai hpe sadi hkrup ai. Shi hpe san yu yang, magam gun langai gaw lai wa sai shaning hta n nga mat ai shi kahpu re ngu nna tsun ai. Gaja wa nga yang, shi shut taw ai. Raitim, masha shut nga ai hpe shi n hkap la ai. Dai asak kaba sai wa gaw, shi a nta masha ni hpe gara hku bai sa tsun na ngu shadu ai kun?

Laklai nna mauhpa lam ni hpe masha ni mu ma, na ma, yup mang mu ma ai. Dai zawn laklai ai lam ni gaw, hkrum sha ai wa hpe hkrit kajawng shangun ai. Sinna Ahprika kaw nga ai Marin gaw, shana de rai yang si mat sai shi a kadwi a nsen hpe ayan ngu na daram na ai. Hkrit kajawng let marawn nna rawt wa ai majaw, nta masha yawng yup rawt mat ai du hkra re. Hpang hta gaw shi myit nau n grin mat ai.

Si mat ai ni gaja wa asak hkrung nga yang, shanhte tsawra ai ni hpe hkrit kajawng shangun na kun? Gaja wa nga yang, dai zawn hkra machyi shangun ai nsen ni, ga ni gaw Satan kaw nna sa ai re.

Lu la ai shiga gaw akyu nga nna, myit shalan shabran ya ai ga rai yang gaw gara hku kun? Ga shadawn, Siera Leyun kaw nga ai Base gaw hkum n pyaw ai. Yup mang hta si mat sai kawa hpe mu ai. Kawa gaw hpun langai hpang de sa nna, namlap langai hpe la, hka hte kayau nna lu dat u ngu yup mang hta tsun ai. Dai hku n galaw shi yang, kadai hpe mung hkum tsun ngu nna htet ai. Htet ai hte maren galaw ai shaloi bai hkam kaja wa ai.

Hpang na anum langai mung ndai hku tsun dan ai. Si mat sai shi a madu wa gaw, lana mi hta shi a shawng de paw pru wa ai. Grai tsawm ai bu hpun palawng ni hte grai yu tsawm taw ai da.

Dai zawn shiga ni hte shingran ni gaw, kaja ai, akyu nga ai zawn gaw re. Raitim, dai gaw Karai Kasang kaw na rai na kun? N re. Yehowa gaw “tengman ai Karai Wa” re. (Shakawn 31:5) Anhte hpe hkalem hkalau galoi mung n galaw ai. Nat ni sha dai hku galaw ai.

Rai yang, kaja ai nat ni nga ai kun? N nga ai. Kalang lang, shawng nnan hta gaw karum ya ai zawn san tim, yawng gaw grai nhkru ma ai. Ewa hpe Satan ga sa shaga ai shaloi, grai hku hkau ai zawn sa shaga ai. (Ningpawt 3:1) Raitim, shi a ga madat nna galaw dat ai shaloi hpa byin mat ai kun? Si mat ra ai.

Nhkru ai ni gaw shanhte hkalem mayu, gunglau mayu ai ni hpe grai hku hkau ai zawn galaw ma ai. “Hpraw ai awa, chyang ai myit masin” ngu ai Ahprika ga malai nga ai. Chyum Laika hta mung: “Satan pyi nhtoi hta na lamu kasa a hpyi hpun chye nga ai” ngu tsun da ai.—2 Korinhtu 11:14.

Dai ni aten hta Yehowa gaw, masha ni hpe yupmang ni, shingran ni (sh) nsen ni hte matut mahkai ai lam n nga sai. Masha ni “mai kaja ai magam bungli shagu hpe galaw na matu atsam hpring nna . . . hkrak shajin da” lu na matu, Chyum Laika hte sha lam matsun nna sharin shaga ai.—2 Timohti 3:17.

Dai majaw, Satan a hkalem hkalau lam ni hpe Yehowa sadi jaw ai gaw, anhte hpe shi tsawra ai majaw re. Nat ni gaw grai shoihpa nga ai ni re ai hpe shi chye ai.