“Shi ngai hpe kanawng dat nna ngai galau mat ai. Ngai mung n-gun mahkra hte bai ning hkap ai. Grai marawn tim nsen n pru wa ai. Shi hpe ngai mahkyit ai, kanawng ai. Raitim, nhtu hte ngai hpe madi dat ai shaloi gaw hkum ting kya mat ai” ngu nna Annette tsun dan ai.

Dai zawn masa hte hkrum wa yang nang gara hku bai htang na kun?

Shana maga shinggan pru ra ai aten ni hta sadi nna tau hkrau lajang da yang pyi, n kaja ai masa hte hkrum wa chye ai. “Gat lawan chye ai majaw sha, gat shingjawng dang ai, n rai; . . . maka kumla pru ai majaw sha, myi man pa na, n rai: aten ladaw hte, ang wa ai hte maren, shanhte mahkra a matu byin ang wa ai.”​—⁠Hpaji Ningli 9:⁠11.

Ramma nkau gaw Annette zawn masha tsasam langai a roi rip ai hpe hkrum wa ai. Nkau gaw tinang hte chye chyang ai wa (sh) nta masha langai ngai a roi rip ai hpe hkrum ai. Natalie asak 10 ning hta nta htingbu ramma langai a hkum shan roi rip ai hpe hkrum wa ai. “Ngai grai hkrit nna kaya ai majaw kadai hpe mung n tsun gwi ai” nga nna shi tsun dan ai.

Annette gaw byin wa ai lam hte seng nna shi a mara mung lawm ai ngu hkamsha wa ai. Shi dai hku tsun dan ai: “Dai shana hpe malap kau n lu ai. Bawnu kaw nna shapraw n lu ai. Shi hpe grau nna ning hkap wa yang kaja na wa ngu myit hkrup ai. Nhtu hte madi hkrum ngut ai hpang grai hkrit nna shamu n mai mat ai. Hpa mung n lu galaw mat ai. Gaja nga yang lama ma bai galaw wa ra ai.”

Natalie mung mara nga ai ngu ya du hkra hkamsha nga ai. “Ngai gaw kam loi ai gaw. Nu yan wa gaw shinggan hta ginsup ai shaloi kanau hte rau nga u ngu tsun da ai. Ngai mahtang she n madat ai re. Dai wa hpe ahkaw ahkang jaw dat ai hku byin mat ai. Dai mabyin a majaw nye nta masha ni grai myit yawn wa ai. Nta masha ni myit n pyaw ai gaw ngai na majaw, ngai hta lit nga ai. Dai hpe yawn htum re.”

Annette hte Natalie zawn nang mung hkamsha nga yang gara hku galaw na kun? Nang gaw hkum shan roi rip hkrum ai nga yang nang myit hkrum nna galaw ai n re ai hpe dum u. Nkau gaw dai lam hpe ahkyak n shatai ai hku nna ‘la ngu ai ni gaw dai hku sha galaw na re, numsha ni she n chye nga ai’ ngu tsun ma ai. Gaja nga yang, hkum shan roi rip hkrum ai hpe hkam ging ai ni kadai mung n nga ai. Nang mung dai zawn roi rip hkrum ai nga yang na a mara n re ai.

“Na a mara n re ai” ngu tsun na loi tim, hkap la na matu gaw grai yak ai. Nkau mi gaw myit ru nna ip da ai, tinang hta mara nga ai ngu aten tup hkamsha nga nna n kaja ai ningmu ni shang wa ai. Raitim, ip da yang kade a matu akyu nga na kun? Nang kun? Nang hpe roi rip ai wa kun? Na a akyu hpe ra sharawng ai nga yang hkum ip da yaw.

Ding hpring ai Yoba gaw myit ru myit tsang grai hkrum nga ai aten hta “nye a myit masin karen ai hte ga tsun na nngai” ngu tsun wa ai. (Yoba 10:⁠1) Nang mung Yoba zawn masha ni hpe tsun dan yang akyu hkamsha na re. Hkum shan roi rip hkrum ai lam hpe tinang kam ai masha la­ngai ngai hpe tsun dan na nga yang, myit atsang sha rai mat na.

Annette tsun dan wa ai majaw myit atsang sha rai mat ai. Shi ndai hku tsun ai: “Ngai hte grai hkau ai manang langai hpe tsun dan dat ai. Shi gaw hpung myitsu salang lahkawng hpe tsun dan na matu n-gun jaw ai. Dai hku galaw wa ai majaw nye a matu kaja mat ai. Shanhte gaw ngai hte chyahkring hkring hkrum nna, nye mara n re ai hpe tsun ai. Ngai na mayu ai ga mung dai sha re.”

Natalie gaw shi a lam kanu kawa ni hpe tsun dan dat ai. “Nu yan wa gaw ngai hkrum wa ai lam hpe tsun dan na matu n-gun jaw ma ai. Dai majaw yawn hkyen ai, masin pawt ai ni yawm mat ai.”

Akyu hpyi ai kaw nna mung Natalie shalan shabran lu ai. “Kadai hpe mung n tsun dan lu ai shaloi Karai Kasang hpe akyu hpyi nna tsun dan ai. Akyu hpyi ai shaloi, Karai Kasang hpe dan dan leng leng tsun dan lu wa ai. Dai shaloi myit simsa lam lu wa ai” ngu shi tsun ai.

Na matu mung “shamai ai aten” ra na re. (Hpaji Ningli 3:⁠3) Hkum hkrang hte myit masin hkam kaja hkra shakut u. Yup hkru hkra shakut u. Ahkyak htum gaw shalan shabran ya ai lam amyu myu a Karai Kasang Yehowa hpe kamhpa u. ​—⁠2 Korinhtu 1:​3, 4.

Nang gaw numsha rai nna n san seng ai akyang lailen ni galaw na matu shadut hkrum yang “hkum galaw,” “hkum hkra” ngu dan dan leng leng tsun ai gaw kaja htum re. Tinang a sumtsaw tinang hpe kau da na hkum tsang. Dai lam hte sha nang hpe kau da na nga yang, shi gaw nang hte n ging dan ai wa re. Na a hkum hkrang hpe manu shadan nna na a tsang madang ni hpe hkungga ai la kaja hte sha nang hte ging dan ai.

“Lapran tsang jawng lung ai shaloi lasha ni gaw hpang kaw nna ngai na kata palawng hpe sa gang nna shanhte hte kalang mi sa yup yang grai pyaw na re ngu ai zai ai ga ni tsun ma ai.”​—⁠Coretta.

Dai lasha ni galaw ai lam gaw hpa ngu nang shadu ai kun?

1. Shala ai.

2. Nse n sa galaw ai.

3. Hkum shan roi rip na matu shakut ai.

“Jawng mawdaw hta lasha langai gaw n se n sa ga ni tsun nna ngai hpe sa gang ai. Shi a lata hpe ngai kayat dat nna yen u ngu tsun dat ai. Ngai mahtang she mana taw ai zawn shi yu wa ai.”​—⁠Candice.

Ndai lasha gaw Candice hpe hpa galaw ai ngu nang shadu ai kun?

1. Shala ai.

2. N se n sa galaw ai.

3. Hkum shan roi rip na matu shakut ai.

“Lai wa sai shaning hta, lasha langai gaw ngai hpe ra ai lam, ngai hte ginrun mayu ai lam aten tup sa tsun nga ai. Ningdang tim n lu ai. Kalang lang ngai na lata hpe sa jum ai. Hkum galaw ngu tsun tim n lu ai. Ngai hkyepdin sumri gyit nga ai shaloi, nye dangbau hpe sa kayat ya ai.”​—⁠Bethany.

Ndai lasha galaw ai hpe nang gara hku mu ai kun?

1. Shala ai.

2. N se n sa galaw ai.

3. Hkum shan roi rip na matu shakut ai.

Ga san yawng hte a jaw ai mahtai gaw nambat 3 re.

Hkum shan roi rip na matu shakut ai gaw n se n sa galaw ai, shala ai hte gara hku shai ai kun?

Hkum shan roi rip na matu shakut ai gaw maga mi kaw nna sha galaw ai lam re. Hkum galaw ngu tsun tim pyi n lu ai.

Dai zawn hkum shan roi rip na matu shakut hpang wa yang sadi ra ai. N rai yang, hkum shan roi rip hkrum ai du hkra byin mat na re.