Ndai mabyin hpe shingran yu u: Asak n hpring shi ai ramma Karen gaw, party poi kaw du ai minit shi pyi n hpring shi ai, hpang kaw na nsen langai hpe na dat ai.

Karen yu dat ai shaloi shi manang Jessica gaw beer palin lahkawng lang da ai hpe mu ai. Jessica gaw Karen hpe beer palin langai jaw let “asak naw kaji ai ngu gaw hkum tsun yaw” ngu tsun ai.

Karen nyet kau mayu tim, Jessica gaw shi a manang rai taw nga ai. Ngai hte kanawn yang n pyaw ai ngu nna mung shi hpe n hkamsha shangun mayu ai. Bai nna, Jessica mung num kaja langai re. “Beer she lu ai wa, kani nanghpam lu sha ai mung n re ai gaw. Ngai dai hpe lu dat yang hpa byin na mung n re ai wa” ngu Karen myit dat ai.

Karen zawn masa hte hkrum yang, nang gara hku di na kun?

Ndai hku masa hta kaja ai dawdan lam lu jahkrat na matu tinang gaw kaning re ai masha, hpa hpe kamsham ai lam chye da ra ai. Dai hku chye da na nga yang, kaga masha ni a shingkang ka-up ai hpe n hkam ai sha tinang nan dawdan chye na re.​—⁠1 Korinhtu 9:​26, 27.

Tinang hkrai chye dawdan lu na matu gara hku galaw ra na kun? Hpang na ga san mali a mahtai hpe htai nna galaw hpang u.

Tinang hta nga ai atsam ningja hte kaja ai sat lawat ni hpe chye da ai nga yang, tinang hkum tinang kam ai myit nga na re.

CHYUM GA KASI NINGLI: Kasa Pawlu ndai hku ka wa ai: “Lama wa ngai gaw hkaw tsun shaga ai lam hta n kung ai wa rai hkra rai ti mung, kaja wa chye chyang ai lam hta gaw dai zawn n rai.” (2 Korinhtu 11:​6, JCLB) Shi chye da ai Chyum hpaji ni hpe manoi manat da ai majaw ninghkap ai ni hkrum wa ai shaloi, ngang ngang kang kang lu tsap wa ai. N kaja ai hku tsun hkrum ti mung shi a kam ai myit n yawm mat ai.​—⁠2 Korinhtu 10:10; 11:⁠5.

TINANG HKRAI SAN JEP YU U: Nang atsawm chye galaw ai bungli langai ngai hpe lawu hta ka u.

Nang hta nga ai kaja ai atsam ningja langai ngai hpe ka u. (Ga shadawn, lanu lahku chye ai/ gam jaw gam ya chye ai/ kam hpa mai ai/ aten hpe hkungga chye ai)

Nta shadaw ni n ngang yang nta hten run mat chye ai zawn tinang a gawng kya lam ni mung tinang kamsham ai hte maren n lu galaw hkra byin shangun ai.

CHYUM GA KASI NINGLI: Pawlu gaw shi a gawng kya lam hpe sadi hkrup wa ai. Shi ndai hku ka wa ai: “Nye a kraw lawang myit gaw Karai Kasang a Tara hta kabu gara sharawng awng nga ai. Rai ti mung nye a hkum kata hta nye a myit hkrum ra sharawng ai tara hte gasat hkat nga ai kaga tara langai mi amu galaw nga ai hpe ngai mu we ai. Dai tara gaw nye a hkum shan hta shamu shamawt amu galaw nna ngai hpe yubak a tara hta bawng dung shangun nngai.”​—⁠Roma 7:​22, 23, JCLB.

TINANG HKRAI SAN JEP YU U: Gara gawng kya lam ni hpe nang hkang ra ai kun?

Maw daw langai hpe shap nna shara mi hta sha, sau ma ai du hkra bai kahtap htap kawan nna gawt taw na kun? Dai gaw hpaji n rawng ai amu rai nna gumhpraw majoi shama ai she re.

Hpa sharin la lu ai kun? Tinang hta bandung n nga yang, lam dam nga na re. Bandung nga yang gaw dai hpe dep lu hkra shakut nga na re.

CHYUM GA KASI NINGLI: Pawlu ndai hku ka wa ai: “Ngai gaw gat shadu na masat da ai mahkret bandung du hkra, ading sha gat nngai.” (1 Korinhtu 9:​26, JCLB) Pawlu gaw shi a prat hta dai hku sha nga taw na malai bandung ni ja­hkrat ai. Dai bandung ni hku hkan nna asak hkrung ai.​—⁠Hpilipi 3:​12-14.

TINANG HKRAI SAN JEP YU U: Du wa na shaning laman nang dep mayu ai bandung masum hpe ka u.

Ngang kang ai kamsham ai lam n nga yang myit ung ang taw nga na re. Nsam amyu myu galai chye ai shingnyen zawn na a manang ni a lapran nang byin nga na re.

Kaga masha ni hpa mi galaw law, tinang a ngang kang ai kamsham ai lam hku galaw na nga yang, tinang gaw kaning re ai masha re ai hpe madun dan ai re.

CHYUM GA KASI NINGLI: Myihtoi Daniela gaw kanu kawa ni hte tsan ai shara kaw nga taw tim, asak naw kaji ai ramma aten kaw nna, Karai Kasang a tara ni hpe madat mara na matu “daw dan da ai.” (Daniela 1:​8, JCLB) Dai hku nna shi a ngang kang ai kamsham ai lam hku asak hkrung wa ai.

TINANG HKRAI SAN JEP YU U: Na a kamsham ai lam gaw hpa rai kun? Ga shadawn, Karai Kasang hpe kamsham ai kun? Kam ai nga yang hpa majaw kun? Hpa madi madun lam nga nna Karai Kasang nga ai hpe nang tsep kawp kam ai kun?

Akyang lailen hte seng ai Karai Kasang a tara ni gaw nang hpe akyu jaw ai hpe kam ai kun? Kam ai nga yang hpa majaw kun?

Grai sawng ai n bung laru ru wa yang pyi ngang ngang tsap lu ai hpun hte bung mayu ai kun? (sh) n bung loi mi bung ai hte sha, run mat ai namlap hte bung mayu ai kun? Na a kamsham ai lam hpe ngang kang hkra galaw u. Rai yang, ngang kang ai hpun hte bung na re. Ngai gaw kaning re ai masha rai kun? ngu ai ga san a mahtai mung nang lu wa na re.