Ndai mabyin hpe shingran yu u: Manang ni hte ginsup nna Tim kabai dat ai baw lung gaw htingbu wa a chyinghka hpe hkra nna pat ga mat ai.

Lama wa, nang Tim rai yang hpa galaw na kun?

NANG HTA GALAW MAI AI LAM MASUM NGA AI:

1. Hprawng na.

2. Kaga masha ni hpe mara shagun na.

3. Htingbu wa hpe byin ai lam tsun dan nna hten mat ai a matu bai wa ya na.

Nambat 1 hpe nang lata mayu na re. Raitim, chying­hka pat shaga kau ai rai rai, kaga lam langai byin ai rai rai na a mara hpe yin la ai gaw galoi mung kaja htum hparan ai lam re.

1. Mara hpe yin la ai gaw galaw ging ai lam re.

   Chyum Laika hta ndai hku tsun da ai: “Lam shagu hta arawn alai kaja hkan mayu ga ai.”​—⁠Hebre 13:⁠18.

2. Mara hpe yin la yang masha ni gaw mara raw ya chye ai.

   Chyum Laika hta ndai hku tsun da ai: “Na a yubak mara ni hpe ip da na, nang shakut ai rai yang, asak hkrun lam hta, nang galoi mung awng dang na n rai; mara hpe yin la nna tawn kau jang, Karai Kasang nang hpe matsan dum ai myit madun dan na ra ai.”​—⁠Ga Shagawp 28:​13, JCLB.

3. Grau ahkyak ai gaw mara hpe yin la ai hpe Karai Kasang ra sharawng ai.

   Chyum Laika hta ndai hku tsun ai: “Yehowa gaw myit magaw ai ni hpe matsat nga ai. Teng man ai ni chyawm gaw shi hte jing­hku hku lu na ma ra ai.”​—⁠Ga Shagawp 3:⁠32.

Asak 20 re ai Karina gaw mawdaw lawan gawt ai majaw dam jahkrat hkrum nna gumhpraw jaw ra ai hpe shi kawa hpe n tsun dan ai. Raitim, prat tup n chye hkra n lu ip da ai. “Laning mi da­ram na ai shaloi ngai dam jahkrat hkrum ai hpe Awa chye nna shi grai pawt wa ai” ngu Karina tsun ai.

Hpa sharin la lu ai kun? “Mara galaw nna ip da ai gaw masa hpe grau sawng shangun ai. Hpang de tinang sha bai katut sha ai” ngu Karina tsun ai.

Chyum Laika hta ndai hku tsun ai: “Anhte nga manga hte gaw ya sha ya sha shut chye ga ai.” (Yaku 3:​2, JCLB) Mara hpe yin la ai gaw myit shagrit shanem ai, kung hpan ai ngu ai hpe madun ai. Kalang ta galaw ging ai lam mung re.

Dai hpang, tinang galaw shut ai mara kaw nna sharin la ra ai. Vera ngu ai numsha ndai hku tsun ai: “Ngai galaw shut wa ai lam ni kaw nna ngai bai sharin la ai. Dai mara ni hpe hpang kalang n galaw hkrup na matu ngai shakut ai.” Nang galaw mai ai ni hpe yu yu ga.

Awa na mawdaw sengke hpe la jawn nna jahten kau ai. Nang hpa galaw na kun?

• Hpa n tsun ai sha nga na. Awa chye na mung n re ngu shadu ai.

• Byin wa ai lam hpe jaw ai hku Awa hpe tsun dan na.

• Byin wa ai lam hpe Awa hpe tsun dan tim, kaga ni hpe mara shagun na.

Laika n hti ai majaw san poi hkrat ai. Nang hpa galaw na kun?

• San poi hpe mara shagun na.

• Tinang n shakut ai majaw san poi hkrat ai hpe hkap la na.

• Sara ding sang galaw ai ngu tsun na.

 Ya, na hkum nang (1) na kawa (2) na sara a shara hta shang yu u. Na mara ni hpe aloi sha yin la na nga yang, Awa hte sara gaw nang hpe gara hku mu mada na kun? Na mara ni hpe ip da na nga yang, shanhte gara hku mu mada na kun?

Lai wa sai shaning laman nang galaw wa ai mara langai hpe myit yu nna lawu kaw na ga san ni hpe mahtai jaw u.

Hpa mara galaw wa ai kun? Dai mara hpe gara hku hparan wa ai kun?

• Ip da ai.

• Kaga langai ngai hpe mara shagun dat ai.

• Kalang ta yin la wa ai.

Mara hpe n yin la wa ai nga yang hpang de gara hku hkam sha wa ai kun?

• Grai kaja ai​—⁠Kadai mung n chye dat ai.

• Mara nga ai​—⁠Ngai jaw ai hku tsun ra ai wa.

Masa ni grau kaja hkra nang gara hku lu galaw wa ai kun?

Mara kaw nna hpa sharin la lu wa ai kun?

Masha nkau mi hpa majaw mara ni hpe n kam yin la ai kun?

Mara ni hpe galoi mung ip da na nga yang, nang hpe masha ni gara hku shadu ai kun? Mara hpe yin la yang nang hpe gara hku mu mada na kun?​—⁠Luka 16:10.