Daw 1
“Dam Mat Ai Sagu Hpe Hkan Tam Na Nngai”
Sagu langai lam dam nga ai. Hpa majaw nga yang, shi gaw tsingdu ni hpe sha nga let, sagu hpung hte tsan ai de du mat wa nna re. Ya shi gaw sagu rem hpe mung, sagu hpung hpe mung n mu mat sai. Nsin mung sin wa sai. Tinang hkum tinang n lu makawp maga ai ndai sagu kasha gaw, hkaraw makau na matse labye nga ai shara de du nga ai. Hpang jahtum hta gaw, shi chye ai sagu rem a nsen hpe na dat ai. Sagu rem ai wa gaw shi hpang de gat sa wa nna, shi hpe hta pawn dat ai. Shi a palawng kata hta kayawp nna, nta de pawn mat wa ai.
Yehowa gaw, shi hkum shi sagu rem hte bung ai ngu chyahkring hkring tsun ai. Shi a Mungga kaw ndai hku n-gun jaw da ai: “Ngai hkum nan, nye a sagu ni hpe sawk yu nna, hkan tam na nngai.”—Ezekela 34:11, 12.
“Nye A Udat Shara Hta Nga Ai Nye A Sagu Hpung”
Yehowa a sagu gaw kadai rai ta? Shi hpe tsawra nna shi hpe nawku ai wa gaw, shi a sagu rai nga ai. Chyum Laika hta ndai hku tsun ai: “Sa marit, anhte a Hpan Wa Ningsang Yehowa a man e, Anhte dingnyawm let nawku nna lahput hput di nga ga. Shi gaw, anhte a Karai Kasang rai nga ai; Anhte mung shi a udat a amyu hte, Shi a lata na sagu hpung rai nga ga ai.” (Shakawn 95:6, 7) Sagu gaw sagu rem a hpang hkan ai zawn, Yehowa hpe nawku ai ni mung shanhte a sagu rem hpang hkan mayu ma ai. Shanhte ni gaw mara n kap ai ni kun? N re ai. Yehowa hpe nawku ai ni gaw kalang lang “bra nga ai sagu”, “dam mat wa ai sagu” ni byin mat chye ai. (Ezekela 34:12; Mahte 15:24; 1 Petru 2:25) Raitim, masha langai Yehowa hte tsan gang mat wa yang, shi hpang de bai wa na re ngu galoi mung myit mada nga ai.
Yehowa gaw na a Sagu Rem re ngu nang naw hkam la ai kun? Ya aten hta, Yehowa gaw Sagu Rem re ai lam gara hku madun nga ai kun? Lam masum hpe myit yu ga:
Shi anhte hpe wenyi lu sha jaw ai. “Udat shara kaja hta ngai shanhte hpe rem na nngai”, “ulawng kaja hta, shanhte hpum nga na ma ra ai: . . . tsit lali ai udat shara hta shanhte sha nga na ma ra ai” ngu nna Yehowa tsun ai. (Ezekela 34:14) Yehowa gaw, anhte hpe amyu baw hkum la ai aten du wenyi lu sha jaw na matu, galoi mung n malap ai. Na a akyu hpyi ga ni hpe laili laika, mungga langai, (sh) video langai hta na mahtai lu ga ai n rai ni? Dai gaw Yehowa nang hpe yu lanu lahku nga ai hpe madun ai.
Shi gaw anhte hpe makawp maga ya ai, madi shadaw ya ai. Yehowa ndai hku ga sadi jaw ai: “Masha ni gau mat wa ai sagu hpe hkan mawai la na nngai: nra daw ai sagu hpe ahkyen kayawp na nngai: gawng kya ai sagu hpe n-gun shaja na nngai.” (Ezekela 34:16) Myit tsang hpa ni a majaw gawng kya nga ai ni hpe Yehowa n-gun shaja ya ai. Makam masham bung ai ni a majaw, ana lu nna machyi nga ai sagu ni hpe tsi shamai ya ai. Myit daw myit hten taw nga ai ni hte lam dam taw nga ai ni hpe shi bai hkye mawai la na re.
Anhte a matu shi hta lit nga ai ngu hkam sha ai. “Shanhte bra wa ai shara shagu hkan na, ngai shanhte hpe shaw woi wa na nngai,” “dam mat ai sagu hpe hkan tam na nngai” ngu nna Yehowa tsun ai. (Ezekela 34:12, 16) Lam dam mat ai sagu gaw Yehowa a matu myit mada lam n nga mat sai n re. Sagu langai lam dam mat yang dai hpe shi chye ai, dai sagu hpe hkan tam nna, mu ai shaloi shi pyaw ai. (Mahte 18:12-14) Dai hta n ga, shi hpe teng sha nawku ai ni hpe “Nye a udat shara hta nga ai, nye a sagu hpung” ngu shaga ai. (Ezekela 34:31) Nang mung dai sagu hpung kaw na sagu langai mi re.
Lam dam mat ai sagu gaw Yehowa a matu myit mada lam n nga mat sai n re. Dai sagu hpe bai mu ai shaloi shi grai pyaw ai
“Moi Na Zawn Anhte A Aten Hpe Bai Nhtang Ya Mi”
Yehowa gaw hpa majaw nang hpe tam nna shi hpang de bai wa na matu saw shaga ai kun? Nang hpe ngwi pyaw shangun mayu ai majaw re. Shi a sagu ni hpe ndai hku ga sadi jaw da ai: “gaja wa chyeju marang mahpawng htu na ra ai.” (Ezekela 34:26) Ndai gaw kamsham mai ai ga sadi re. Dai hpe na a prat hta mung hkam sha ga na re.
Nang Yehowa a lam gara hku chye wa ai hpe bai myit yu u. Ga shadawn, Karai Kasang a amying, masha ni a matu shi a yaw shada lam hte seng ai tengman ai lam ni hpe chye wa ai shaloi, nang gara hku hkam sha wa ai kun? Zuphpawng kaba ni hta hpunau nauna ni hte rau kahkyin gumdin nga ai shaloi, kade daram ngwi pyaw wa ai hpe nang naw dum ai kun? Kabu gara shiga hkaw tsun ai shaloi, myit lawm ai ni hte mu yang nang myit dik nna ngwi pyaw ai lam hkam sha wa ai n rai ni?
Dai ngwi pyaw lam ni hpe nang bai lu mai ai. Moi prat na Karai Kasang a mayam ni ndai hku akyu hpyi wa ai: “Yehowa e, anhte hpe nang hpang de kayin shangun mi; shing rai anhte nhtang wa na ga ai. Moi na zawn anhte a aten hpe bai nhtang ya mi.” (Sharung Shayawt 5:21) Shanhte a akyu hpyi ga hpe Yehowa hkap la ya ai. Shanhte Yehowa hpang de bai wa nna, moi na zawn ngwi pyaw let bai nawku ma ai. (Nehemia 8:17) Nang hpe mung Yehowa dai zawn sha byin shangun mayu ai.
Yehowa hpang de bai wa na matu, tsun ai gaw loi tim, galaw na matu yak ai. Bai wa ai shaloi hkrum na, mayak mahkak nkau hte dai hpe gara hku tawt lai lu na lam ni hpe maram yu ga.
