Daw 4
Mara Nga Ai Ngu Hkam Sha Ai Myit—“Nye A Yubak Kaw Na Ngai Hpe Jaseng La E”
“Nye bungli a majaw, nta masha ni madang tsaw tsaw lu nga ai. Raitim, dai bungli a majaw Chyum Laika hte n htan shai ai ni hpe ngai galaw hkrup wa ai. Karai Kasang n ra ai poi ni, mung masa lam ni hte kaga nawku htung ni hta pyi shang lawm wa ai. Ngai gaw Yehowa Sakse langai raitim, 40 ning daram wenyi lam hta katsi mat ai. Aten na wa magang, Karai Kasang ngai hpe mara raw ya na n re ngu, grau nna hkam sha wa ai. Nye hkum ngai mung mara n lu raw nga ai. Grau sawng ai gaw, teng man ai lam hpe ngai chye nga ninglen, lam shut mat ai re.”—Martha.
Mara nga ai ngu hkam sha ai myit gaw li ai lit langai zawn byin wa chye ai. “Ngai shut hpyit ai gaw nye a baw lim nga nna, Li ai lit zawn nye a matu nau wa li la nga ai” ngu nna Dawi Hkawhkam mung tsun wa ai. (Shakawn 38:4) Hpunau nauna nkau gaw, Karai Kasang galoi mung mara raw ya na n re ngu, hkamsha nna grai yawn hkyen nga ai. (2 Korinhtu 2:7) Dai hku hkam la ai gaw jaw ai kun? Nang mara kaba galaw hkrup ai nga yang, Yehowa na a mara n raw ya lu hkra nang shi hte tsan mat sai kun? Dai hku n re.
“Ya Anhte Bawng Jahkrup Yu Ga”
Yehowa gaw myit malai lu ai ni hpe galoi mung n kabai da ai. Shi gaw shanhte hpe hkap tau nga ai. Yehowa gaw, myit n su ai kasha ga shadawn kaw na, tsawra myit nga ai Kawa hte bung ai ngu Yesu tsun wa ai. Myit n su ai kasha gaw nta hpe kau da nna, pyaw daw lam tam hkawm ngut yang she, nta bai wa na matu dawdan ai. Kasha bai wa ai hpe Kawa mu ai shaloi “shi tsan tsan naw rai nga yang, matsan yu dum nna, gat sa nhtawm, kasha a du hta noi ginshum let, shi hpe a pup wu ai.” (Luka 15:11-20) Nang Karai Kasang hpang de bai wa mayu tim, shi hte “tsan tsan naw rai nga” ai ngu hkam sha nga ai kun? Ga shadawn hta na Kawa zawn, Yehowa gaw matsan dum ai myit hte nang bai n htang wa na aten hpe la nga ai.
Raitim, tinang galaw ai mara ni gaw grai kaba ai shing nrai, grai law ai majaw Karai Kasang mara raw ya na n re ai ngu myit nga yang gaw taw? Yehowa ndai hku saw shaga da ai: “Ya, anhte bawng jahkrup yu ga; nanhte a yubak gaw, sai zawn hkyeng nga ti mung hkyen zawn hpraw san hkra ngai kashin kau ya na nngai”. (Esaia 1:18, JCLB) Sumpan ahpraw hta kap mat ai sai zawn, shaprai kau na matu yak ai mara ni hpe pyi Yehowa raw ya lu ai.
Nang, mara lu ai ngu hkamsha nga ai hpe Yehowa n ra sharawng ai. Karai Kasang mara raw kau ya nna myit simsa lam hte san seng ai myit nga wa hkra hpa galaw ra na kun? Dawi hkawhkam galaw wa ai lam lahkawng hpe maram yu ga. Langai, “ngai shut hpyit ai lam Yehowa hpe ngai nem kau na” ngu shi tsun ai. (Shakawn 32:5) Yehowa gaw, shi hpang de akyu hpyi nna sit sa wa na matu, masa lam ni hpe shi hte “bawng jahkrup” na matu nang hpe saw shaga da ai hpe dum u. Shi saw shaga ai hpe hkap la u. Yehowa a shawng hta na a mara ni hpe yin la nna hpyi nem u. Na a hkam sha lam ni hpe tsun dan u. Dawi gaw shi nan hkrum ga wa ai majaw, kamsham ai myit hte ndai hku akyu hpyi wa ai. “Nye a yubak kaw na ngai hpe jaseng la e . . . Karai Kasang e, gawng run nna htum mat ai myit hpe, Nang gang kau nga na ndai n rai.”—Shakawn 51:2, 17.
Lahkawng, Karai Kasang aya tang da ai myihtoi Nahtan a karum shingtau lam hpe Dawi hkam la wa ai. (2 Samuela 12:13) Dai ni aten hta mung, Yehowa gaw myit malai lu ai ni shi hte hku hkau lam bai kaja wa hkra karum ya na matu, hpung myitsu salang ni hpe lajang da ya ai. Myitsu salang ni hpe karum hpyi yang, na a myit simsa wa hkra, n kaja ai hku myit ai lam ni yawm mat hkra (sh) n nga mat hkra, Karai Kasang hte hku hkau lam bai kaja wa hkra shanhte gaw Chyum Laika hpe jailang nna nang hpe akyu hpyi ya na re.—Yaku 5:14-16.
Yehowa gaw nang hpe san seng ai myit lu shangun mayu ai
“Yubak Hpe Makoi Kau Ya Ai Hkrum Ai Wa Gaw A Nga Ai”
Yehowa a shawng hta tinang a mara hpe yin la nna hpyi nem na matu, myitsu salang ni hpe karum hpyi na matu ngu ai gaw grai yak ai ngu hkamsha na re. Dawi mung dai zawn hkam sha wa ai. Shi a mara ni hpe, aten ladaw langai du hkra n tsun ai sha “atsin sha nga” wa ai. (Shakawn 32:3) Hpang jahtum hta gaw, mara ni hpe yin la nna hpyi nem ai hte galai shai wa ai majaw lu la ai akyu ni hpe shi grai manu shadan wa ai.
Shi lu la ai akyu gaw, ngwi pyaw simsa lam bai lu wa ai re. “Yubak hpe makoi kau ya ai hkrum ai wa gaw, a nga ai” ngu nna, shi tsun wa ai. (Shakawn 32:1) Shi ndai hku mung akyu hpyi wa ai: “Madu e, nye a nten hpaw ya e. Shaloi nye a n-gup nang hpe shakawn na lam hkai dan na ra ai.” (Shakawn 51:15) Dawi gaw myit simsa wa ai, shi a mara hpe raw ya ai majaw Yehowa hpe grai chyeju dum ai. Kaga masha ni hpe mung Yehowa a lam grau tsun dan mayu wa ai.
Yehowa gaw nang hpe san seng ai myit lu shangun mayu ai. Yehowa a lam hte shi a yaw shada lam ni hpe kaga masha ni hpe tsun dan ai shaloi, mara nga ai ngu hkam sha ai myit hte n re ai sha, san seng ai myit, kabu gara ai myit hte tsun dan na hpe shi ra ai. (Shakawn 65:1-4) Yehowa a saw shaga ai ga hpe myit dum nga u. “Madu kaw na ngwi pyaw ai aten ladaw du ru ga . . . nanhte a yubak raw mat na matu, myit malai lu nna kayin wa ma rit.”—Kasa 3:19-20.
Martha mung dai zawn byin wa ai. Shi ndai hku bai tsun ai: “Nye kasha gaw Sin Langchyi, hte Dum Hprang! magazine ni galoi mung sa ya ai. Ngai mung, Yehowa hte hku hkau lam angwi ngwi bai kaja wa ai. Karai Kasang hpang de bai n htang wa na matu, yak dik htum gaw nye a mara ni hpe mara raw ya na matu hpyi nem ai re. Hpang jahtum gaw, ngai Yehowa kaw akyu hpyi nna mara raw ya na matu hpyi nem ai. Shaning 40 daram na yang she, Yehowa hpang de ngai bai n htang wa lu ai hpe, kam na she yak ai. Masha langai gaw, Yehowa hte shaning law law tsan gang mat yang pyi, shi hpang de bai n htang wa nna, shi a tsawra myit hpe bai lu mai ai lam, nye a mabyin gaw sakse madun dan ai.”
