Tsawra ai hpunau nauna ni e:

Chyum Laika hta masha ni hte seng ai lam law law lawm ai. Anhte ni zawn sha, ma­yak mahkak ni hkrum wa ai sadi dung ai masha ni a lam lawm ai. Shanhte gaw, “anhte zawn hkam sha chye ai” ni sha rai nga ai. (Yaku 5:​17, NW) Nkau gaw myit tsang lam ni hte mayak mahkak ni hkrum ai majaw myit daw ma ai. Nkau gaw, dum nta masha ni (sh) makam masham bung ai ni a majaw myit machyi ma ai. Nkau mi gaw shut ai lam galaw hkrup ai majaw, mara nga ai ngu hkam sha nna myit n pyaw ma ai.

Shanhte gaw dai lam ni a majaw, Yehowa hte tsan ai kaw sha nga mat ai kun? N nga ai. Shanhte gaw shakawn kungdawn sara akyu hpyi ai zawn rai nga ma ai: “Ngai lam dam mat wa yang, Mat ai sagu kasha hpe zawn, na a mayam wa hpe hkan tam u; Kaning rai nme law, nang htet da ai ga hpe ngai n malap kau nngai law.” (Shakawn 119:176) Nang mung dai zawn sha tsun na kun?

Yehowa gaw, ulawng hte tsan ai de du nga ai shi a sagu ni hpe galoi mung n malap ai. Makam masham bung ai ni hpe jailang nna, shi hpang de bai wa na matu saw shaga nga ai. Ga shadawn, Yehowa gaw shi a mayam Yoba hpe, tsin-yam hkrum nga ai ten, ja gumhpraw yakhkak ten, tsawra ai ni si mat ai ten, grai sawng ai ana hkam sha ai aten hta karum ya wa ai hpe sawn dinglik yu u. Shi a manang ni gaw shi hpe n-gun jaw na malai, hkra machyi hkra tsun ai. Yoba gaw shut ai hku myit hkrup ai aten ni nga tim, Yehowa kaw na galoi mung n gayin mat ai. (Yoba 1:22; 2:10) Yehowa gaw shi a myit mang ai lam hpe gara hku bai sharai ya wa ai kun?

Yehowa gaw, makam masham bung ai Elihu hpe jailang nna Yoba hpe karum ya wa ai. Yoba gaw shi a lam tsun dan ai shaloi, Elihu gaw atsawm sha madat ya ai. Ngut ai hpang she shi bai tsun ai. Shi hpa ni tsun ai kun? Yoba a mara ni, kaya hpa lam ni (sh) ra rawng ai lam ni hpe tsun ai kun? Yoba hta na shi grau kaja ai ngu mu mada wa ai kun? Dai hku n re! Karai Kasang a chyoi pra ai wenyi shadut ya ai majaw, Elihu ndai hku tsun ai: “Karai Wa man e nang hte maren ngai rai nga nngai: Shi ngai hpe mung, ga kagam hta na shachyaw ni ai,” “Nye hkrit hpa nang hpe shamak kau lu na, n rai; Nye a lata na a ntsa e li nga ai, n rai.” (Yoba 33:​6, 7) Yoba hpe lit shali ya na malai, Elihu gaw Yoba ra nga ai n-gun jaw ga hte hpaji jaw ga ni hpe, tsawra myit hte tsun wa ai.

Ndai brochure hpe uphkang hpung lajang ya ai gaw, Elihu zawn sha karum ya mayu ai majaw re. Shawng nnan hku nna Karai hte tsan mat wa ai ni a mabyin masa, hkam sha lam ni hpe anhte atsawm sha madat ya ai. (Ga Shagawp 18:13) Dai hpang, Chyum Laika hpaw nna, moi prat na shi a mayam ni dai zawn hkrum wa ai shaloi, Yehowa gara hku karum ya wa ai labau ni hpe akyu hpyi nna atsawm sha dinglik ai. Hpang jahtum hta, Chyum Laika labau ni hte ya prat na mahkrum madup ni hpe pawng hpawn let ndai brochure hpe shapraw da ga ai. Ndai laika hpe atsawm sha hti dinglik na matu nang hpe saw shaga dat ga ai. Chyeju hte anhte a jet ai tsawra myit hpe kam ya myit.

Yehowa Sakse Ni A Uphkang Hpung