Chyum Laika hta, Pawlu hte Banaba a lam chyahkring hkring mu lu ai. Shanhte gaw hpung kawan salang ni hku amu gun nna, moi na Hkristan hpung ni hpang de kawan ma ai. Hpa majaw kun? Hkristan hpunau nauna ni a akyu hpe, kaja wa myit lawm ai majaw re. Pawlu gaw, hpunau nauna ni a mabyin masa hpe chye na matu “bai sa kawan yu” ga ngu nna tsun ai. Shanhte hpe n-gun jaw na matu, deng tsa hku tsan ai shara de bu hkawm na hpe shi sharawng ai. (Kasa 15:36) Ya aten hta na, hpung kawan salang ni mung dai zawn myit rawng ai.

Anhte hpang de sa nna n-gun jaw ai. Hpung kawan salang langai gaw, hpung 20 daram hpe laning mi hta lahkawng lang kawan nna, hpung langai hpe kalang kawan yang bat mi na ai. Ndai hpunau ni a mahkrum madup kaw na anhte akyu law law lu ga ai. Dinghku nga ai ni rai yang, shanhte a madu jan ni a mahkrum madup kaw na mung akyu lu la ai. Shanhte gaw, ma kaji, masha kaba ni yawng hte chye hkra shakut ai. Hkaw tsun bungli hta mung, anhte hte arau shang lawm ai. Chyum ga sharin lamang ni hta hkan nang nna n-gun jaw ai. Dai hpung kawan ni gaw, myitsu salang ni hte rau, sagu kawan ai lamang mung galaw ma ai. Zuphpawng hte zuphpawng kaba lamang ni hta, mungga htawn nna anhte hpe n-gun jaw ai.

Yawng hpe myit lawm ai lam madun ai. Hpung kawan salang ni gaw, hpung a wenyi lam gara hku nga ai hpe, grai chye mayu ma ai. Hpung a galu kaba ai lam gara hku nga ai hpe bai dinglik na matu, myitsu salang ni, magam tau ni hte hkrum zup ai. Shanhte a lit ni hpe, gara hku gun hpai na lam hte seng nna, tatut hkrak re ai lam ni hpe hpaji jaw ai. Lam woi ningshawng ni hpe, hkaw tsun bungli hta awng dang hkra karum ya ai. Hpung masha nnan ni hte chye hkra galaw nna, shanhte wenyi lam hta gara hku galu kaba wa ai lam hpe na mayu ma ai. Dai hpung kawan ni gaw, anhte akyu lu na matu tinang hkum hpe ap nawng nga ai “rau amu jawm galaw ai” ni re. (2 Korinhtu 8:23, JCLB) Shanhte a makam masham hte Karai Kasang hpe ap nawng ai lam ni hpe anhte kasi la ra ai.​—⁠Hebre 13:7.

• Hpung kawan salang ni, hpung ni hpang de kawan ai a yaw shada lam gaw hpa rai ta?

• Shanhte kawan ai kaw na nang hpa akyu lu la mai a ta?