Anhte a uhpung uhpawng gaw, Chyum Laika hte kaga laili laika ni hpe, shaning shagu wan tsa lam dip shapraw nna, manu jahpu nla ai sha shabra ga ai. Nawku Htingnu ni hte ginjaw garan rung ni hpe gawgap ai, gram lajang ai. Hkying lam hku law ai Behtela nta masha ni hte sasana magam gun ni hpe madi shadaw ya nna, tsin-yam tsindam hkrum ai shaloi hkye mawai karum shingtau ya ai. Ndai lam ni yawng a matu alu gumhpraw hpe gara kaw na lu a ta?

Htam shi alu hte kaga alu ni nhta ai. Hkaw tsun bungli a matu gumhpraw law law jailang ra tim gumhpraw n lahkawn ai. Yehowa karum ya nga ai hpe kamsham nga ai majaw, “masha ni kaw na madi shadaw lam lu na matu galoi mung hpyi shawn na nre” nga nna lai wa sai latsa ning jan kaw nna, lahkawng lang ngu na Sin Langchyi laika hta tsun da ai. Kaja wa mung, anhte n hpyi shawn ga ai.​—⁠Mahte 10:8.

Anhte a magam bungli ni hpe tsawra myit hte bang ai alu gumhpraw ni hte madi shadaw ai. Anhte a Chyum Laika hpaji jaw ai bungli hpe, masha law law manu shadan nna alu gumhpraw ni bang ma ai. Mungkan ting hta, Karai Kasang myit ra ai hpe galaw na matu, Yehowa Sakse Ni mung, shanhte a aten, n-gun atsam, ja gumhpraw hte kaga arai ni hpe kabu gara hte ap nawng ma ai. (1 Hkawhkam Labau 29:9) Tsawra myit hte alu gumhpraw bang mayu ai ni a matu, zuphpawng hte zuphpawng kaba ni galaw ai shaloi, Nawku Htingnu hta alu sutdek ni tawn da ya ai. Shing nrai, anhte a website jw.org/kac kaw nna mung bang mai ai. Alu gumhpraw ni hpe law malawng yu maya masha ni bang ma ai. Shanhte gaw Nawku Htingnu a alu sumpu hta magri dingsen lap lahkawng bang ai matsan ai gaida jan hte bung ai. Shi hpe Yesu shakawn ya ai. (Luka 21:1-4) Anhte yawng mung “tinang a kraw lawang e myit da ai hte maren” jaw lu na matu “alu mahkawng” da mai ai.​—⁠1 Korinhtu 16:2; 2 Korinhtu 9:7.

Yehowa Karai Kasang gaw, shi ra sharawng ai lam byin pru wa hkra, hkaw tsun bungli hpe, tinang a “sut gan” ni hte madi shadaw ya mayu ai ni a myit masin hpe, matut nna shadut ya na ngu anhte kam ai.​—⁠Ga Shagawp 3:9.

• Anhte a uhpung uhpawng gaw kaga nawku hpung ni hte gara hku shai a ta?

• Tsawra myit hte bang ai alu gumhpraw ni hpe gara hku jailang ai kun?