Tsa ban langai hta “Yerusalem de nga ai kasa ni hte salang ni” lawm ai hpung gaw, uphkang hpung hku amu gun nna, Hkristan hpung ni a matu, ahkyak ai lam ni hpe daw dan ya ai. (Kasa 15:2) Shanhte gaw Chyum Laika tsun ai hpe, chye hkra bawngban nna, Karai Kasang a chyoi pra ai wenyi lam matsun ai hku, hkan ai majaw, myit hkrum let daw dan lu ma ai. (Kasa 15:25, 26) Ya aten hta mung dai zawn sha galaw nga ai.

Karai Kasang jailang ai ni hku nna Karai ra sharawng ai hpe galaw nga ma ai. Uphkang Hpung hta amu gun nga ai namman chya hkrum ai hpunau ni gaw, Chyum Laika hpe grai myit lawm ai. Magam bungli ni gara hku galaw ra na hte, Chyum Laika hte seng ai ga san ni hpe htai ai lam hta mahkrum madup law law nga ai ni re. Mungkan grup kahpu kanau ni a ra rawng ai lam hpe bawngban na matu, bat shagu hkrum zup ma ai. Tsa ban langai aten na zawn sha, Chyum Laika hta madung tawn da ai lam matsun ni hpe laika ni hte hpung kawan salang ni hku nna sa ya ai. Dai hku galaw ai majaw, Karai Kasang a masha ni gaw myit hkrum mangrum let galaw gun hpai lu ma ai. (Kasa 16:4, 5) Uphkang Hpung gaw wenyi shat hkyen lajang ya ai hta woi awn ya ai. Hkaw tsun bungli hpe shawng tawn na matu yawng hpe n-gun jaw ai. Hpung hpe woi awn na matu hpunau ni hpe lit jaw ai amu hta mung woi awn ya ai.

Karai Kasang a chyoi pra ai wenyi lam matsun ai hku hkan galaw ma ai. Uphkang Hpung gaw, lam matsun ni a matu Ninggawn Tawa a Awmdawm Madu Yehowa hte hpung a ningbaw Yesu hpe kamhpa ma ai. (1 Korinhtu 11:3; Ehpesu 5:23) Uphkang Hpung na hpunau ni gaw, shanhte hkum shanhte Karai Kasang a masha ni a ningbaw ni hku nna n sawn la ma ai. Shanhte gaw kaga namman chya hkrum ai Hkristan ni zawn sha “Sagu Kasha [Yesu] sa wa ai shara shagu de hkan nang ai ni rai nga ma ai.” (Shingran 14:4) Shanhte hte shanhte galaw ai bungli ni a matu, anhte akyu hpyi ya ai hpe Uphkang Hpung gaw grai chyeju dum ma ai.

• Tsa ban langai na uphkang hpung hta kadai ni lawm a ta?

• Ya aten hta Uphkang Hpung gaw Karai Kasang a lam matsun hpe gara hku tam ma a ta?