1. Ramma ni gaw shanhte a htawm hpang prat hte seng nna hpa hpe dawdan ra ai kun? Ladu lai myit tsang ai baw n byin na matu hpa gaw karum ya na kun? (Ndai sumhpa shawng na sumla hpe yu u.)

RAMMA ni e, nanhte shara langai ngai de bu hkawm na nga yang, shawng nnan masing jahkrat na n re i? Anhte a aprat mung bu hkawm ai hte bung ai. Dai majaw nang kaji ai aten kaw nna, gara lam de sa na hpe aten la nna masing jahkrat ra ai. Dai zawn masing jahkrat na matu loi na gaw n re. Heta ngu ai numsha ndai hku tsun ai: “Dai gaw myit tsang hpa gaw re. Na a prat hta prat tup hpa galaw na hpe nang dawdan ra ai.” Nang dai hku hkamsha yang, Yehowa ndai hku tsun da ai hpe dum u: “hkum tsang et, ngai na a Karai Kasang rai nga nngai; ngai nang hpe n-gun shaja nna karum na de ai.”​​—⁠​Esaia 41:​10.

2. Yehowa gaw ngwi pyaw ai prat lu na matu masing jahkrat shangun mayu ai hpe gara hku chye lu ai kun?

² Yehowa gaw na a htawm hpang prat hte seng nna hpaji rawng ai hku masing jahkrat na matu n-gun jaw ai. (Hpaji 12:1; Mahte 6:20) Shi gaw anhte hpe ngwi pyaw shangun mayu ai. Shi anhte hpe ngwi pyaw shangun mayu ai hpe, shi hpan da ai ni hpe anhte mu lu, na lu, sha lu ai kaw nna chye lu ai. Yehowa gaw kaga lam  ni hku nna mung anhte hpe yu lanu lahku ya ai. Anhte kaja htum asak aprat lu na matu lam matsun ya ai, sharin achyin ya ai. Shi a hpaji rawng ai lam matsun ni hpe masha ni n hkan sa yang shi n ra sharawng ai. Shi lam matsun ya ai hku n hkan sa ai ni hpe ndai hku tsun ai: “Ngai n ra ai hpe lata la myit dai. . . . Yu mu, nye a shangun ma ni kabu gara na ma ra ai, nanhte chyawm gaw kaya kahpa hkrum na myit dai; yu mu, nye a shangun ma ni gaw kabu gara ai myit hte mahkawn mangoi na ma ra ai.” (Esaia 65:​12-14) Anhte a prat hta hpaji rawng ai hku dawdan yang, Yehowa a hpung shingkang hpe dan dawng shangun na re.​​—⁠​Ga Shagawp 27:​11.

3. Yehowa gaw, nang hpe gara hku masing jahkrat shangun mayu ai kun?

³ Yehowa gaw, nang hpe gara hku masing jahkrat shangun mayu ai kun? Nang ngwi pyaw na matu, Yehowa hpe chye chyang ra nna shi a magam gun ra ai. Dai hku galaw yang she, ngwi pyaw lu na matu yaw shada let masha hpe hpan da ai. (Shakawn 128:1; Mahte 4:​4) Dusat du myeng ni gaw lu na, sha na hte kasha shaprat na sha chye ai. Raitim, Yehowa gaw nang hpe ngwi pyaw ai prat lu la na matu masing jahkrat shangun mayu ai. Na a Hpan Madu gaw ‘tsawra myit rawng ai Karai Kasang,’ “a rawng ai Karai Kasang” rai nna, “shi a hkrang sumla hte maren” masha hpe hpan da ai wa re. (2 Korinhtu 13:11; 1 Timohti 1:11; Ningpawt 1:27) Tsawra myit rawng ai Karai Kasang hpe kasi la yang, nang mung ngwi pyaw lu na re. Chyum Laika hta ndai hku tsun da ai: “Hkam sha ai hta jaw ya ai mahtang grau a nga ai.” (Kasa 20:35) Nang mung dai zawn hkamsha ga na re. Dai gaw aprat hte seng ai teng man ai madung tara re. Dai majaw na a htawm hpang prat a matu masing jahkrat ai shaloi, Yehowa gaw shi hte kaga ni a ntsa tsawra ai tsawra myit hpe madung tawn nna jahkrat shangun mayu ai.​​—⁠​Mahte 22:​36-39 hpe hti u.

4, 5. Yesu hpe hpa gaw kabu shangun ai kun?

⁴ Yesu Hkristu gaw ramma ni a matu hkum tsup ai kasi kaja madun wa ai. Shi ma naw re ai aten hta, ginsup ai aten ni nga wa na re. Karai Mungga hta ndai hku tsun da ai: “Mani ai aten mung nga ai; . . . ka manawt na aten mung nga ai.” (Hpaji 3:​4) Yesu gaw Chyum Laika hkaja ai hku nna mung, Yehowa hte ni htep hkra nga ai. Shi asak 12 ning hta nawku htingnu kaw na sara ni gaw “shi a myit kung ai hpe mung, shi htan ai ga a majaw mung” mau taw nga ma ai.​​—⁠​Luka 2:​42, 46, 47.

⁵ Yesu masha kaba byin wa ai shaloi, Karai Kasang shi hpe hpyi shawn da ai lam ni hpe galaw ai majaw ngwi pyaw wa ai. Ga shadawn, “matsan mayan ni hpe kabu gara shiga hkaw tsun” let, “myikyaw ai ni hpe myi bai mu” lu hkra shamai ya ai hku nna, Karai Kasang hpyi shawn da ai hpe galaw wa ai. (Luka 4:18) Shakawn Kungdawn 40:8 hta, shi a hkamsha lam hte seng nna ndai hku tsun da ai: “Nye a Karai Kasang e, na a myit hkan nang na ngai ra nga nngai.” Yesu gaw masha ni hpe shi Kawa a lam sharin ya ai hta kabu nga ai. (Luka 10:21 hpe hti u.) Kalang mi hta, teng man ai nawku daw jau ai lam hte seng nna num langai hpe tsun ngut ai hpang, Yesu shi a sape ni hpe ndai hku tsun ai: “Ngai e shangun dat ai wa a myit hku hkan galaw na hte, shi a magam bungli shangut lu na gaw, nye a shahpa rai nga li ai.” (Yawhan 4:​31-34) Yesu  gaw Karai Kasang hte kaga ni hpe, tsawra ai lam madun lu ai majaw, grai kabu ai. Nang mung dai zawn galaw yang shi zawn ngwi pyaw lu na re.

6. Na a htawm hpang masing masa hte seng nna kaga ni hte tsun shaga ai gaw hpa majaw kaja ai kun?

⁶ Hkristan law law gaw, ningshawng magam hpe asak kaji ai aten kaw nna galaw hpang wa ma ai. Dai gaw shanhte hpe ngwi pyaw shangun ai. Na a masing masa hte seng nna shanhte hte tsun shaga mai na kun? “N bawng yu yang, myit ai lam hten wa ai; Hpaji daw chye ai ni law nga yang, myit ai lam grin wa ai.” (Ga Shagawp 15:22) Ningshawng galaw ai gaw, na a prat ting hpe akyu jaw ai hpaji langai re, nga nna dai hpunau nauna ni tsun dan na re. Yesu gaw sumsing lamu hta nga ai shaloi, shi Kawa kaw nna lam law law sharin la wa ai. Bai, mungkan ga hta magam gun ai shaloi mung, matut sharin hkam la ai. Dai majaw, yakhkak jamjau hkrum ai lapran matut sadi dung lu wa ai, kaga ni hpe kabu gara shiga hkaw tsun lu wa nna ngwi pyaw lam hkamsha lu wa ai. (Esaia 50:4 hpe hti u; Hebre 5:8; 12:​2) Aten hpring magam gaw nang hpe hpa majaw ngwi pyaw shangun ai hpe hkaja yu ga.

7. Ramma law law hpa majaw sape shatai ai bungli hta kabu nga ai kun?

⁷ Yesu gaw masha ni hpe sharin ya nna, “sape shatai” na matu anhte hpe htet da ai. (Mahte 28:​19, 20) Dai bungli hpe madung bungli hku nna nang galaw na nga yang, Karai Kasang hpe shagrau lu nna, nang mung myit dik ai prat lu na re. Kaga bungli ni zawn sha, ndai magam mung kung kyang wa na matu aten ra ai. Ramma prat kaw nna ningshawng galaw hpang wa ai hpunau Timohti ndai hku tsun ai: “Yehowa hpe tsawra ai lam madun lu ai majaw, aten hpring magam hpe ngai grai ra ai. Shawng nnan hta gaw Chyum ga sharin lu na matu grai yak ai. Raitim, kaga shara de htawt ai shaloi shata mi laman, Chyum ga sharin law law lu wa ai. Marai langai gaw zuphpawng ni sa lung sai. Shata lahkawng na ai Dinghku N Nga Ai Hpunau Ni A Matu Chyum Jawng hpe lung ngut ai hpang, shara nnan de sa na matu lit lu wa nna dai hta Chyum ga sharin nnan mali lu wa ai. Masha ni hpe Chyum Laika sharin ya ai hpe ngai ra sharawng ai. Chyoi pra ai wenyi gaw shanhte hpe galai shai ya ai hpe ngai mu lu ai.” * (Lawu matsing hpe yu u.)​​—⁠​1 Htesaloni 2:​19.

8. Ramma nkau mi masha law law hpe hkaw tsun lu na matu hpa galaw wa ai kun?

⁸ Ramma nkau mi gaw amyu ga nnan ni hpe sharin la ma ai. Ga shadawn, America kaw nga ai Jacob gaw ndai hku tsun ai: “Ngai asak sanit ning re ai shaloi, ngai na manang law law gaw Vietnam ni rai ma ai. Yehowa a lam shanhte hpe ngai tsun dan mayu ai majaw, shanhte a ga sharin la ai. Sin Langchyi hpe English ga hte Vietnam ga hku shingdaw hti yu ai hku nna grau hkaja byin ai. Ngai hte ni ai Vietnam nawku hpung kaw na ni hte mung jinghku hku ai. Asak 18 hta ningshawng bungli galaw hpang ai. Bai, Dinghku N Nga Ai Hpunau Ni A Matu Chyum Jawng hpe lung wa ai. Dai gaw myitsu salang hku nna ngai langai sha nga ai Vietnam amyu ga nawku hpung hta lam woi ningshawng galaw na matu karum ya wa ai. Vietnam masha law law gaw, shanhte a ga ngai chye da ai majaw mau ma ai. Shanhte kaw sa chyai na matu shaga ai. Chyum Laika mung lu sharin ai. Nkau mi nga yang, hkalup hkam ai du hkra rawt jat wa ai.”​​—⁠​Kasa 2:​7, 8 hte shingdaw yu u.

9. Sape shatai ai bungli gaw anhte hpe hpa ni sharin ya ai kun?

 ⁹ Sape shatai ai bungli gaw, bungli hpe atsawm galaw chye ai akyang nga wa hkra, masha ni hte atsawm chye kanawn wa hkra, tinang hkum tinang kam ai myit hte zai byeng-ya nga wa hkra nang hpe sharin ya ai. (Ga Shagawp 21:5; 2 Timohti 2:24) Na a makam masham hpe Chyum Laika hte hkrak tsun dan lu wa ai majaw mung, ndai bungli hta ngwi pyaw lam hkamsha lu ai re. Yehowa hte rau gara hku magam gun na mung chye wa ai.​​—⁠​1 Korinhtu 3:​9.

10. Na a lawk hta sape shatai ai bungli galaw na matu yak yang pyi kabu gara lam gara hku tam lu na kun?

¹⁰ Na a lawk hta Chyum Laika sharin mayu ai masha nau n law yang pyi, sape shatai ai magam kaw nna ngwi pyaw lam hkamsha lu ai. Sape shatai ai magam gaw, nawku hpung masha yawng jawm galaw ra ai bungli hte bung ai. Hpunau nauna langai gaw, masha langai hpe sape byin hkra lu galaw ya ai shaloi, anhte yawng kabu ga ai. Hpa majaw nga yang, dai bungli hta anhte yawng lawm ai majaw re. Ga shadawn, Chyum ga sharin ni law law n lu ai shara hta 9 ning ningshawng bungli galaw wa ai Brandon ndai hku tsun ai: “Kabu gara shiga hkaw tsun ai hpe ngai ra ai. Dai hpe Yehowa galaw shangun da ai majaw re. Jawng ngut ai hte ningshawng galaw hpang ai. Nye a nawku hpung kaw na hpunau kaji ni hpe n-gun lu jaw nna, shanhte wenyi lam hta rawt jat wa ai hpe mu ai shaloi ngai grai pyaw ai. Dinghku N Nga Ai Hpunau Ni A Matu Chyum Jawng hpe ngai lung ngut ai hpang, shara nnan de htawt wa ai. Hkalup hkam ai du hkra rawt jat wa ai ni hpe ngai hku nna gaw tam n mu wa tim, kaga ni gaw tam mu ma ai. Raitim, ndai sape shatai ai magam hpe galaw na matu ngai masing jahkrat wa ai majaw grai kabu ai.”​​—⁠​Hpaji 11:​6.

11. Ramma law law gaw Yehowa hpe gara lam ni hku nna magam gun let kabu nga ai kun?

¹¹ Yehowa a magam gun na matu ahkaw ahkang law law nga ai. Ga shadawn, ramma law law gaw gawgap bungli hta shang lawm nga ma ai. Nawku Htingnu nnan law law naw gap ra ai. Dai shara ni gaw Yehowa hpe shagrau ai majaw, gawgap bungli hta shang lawm lu yang nang kabu na re. Hpunau nauna ni hte rau galaw lu ai majaw mung nang pyaw na re. Bungli galaw ai shaloi shim lum hkra gara hku galaw na, bungli hpa-awn ni hte arau gara hku jawm galaw na zawn re ai ni hpe nang chye wa na.

12. Ningshawng magam gaw kaga ahkaw ahkang ni hpe gara hku lam woi ya ai kun?

¹² Hpunau Kebin ndai hku tsun ai: “Lani mi hta Yehowa a magam hpe aten tup galaw na ngu kaji ai aten kaw nna myit wa ai. Asak 19 du ai shaloi ningshawng galaw hpang ai. Tinang hkum tinang madi shadaw ya na matu, kanbau bungli hku nna gaw, gawgap bungli galaw ai hpunau langai kaw aten kadun bungli galaw ai. Nta magaw ni, hkuwawt ni, chyinghka ni gara hku galaw na hpe sharin la wa ai. Hpang e Hariking nbung laru hkye mawoi hpung hta lahkawng ning shang lawm nna, Nawku Htingnu ni hte hpunau ni a nta ni hpe gap ya wa ai. Dingda Africa gawgap bungli hta masha ra ai ngu ngai na ai shaloi,  laika tang madun dat nna saw shaga hkrum wa ai. Anhte ni gaw bat loi mi na shagu, Nawku Htingnu langai hpang langai gawgap wa ai. Nye a gawgap bungli hpung gaw dinghku langai hte bung ai. Anhte rau nga, rau sha, rau Chyum Laika hkaja nna, arau bungli galaw ai. Buga hta nga ai hpunau ni hte mung bat shagu hkaw tsun bungli arau sa lu ai. Ngai kaji ai shaloi jahkrat wa ai masing ni a majaw, ngai n myit mada da ai ngwi pyaw lam ni hkamsha lu wa ai.”

13. Behtela hta Yehowa a magam lu gun ai majaw ramma law law hpa majaw kabu ai kun?

¹³ Nkau mi gaw ningshawng galaw wa nna, ya Behtela kaw magam gun nga ai. Behtela kaw galaw ai lam yawng gaw, Yehowa a matu sha re ai majaw, ngwi pyaw ai prat lu shangun ai. Teng man ai lam hpe masha ni chye na matu karum ya ai Chyum Laika hte laili laika ni hpe shapraw na matu Behtela gaw madi shadaw ya ai. Behtela nta masha Dustin ndai hku tsun ai: “Ngai asak jahku ning hta aten hpring magam gun na matu bandung jahkrat nna jawng ngut ai hte kalang ta ningshawng galaw ai. Laning mi chyen na ai hpang, Behtela de saw shaga hkrum wa ai. Laika dip shapraw jak gara hku lang ra na hpe sharin la lu wa nna, ya gaw computer dap hta galaw nga ai. Mungkan ting sape shatai ai lam a rawt jat ai lam hpe tinang nan mu lu ai, shawng na lu ai majaw mung kabu ai. Masha ni Yehowa hpang sit sa lu hkra karum ya ai ndai shara kaw ngai magam lu gun ai majaw grai kabu ai.”

14. Aten hpring magam gun na matu ya kaw nna nang gara hku hkyen lajang mai ai kun?

¹⁴ Aten tup magam a matu nang gara hku hkyen lajang na kun? Yehowa a magam hpe atsawm galaw lu na matu na a Hkristan atsam ningja ni rawt jat ra ai. Chyum Laika hpe ayan hkaja ra ai, hti ai hpe myit sawn sumru ra nna na a makam masham hpe hpung hta mahtai jaw ai hku nna madun ra ai. Jawng naw lung ai shaloi, masha ni hpe kabu gara shiga tsun dan ai hku nna ga shaga ai atsam hpe grau kaja hkra lu galaw ai. Masha ni a mu mada lam hpe hpaji rawng ai hku san nna shanhte tsun ai hpe madat ya ai nga yang, shanhte hpe myit lawm ai lam madun na matu sharin la nga ai re. Nawku Htingnu hpe jasan jaseng ai, gram lajang ai zawn re ai ni hpe galaw ai hku nna mung nang sak jaw mai ai. Yehowa gaw shagrit shanem nna sharawng awng let magam gun ai ni hpe ra sharawng ai. (Shakawn 110:3 hpe hti u; Kasa 6:​1-3) Timohti gaw “kahpu kanau ni hta, sari sadang lu ai wa rai nga ai” majaw, Kasa Pawlu gaw shi hpe sasana magam gun na matu saw shaga wa ai.​​—⁠​Kasa 16:​1-5.

15. Lam woi ningshawng galaw lu na matu nang hpe madi shadaw ya ai kanbau bungli hpe gara hku lu mai na kun?

¹⁵ Aten hpring magam gun ai ni mung kanbau bungli galaw ra ai. (Kasa 18:​2, 3) Na a buga ginra hta, aten kadun bungli langai ngai galaw lu na matu, nang hpe madi shadaw ya ai hpaji langai ngai hpe sharin la mai ai. Hpung kawan hpunau hte kaga ningshawng ni hpe na a masing masa hpe tsun dan nna, hpaji hpyi mai ai. Chyum Laika hta ndai hku tsun da ai: “Na a amu bungli Yehowa hpe ap da u; Shing rai yang, nang myit ai hku grin wa na ra ai.”​​—⁠​Ga Shagawp 16:3; 20:​18.

16. Aten tup magam gaw htawm hpang hta kaga lit ni a matu gara hku hkyen lajang ya ai kun?

¹⁶ Yehowa gaw nang hpe ngwi pyaw ai htawm hpang prat lu na matu “magra noi” da shangun mayu ai hpe kam mai ai. (1 Timohti 6:​18, 19 hpe hti u.) Kaga aten tup magam gun ni hte rau aten tup magam gun hpai ai hku nna, kunghpan ai Hkristan langai nang byin wa na re. Kaji ai aten kaw nna aten tup magam gun ai gaw, hpang e dinghku de ai shaloi mung akyu nga ai lam masha law law chye wa ai. Law malawng gaw dinghku de ngut ai hpang mung, ningshawng magam matut nna galaw ma ai.​​—⁠​Roma 16:​3, 4.

17, 18. Nang gaja nan myit lawm ai masing masa hpe gara hku jahkrat lu na kun?

¹⁷ “Nang ra sharawng ai lam ni hpe shi shadik ya u ga. Na a masing masa ni hpe shi awng dang shangun u ga” ngu Yehowa hte seng nna, Chyum Laika hta tsun da ai. (Shakawn 20:​4, NW) Na a prat hta teng sha hpa galaw mayu ai kun, ngu ai hpe atsawm myit nna masing jahkrat u. Ya aten hta Yehowa hpa galaw nga ai hte shi a magam hta nang hpa galaw lu na hpe atsawm myit u. Ngut yang shi ra sharawng ai lam hte maren masing jahkrat nna galaw u.

¹⁸ Yehowa a matu aten tup magam gun nna shi hpe shagrau na nga yang, nang ngwi pyaw lu na re. Nang ‘Yehowa hta sharawng awng nga yang, Na a myit hpyi ai hku, shi nang hpe jaw na’ gaw teng sha re.​​—⁠​Shakawn 37:​4.