1, 2. Satan mungkan hta, matsan ai ni gaw hpa majaw ayan nga taw na kun?

YA aten na hpaga lam ni gaw n hkru ai, n tara ai. Ga shadawn, ramma law law gaw bungli tam na matu grai yak taw nga ai. Masha nkau mi gaw, shakut shaja nna lu su ai mungdan de htawt sa ma ai. Lu su ai mungdan ni hta pyi, matsan ai ni law law nga ai. Mungkan ting hta, lu su ai ni gaw grau grau lu su wa nna, matsan ai ni gaw grau grau matsan wa ai. Ga shadawn, mungkan masha jahpan a lu su dik htum tsa lam shadang langai hta nga ai gumhpraw gaw, masha tsa lam shadang 99 hta nga ai gumhpraw hta na grau law ai ngu sawn maram ai ni tsun ai. Masha nkau mi gaw, prat tup sha n ma ai daram lu su nga tim, wan hkying hku law ai masha ni gaw sha hpa n nga ai du hkra matsan taw nga ai. Yesu gaw dai lam hpe chye ai majaw, “matsan mayan ni nanhte hte rau tut tut nga nga ma ai” nga nna tsun wa ai. (Marku 14:​7) Dai zawn n tara ai lam ni hpa majaw nga nga ai kun?

² Karai Kasang a Mungdan sha, ndai mungkan a hpaga lam hpe galai shai ya lu ai lam Yesu chye ai. Chyum Laika hta “hpaga ni” hte mung masa lam, nawku htung lam ni gaw arau rai nna Satan mungkan a adaw achyen ni re ai lam tsun da ai. (Shingran 18:​3) Karai Kasang a masha ni gaw, mung masa lam hte shut shai ai nawku htung ni kaw nna tsep kawp san san nga lu ai.  Raitim, anhte law malawng gaw, Satan mungkan a adaw achyen re ai hpaga lam hte gaw tsep kawp san san n nga lu ai.

3. Gara ga san ni hpe anhte bawng ban mat na kun?

³ Hkristan ni hku nna, mungkan hpaga lam hte seng nna anhte a myit jasat hpe bai san jep ra ai. Anhte hkum anhte ndai hku san mai ai: ‘Karai Kasang hpe ngai sadi dung lu na matu nye a arung arai sutgan ni hpe gara hku jailang mai na kun? Mungkan hpaga lam hta dang lu ai daram shayawm nna shang lawm na matu ngai gara hku galaw lu na kun? Dai ni aten hta, Karai Kasang hpe tsep kawp kamhpa ai lam madun ai gara mahkrum madup ni nga ai kun?’

4, 5. (a) Yesu tsun ai kunhting wa gaw hpa byin mat ai kun? (b) Yesu gaw shi a sape ni hpe hpa galaw na matu tsun wa ai kun?

⁴ Luka 16:​1-9 hpe hti u. Yesu tsun ai n ding man ai kunhting wa a lam hpe anhte myit yu ga. Kunhting wa gaw arai jai shamat kau ai ngu mara shagun hkrum nna, shi a madu gaw shi hpe kunhting aya kaw nna jahkrat kau na matu dawdan wa ai. * (Lawu matsing hpe yu u.) Raitim, kunhting wa gaw “hpaji hte chye galaw ai.” Shi gaw bungli kaw na garai n pru shi yang, htawm hpang de shi hpe karum ya lu ai ni hte jinghku hku wa ai. Yesu gaw, shi a sape ni hpe ndai lam tsun ai gaw, n tara ai lam galaw nna asak hkrung shangun mayu ai majaw n re. Ndai mungkan na masha ni gaw dai hku galaw nga ma ai. De a malai, Yesu gaw grai ahkyak ai lam hpe sharin ya mayu ai majaw dai lam hpe tsun wa ai re.

⁵ Yakhkak ai mabyin masa hpe n myit mada ai sha hkrum wa ai kunhting wa zawn, shi a sape law malawng mung n tara ai ndai mungkan hta asak hkrung na matu grai yak na hpe Yesu chye ai. Dai majaw, Yesu gaw shanhte hpe “n tara ai sutgan hte tinang a matu jinghku hku mu” nga nna tsun wa ai. Hpa majaw kun? Dai sutgan ni sum mat ai shaloi, jinghku ni re ai Yehowa hte Yesu gaw, “dinggrin anga nga ai nta hta, nanhte hpe hkap la na” majaw re. Yesu a hpaji jaw ga kaw nna anhte hpa sharin la lu ai kun?

6. Dai ni aten na hpaga lam gaw Karai Kasang a yaw shada lam hta n lawm ai lam gara hku chye lu ai kun?

⁶ Sutgan ni hpe “n tara ai” nga nna hpa majaw tsun ai hpe Yesu n sang lang wa ai. Raitim, gumhpraw law law lu na matu shakut ai gaw Karai Kasang a yaw shada lam hta n lawm ai lam Chyum Laika hku nna chye lu ai. Yehowa gaw Adam yan Ewa hpe Edin sun hta shanhte ra ai hta na grau jaw da ai. (Ningpawt 2:​15, 16) Karai Kasang gaw, namman chya hkrum ai ni hpe chyoi pra ai wenyi jaw ai shaloi, shanhte gaw “kadai mung tinang lu ai arai hpe nye a, n nga ai sha, yawng mayawng hpe jawm lang ma ai.” (Kasa 4:32) Mungkan ga kaw nna shapraw ai lam yawng hpe masha ni ngwi pyaw let hkamsha lu na aten du wa na nga nna myihtoi Esaia tsun wa ai. (Esaia 25:​6-9; 65:​21, 22) Raitim, dai aten n du shi yang, Yesu hpang hkan ai ni gaw “hpaji hte chye galaw” ra na re. Shanhte gaw ndai mungkan a n tara ai sutgan hpe jailang nna asak hkrung ra ai sha n-ga, Karai Kasang ra sharawng na matu mung shakut ra ai.

7. Luka 16:​10-13 hta Yesu anhte hpe hpa sharin ya ai kun?

⁷ Luka 16:​10-13 hpe hti u. Yesu tsun wa ai kunhting wa gaw, shi a akyu a matu jinghku hku wa ai. Raitim, Yesu gaw shi hpang hkan ai ni hpe tingkyeng akyu n tam  ai myit hte sumsing lamu hte jinghku hku na matu ra sharawng ai. N tara ai sutgan hpe jailang nna Karai Kasang hpe sadi dung lu ai lam, anhte hpe Yesu chye na shangun mayu ai. Dai zawn anhte gara hku galaw lu na kun?

8, 9. Masha nkau mi gaw, shanhte a n tara ai sutgan ni hpe jailang ai hta sadi dung ai lam madun ai ga shadawn ni hpe tsun dan u. 

⁸ Yesu tau hkrau tsun da ai mungkan ting hkaw tsun bungli a matu alu shang lawm ai hku nna, sadi dung ai lam sakse madun mai ai. (Mahte 24:14) India mungdan hta nga ai ma kasha langai gaw, ginsup rai ni hpe mari na malai, gumhpraw ayan mahkawng ai. Gumhpraw mahkawng sutdek hpring wa ai shaloi, hkaw tsun bungli a matu shi mahkawng da ai gumhpraw yawng hpe alu jaw dat ai. India mungdan kaw nga ai hpunau langai hta, ma-un si sun nga ai. Shi gaw ma-un si law law hpe Malayalam RTO hpe alu jaw ai. RTO rung gaw ma-un si mari ra ai majaw, gumhpraw alu jaw ai hta na grau manu dan ai ngu shi hkamsha ai. Dai gaw “hpaji hte chye galaw ai” lam re. Greece mungdan na hpunau ni mung, tsanlun sau, chyu sau muk (cheese) hte kaga shahpa ni hpe Behtela nta masha ni hpe ayan jaw ai.

⁹ Sri Lanka mung hta nta nga ai hpunau langai mung, aten hpring magam gun ni nga na matu, zuphpawng ni, ninghtawn zuphpawng ni galaw na matu shi a nta wang hpe jaw lang ai. Dai gaw hpunau a matu ja gumhpraw sak jaw ai hte bung ai. Dai hta nga ai hkaw tsun masha ni gaw gumhpraw law law n nga ai majaw, grai kaja ai karum shingtau lam re. Hkaw tsun magam hpe pat shing dang da ai mungdan hta, hpunau ni gaw shanhte a nta ni hpe Nawku Htingnu ni hku nna lang na matu ahkang jaw ma ai. Dai majaw, gumhpraw law law n nga ai ningshawng ni hte hkaw tsun masha ni gaw, zuphpawng galaw ai shara hpe manu jahpu n jaw ra ai sha, mai lang lu ai.

10. Anhte gam jaw gam ya ai shaloi hpa akyu ni lu na kun?

¹⁰ Karai Kasang a masha ni gaw, “amu kaji hta kangka” ai lam dai zawn ga shadawn ni gaw madun nga ai. (Luka 16:10) Shanhte gaw shanhte a arung arai ni hpe kaga ni a matu jailang ai. Yehowa a jinghku ni re ai shanhte ni dai hku sak jaw ai majaw, gara hku akyu lu ma ai kun? Gam jaw gam ya ai majaw, sumsing lamu hta “dingman ai sutgan” lu la na hpe shanhte chye ai majaw grai pyaw ma ai. (Luka 16:11) Mungdan magam hpe madi shadaw ya na matu gumhpraw alu ayan bang ai nauna langai gaw, shi a prat hta nau n hkrum ga ai shaman chyeju ni lu la wa ai lam tsun dan ai. “Arung arai ni hpe grau gam jaw gam ya magang, kaga ni a matu grau myit ya wa magang re ai hpe ngai chye wa ai. Ngai grau nna gam jaw gam ya ai majaw, kaga masha ni hpe mara raw ya lu wa ai, myit galu wa ai. Bai nna sharin shaga hkrum ai shaloi, kaga ni ngai hpe myit htum hkra galaw ai shaloi, dai ni hpe hkap la lu wa ai” nga nna shi tsun ai. Masha law law gaw, gam jaw  gam ya ai kaw nna akyu lu la ai lam hpe chye na wa ai.​​—⁠​Shakawn 112:5; Ga Shagawp 22:​9.

11. (a) Gam jaw gam ya ai lam hta “hpaji hte chye galaw ai” lam gara hku madun na kun? (b) Ya aten hta Karai Kasang a masha ni lapran hpa ni byin nga ai kun? (Ndai sumhpa shawng na sumla hpe yu u.)

¹¹ Hkaw tsun bungli hte seng nna kaga masha ni hpe madi shadaw na matu anhte a arung arai ni hpe jailang ai hku nna mung, “hpaji hte chye galaw ai” lam madun mai ai. Anhte gaw aten hpring magam (sh) grau ra ai shara de htawt ai lam ni n galaw lu tim, kaga ni hpe gaw karum ya lu ai. (Ga Shagawp 19:17) Ga shadawn, teng man ai lam hpe masha law law hkap la nga ai grai matsan ai mungdan ni a matu laili laika ni madi shadaw ya lu hkra anhte a alu ni gaw karum ya lu ai. Congo, Madagascar hte Rwanda zawn re ai mungdan ni hta Chyum Laika gaw grai manu hpu ai. Kalang lang, Chyum Laika buk langai a manu gaw bat mi (sh) shata mi a shang gumhpraw manu daram nga ai. Lai wa sai aten ni hta hpunau ni gaw, Chyum Laika langai mari na kun, dinghku a matu shahpa mari na kun, ngu ai hpe lata ra ai. Ya nga yang, Yehowa a uhpung gaw alu gumhpraw hpe jailang nna Chyum Laika hpe ga gale ai, dip shapraw ai majaw Chyum Laika hpe nta masha langai hpra sha n-ga, Chyum ga sharin ni mung manu jahpu n jaw ra ai sha “shabung shapre ai hku” rap rap ra ra lu la ma sai. (2 Korinhtu 8:​13-15 hpe hti u.) Dai majaw, jaw ya ai wa hte hkamla ai wa lahkawng yan, Yehowa a jinghku byin wa lu ai.

12. Abraham gaw Karai Kasang hpe kamhpa ai lam gara hku madun wa ai kun?

¹² Anhte gaw mungkan a hpaga lam hta lawm ai lam hpe shayawm let, “dingman ai sutgan” hpe tam ai hku nna mung, Yehowa a jinghku byin wa lu ai. Sadi dung ai Abraham dai hku sha galaw wa ai. Shi gaw Yehowa a jinghku byin mayu ai majaw, Yehowa a ga madat nna grai lusu ai Ura mare kaw na pru wa nhtawm sum ni hta nga wa ai. (Hebre 11:​8-10) Shi gaw arung arai ni hta na Karai Kasang hpe galoi mung kamhpa wa ai. (Ningpawt 14:​22, 23) Yesu gaw dai zawn makam masham hpe kasi la na matu kaga ni hpe n-gun jaw wa ai. Kalang mi hta, shi gaw lusu ai lasha langai hpe ndai hku tsun wa ai: “Nang dinghpring mayu nga n yang gaw, wa su, na a arai ni hpe dut kau nna, matsan mayan ni hpe karan jaw u; shingrai jang, sumsing lamu ntsa e nang sutgan lu na rin dai: ngai kaw mung sa hkan nang rit.” (Mahte 19:21) Dai lasha hta Abraham zawn makam masham n nga ai. Raitim, Karai Kasang hpe kamhpa ai kaga masha ni naw nga ai.

13. (a) Pawlu gaw Timohti hpe gara hpaji jaw ga tsun wa ai kun? (b) Dai ni aten hta Pawlu a hpaji jaw ga hpe gara hku hkan sa mai ai kun?

¹³ Timohti gaw makam masham nga ai wa re. Timohti hpe “Hkristu Yesu a hpyen ma kaja” nga nna shaga ngut ai hpang, Pawlu gaw shi hpe ndai hku tsun wa ai: “Hpyen amu gunhpai ai wa kadai mung, tinang hpe hpyen hpung hta shalawm la ai wa a myit htuk lu hkra, ndai aprat na arai ni hta tinang hkum hpe ahkang abai shangun ma ai n rai.” (2 Timohti 2:​3, 4) Dai ni aten na Yesu hpang hkan ai ni hte hpawn, wan mi jan law ai aten hpring magam gun ai ni gaw, Pawlu a hpaji jaw ga hpe atsawm hkan sa ma ai. Shanhte gaw lawhpa ai ndai mungkan a ndau shabra nna  hkalem ai lam hpe ninghkap ai. Shanhte gaw “hkoi la ai wa gaw, hkoi ya ai wa a mayam rai nga ai” ngu ai npawt tara hpe myit dum ma ai. (Ga Shagawp 22:​7) Satan gaw shi a hpaga mungkan a matu anhte a aten hte n-gun atsam yawng hpe akyu jashawn shangun mayu ai. Nkau mi gaw nta, mawdaw mari na matu, hpaji hparat sharin na matu (sh) hkungran poi galaw na matu pyi gumhpraw law law hkoi ma ai. Anhte n sadi yang, shaning law law hka kap mat na re. Anhte gaw prat hpe asan sha tawn ai, hka n kap na matu sadi ai, gumhpraw hpe shayawm jailang ai. Dai zawn hpaji hte chye galaw ai lam madun ga ai. Dai lam hku nna, dai ni aten na hpaga mungkan a mayam byin na malai Karai Kasang a magam gun ma ai.​​—⁠​1 Timohti 6:​10.

14. Anhte hpa galaw na matu dawdan ra ai kun? Ga shadawn ni tsun dan u.

¹⁴ Anhte a prat hpe asan sha tawn na matu, Karai Kasang a Mungdan hpe shawng tawn ra ai. Yan la langai hta amyat law law lu nna grai galu kaba ai hpaga bungli langai nga ai. Raitim, shanhte gaw aten hpring magam gun mayu ai. Dai majaw, shanhte a hpaga bungli, hka li hte kaga arung arai ni hpe dut kau ai. Dai hpang, shanhte gaw New York, Warwick hta nga ai ginjaw rung gawgap ai hta shawang lit gun ai hku nna karum ya lu wa ai. Dai gaw shanhte a matu grai kaja ai lam re. Hpa majaw nga yang, shanhte a kasha, kahkri hte rau Behtela hta amu gun lu ai. Bai nna Warwick gawgap bungli hta bat loi mi shang lawm nga ai kahkri a kanu, kawa ni hte rau galaw lu wa ai. U.S.A, Colorado hta nga ai ningshawng nauna langai gaw gumhpraw dum hta aten kadun bungli lu wa ai. Shi a bungli madu gaw, shi bungli galaw ai hpe grai ra sharawng ai majaw, shabrai htam masum lu na aten hpring bungli galaw na matu saw shaga wa ai. Raitim, dai hku galaw na nga yang, hkaw tsun bungli hpe myit maju jung nna n lu galaw na hpe shi chye ai majaw nyet kau ai. Dai lam ni gaw, Yehowa a mayam ni sak jaw ai kaw nna ga shadawn loi mi sha naw re. Anhte gaw Mungdan lam hpe shawng tawn na matu dawdan yang, arung arai ni hta na wenyi lam hte dingman ai sutgan hpe grau manu shadan ai lam madun ai re.

15. Gara lam hta sut su ai gaw myit dik lam lu shangun ai kun?

¹⁵ Arung arai sutgan lusu shagu Karai Kasang a shaman chyeju rai yang she rai na. Yehowa gaw “mai kaja ai bungli hta sut su” ai ni hpe shaman chyeju jaw ai. (1 Timohti 6:​17-19 hpe hti u.) Ga shadawn, Albania mungdan gaw magam gun na matu grau ra ai shara re ai hpe nauna Lucia chye wa ai. * (Lawu matsing hpe yu u.) Dai majaw, 1993 ning hta Italy kaw nna dai de htawt wa ai. Shi hta kanbau bungli n nga tim, Yehowa madi shadaw ya na hpe kamhpa wa ai. Shi gaw Albanian ga sharin la wa nna marai 60 jan hpe apnawng ai du hkra karum ya wa ai. Anhte a hkaw tsun magam hta dai zawn akyu nga yang she nga na. Raitim, Yehowa a lam kaga ni hpe sharin ya nna shi a jinghku byin na matu anhte galaw ai lam shagu gaw anhte a matu galoi mung manu dan na re.​​—⁠​Mahte 6:20.

16. (a) Dai ni aten na hpaga lam gaw hpa byin nga ai kun? (b) Arung arai ni a ntsa anhte mu mada lam gaw gara hku byin ging ai kun?

¹⁶ Yesu gaw dai ni aten na hpaga lam hkrat sum na hpe asan sha tsun da ai. Shi gaw arung arai sutgan ni hkrat sum yang nga nna n tsun ai sha, dai ni hkrat sum ai shaloi nga nna tsun da ai. (Luka 16:​9, NW) Ndai jahtum nhtoi aten hta, gumhpraw dum nkau mi gaw hkrat sum nga nna, mungdan nkau mi hta  hpaga lam grai yakhkak nga ai. Kade n na yang, masa lam gaw grau nna sawng wa na re. Satan mungkan a adaw achyen re ai mung masa lam, nawku htung hte hpaga lam ni gaw hkrat sum mat na re. Myihtoi Ezekela hte Zehpani gaw, hpaga ga ai shara ahkyak ai arai ni re ai aja hte gumhpraw gaw manu n dan mat na nga nna tau hkrau tsun wa ai. (Ezekela 7:19; Zehpani 1:18) Tinang a prat htum wa mahka du ai shaloi she, ndai mungkan a n tara ai sutgan lu na matu, dingman ai sutgan hpe tat kau ra ai lam chye na mat yang, gara hku hkamsha na kun? Gumhpraw law law lu na matu shakut wa tim, dai gumhpraw ni gaw kaman lila sha re ai hpe chye na mat ai masha langai zawn anhte hkamsha na re. (Ga Shagawp 18:11) Ndai mungkan a arung arai ni gaw hkrat sum na re. Dai majaw, na a arung arai ni hpe Karai Kasang hte jinghku hku ai hta jailang lu ai ahkaw ahkang hpe hkum tat kau u. Yehowa hte shi a Mungdan a matu amu gun ai gaw anhte hpe teng sha ngwi pyaw shangun lu ai.

17, 18. Karai Kasang a jinghku ni gaw hpa hpe myit mada lu ai kun?

¹⁷ Karai Kasang a mungdan du wa ai shaloi, kadai mung nta shap ai (sh) gumhpraw hkoi ai lam ni nga sana n re. Shahpa ni gaw manu n jaw ra ai sha grai law htam nga nna, tsi mawan hte sarawun ni hpe mung ra sana n re. Yehowa a jinghku ni gaw mungkan ga shapraw ai kaja htum arung arai ni hte ngwi pyaw nga na re. Aja, gumhpraw hte lungseng ni hpe lusu na matu n re ai sha, mawn sumli na matu sha jailang sana re. Grai kaja ai hpun, nlung hte n hprang sut rai ni hpe tsawm htap ai nta ni gawgap na matu wanglu wanglang lu mai na re. Anhte a jinghku ni gaw anhte gumhpraw jaw ai majaw n re ai sha, shanhte nan anhte hpe sa karum ya mayu na re. Anhte gaw mungkan a arung arai ni hpe maren mara jawm jailang na re.

¹⁸ Dai gaw Karai Kasang hte jinghku hku ai ni a matu grai manu dan ai kumhpa ni kaw nna loi mi sha naw re. Mungkan hta nga ai Yehowa hpe nawku ai ni gaw, “nye a Wa kaw na shaman ya lu la ai ni e, sa marit; ginding aga nnan lat kaw nna nanhte a matu lajang tawn da ai mungdan ngu ai sali wunli hpe hkam la mu” ngu ai Yesu a ga hpe na ai shaloi kabu gara let jahtau nga na re.​​—⁠​Mahte 25:34.